eSefarad Noticias del Mundo Sefaradi
Ver todos los artículos de esta sección >>
MEVLANA, UNO DE LOS MAS GRANDES FILOZOFOS DEL MUNDO
El padre del Ordre Mevlevi, grande poeto adorador del Di-o Uniko, Autor de munchos livros – El Mesnevi es su Ovra Maestra – i poeziyas de Amor.
Konosido por su mistisizmo, su buendad i su tolerensya sin limitos, el HESED i el AMOR. Sus ambezos son la paz i la serenidad. Tiene adeptos entros los kristyanos, los muzulmanos i los judyos.
MEVLANA CELALLETTIN RUMI
(n. Balkh – Afghanistan en 1207)
(m. Konya- Turkia en 1273 )
VEN, OTRA VEZ VEN,
EL KUALKER KE SEYAS..VEN !
MISMO SI NO SOS KREYENTE,
MISMO SI ADORAS EL FUEGO
O DIOSES DE BARRO
MISMO SI SOS IDOLATRO
MISMO SI TE ARREPINTITES
SIENES DE VEZES
VEN SIEMPRE
MUESTRA PUERTA
ES LA PUERTA DE LAS ESPERANSAS
VEN KOMO ESTAS…
Mevlana Celalleddin Rumi
Traduizido por Sharope blanco
Son sus versos repetidos sin kuento, por todos…En el siglo 13 ni se puediya imajinar la persona biervos asemejantes !
El perdon kuaji no egzistiya… Era el tiempo ke las kavesas bolavan en el aver por un si o por un no !
Los Dervishes de este sekto boltan kon la musika mistika del sufismo. Una mano arriva avyerta verso los Sielos – para tomar la Hohma i la Fuersa divina – i una mano ‘mirando’ a la tierra – para dar al hombre lo ke toma de ‘Arriva’.
Kon la seremoniya del SEMA los adeptos aspiran a aunirsen kon el PERFEKTO, olvidar sus ego i yegar a la maturitad del nefesh-alma. Es un viaje spiritual sin deskriminasyon ande todos son bienvinidos i iguales.
FRAZAS KONNEKTADAS AL SUFIZMO
Si tapas kon dos de tus dedos tus ojos ke
puedes ver del mundo ? NADA !
MA esto no kere dizir ke el mundo no egziste..
Tienes la valor de lo ke puedes ver !
Seyas en tus amores komo las innondasyones,
en la amistades i fraternitad komo los riyos…
En ver las errores de los otros,
seyas komo la noche sin estreyas.
I ke seyas komo alguno ke no tiene mas vida
kuando sientes ravya I te inyervas !
Seyas modesto, mi ermano, komo la tierra
Ken ke seyas, mostrate komo sos
I seyas komo el ke los ojos ven !
Ay hombres ke no tienen vistidos
I ay vistidos sin persona aryento !
La savyedura es una mar
i solo el ke en los profundos lo va bushkar
lo va lograr…
MEVLANA
Sharope Blanco
Sefaradimuestro
En esta seksion Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
