eSefarad Noticias del Mundo Sefaradi
En esta seksion Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
LUNA PERFIDIA
La luna es para ensonyarse
Es ermozo de ensonyarse, es olvidar.
Olvidar ke kale olvidar
Lo ke no esta tan ermozo mas
Para amarse…
La luna esta a sus lados.
El la ve briyar en sus ojos.
Su luz diafano aklara los sielos,
El silensyo akompanya los namorados.
Oyes las olas aharvar las rokas ?
Es la yamada de las sirenas ke aman kantar
Echizar los peshkadores ke iran a peshkar
Olvidaran los ke los asperan para kedar.
Ves komo flotan sin meneyarsen las barkas ?
Asperan las ijas de las ondas kon eskamas
Los peshkadores avren los brasos a sus dammas
Savyendo ke nunka mas puedran tornar a sus kazas
Entregarse entero enkadenado, seriya esto el amor ?
Burlarse de todo lo ke egziste para solo amar mijor !
Se kreye ademas ke esto durara por siempre
Ma el amor no keda, se fuye i dezaparese..
La luna es komplisa, es leshana i frivola
Dingunos se keshan de su silensyo kuando se burla
Ensiega los ke son felis en azyendo tornos kon gondola
Falsa adultera, emborracha la mujer en su ombro arimada.
El hombre murmura los biervos ke la hipokrita le inspira
El amor es el kaballero ke da mareyos i todo se olvida
Es el espertar ke es duro, sorprende i la persona trembla
La luna no esta mas. Lamentarse i yorar no sierve a nada.
Sharope Blanco
13 de Febrero 2012
