eSefarad Noticias del Mundo Sefaradi
Ver todos los artículos de esta sección >>
EL PUERTO DE ABRIGO
Debasho de todo modo de tejado
Ande medito, penso, meldo i eskrivo
Ande durmo, m’ensuenyo, komo i bivo
Entre paredes ma ventanas aviertas ;
es mi kaza !
Ande no tengo frio i la kalor no m’alkansa,
Ande las lagrimas pueden kayer sin k’embaraska,
El lugar ke m’abrasa kon sus kantones i me ama,
Su kuzina kon flores i todas las golores;
es mi kaza !
Golores de sevoya sofrita i el ajo fresko !
La pimienta del armi i la berencena kon kaldo !
El perfumo del dulse de rozas, de igo i de bimbriyo !
Ande gizo lo de mis abuelas keridas ;
es mi kaza !
No m’importa en ke sivdad se topa
Si ‘sta leshos de todos o aki serka ,
Si es prove sin nada o grande i rika !
Vieja o mueva eya es mi nido;
es mi kaza !
Kuanto te kero puerto de mi abrigo !
Mi amiga en ken siempre me konfiyo !
Kompanyera de mis noches sin karinyo !
Ande s’eskonde la soledad de mi alma ;
es mi kaza !
Ke saven de mi ? Ken so yo ? En kualo les importo ?
Anyos pasaron i las sinizas kuvijaron los tiempos de fuego!
Kantikas no gritan mas el amor ma el espanto i el olvido.
Mis kantones no riyen, no avlan, se kayan…
en mi kaza…
Sharope blanco
Istanbul 17.6.2007
Sefaradimuestro
En esta seksion Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
Es muestra de que lashon muestro es suficiente para cantar alegrìa y tristezas
Que bonito la lengua ladino me recuerda mucho a mi nona, nonita papas y toda la familia me deleito leyendo .
Sara Galimidi.