eSefarad Noticias del Mundo Sefaradi
Vos kontare las gaviotas de Istanbul !
Un tiempo las viyan solo en las adas, las Islas de la Marmara… Se desinavan blankas blankas ensima del sielo bleu i estavan artas…
No viniyan a arrogar ke la gente les de komida. Baylavan i aziyan tornos en las alturas. Las demanyanadas las viyas munchas munchas ande topavan los pishkadikos para komer. No era komo agora. El pishkado era abundante en la Marmara, en el Bosphore i en la Mar Preta. Era antes la polusyon i la Marmara era limpya komo el kristal !
Se ivan en fin de Avril i Mayo detras de las islas ande no aviya gente i engrandesiyan sus chikos muevos salidos de los guevos. Guay a el ke iva a kaminar por estas partes deziertos. El grupo entero attakava azyendo serklos en el ayre i aserkandosen mas i mas al enimigo.
Alora, kon muncha prestor abashavan en de una ensima de la kavesa i moryian kon sus bikos muy duros i poderozos ! Puediyan matar !
Yo no lo saviya… Teniya unos 18-19 anyos. Un muy ermozo diya de Mayo, tomi mi livro i mi kavesaliko, meti en kamino mi motor i pasi de Buyukada (Prinkipo) a Sedef ke es la isla chika justo enfrente. Ke iva saver yo ke teniyan sus chikos ayi ?!!! Detras de esta isla ay una chika plaj ke preferiya a todas las otras…
Echi la ankla, (anchor) tomi el palo kon el gancho para aserkarme i atar el motor i es alora ke las vide boltando ensima de mi kavesa i bastante serka.
Madre miya bendicha ! Mil guerkos del Gehinnam ! Me ivan a espedasar !!! Tomi el palo kon gancho i empesi a menearlo de todas mis fuersas en boltandolo sovre mi kavesa.
I de otra parte estava tratando de asuvir al motor i fuyir de este lugar ugursuz. Nunka meti mas los pies aya !
Sus chiyos dayindo los tengo en mis oyidos !
De akel diya ke odyo estas gaviotas i los kuervos ke son sus primos en preto ! Uno de eyos parvino a bikarme en la mano kon la kuala estava detenyendo el palo i munchos otros bikaron el motor . Fina ke fui leshos no me desharon i dospues tornaron a sus guevos.
Agora estan ambiertas… Vienen fina muestra kaleja para ver si ay koza de komer.. Enjuntos kon las kuervas antipatik ! Kuando tomamos el vapor para pasar en frente, a la parte Europea de Istanbul, (yo lo prefero siempre a los pontes porke es raro ke no ayga muncho trafiko i el viaje por la mar es muncho mas
agreavle) las gaviotas bolan al ritmo del vapor porke son auzadas agora a resivir simit (begale) ke los pasajeros les echan. Deve de ser muy difisil para eyos porke kale ke bolen muy presto, aferren en el ayre el bokado de simit i kontinuen a bolar en komyendo presto i no deshar kayer el pedaso sigiente !
Se auzaron para sovrebivir … Esto, malgrado ke no las amo, o me espanto de eyas, me aviya muncho attristado. Era komo si sintiya en mi sus esfuersos en bolando. El viaje dura medya hora approksimadamente. En enverano kon la kalor ke atabafa, en invierno kon el friyo bolan las gaviotas detras de los vapores i la gente les echan pedasikos de simit….. Sino se mueren las gaviotas de ambre !
Sharope blanco
SEFARADIMUESTRO
