De la pluma de Sharope: LA BRUMA por Sharope Blanco

Ver todos los artículos de esta sección >>

LA BRUMA

A penas eran sinko la hora
No aviya amenesido dayinda
Estava medya durmida
Kuando me aserki de la ventana
El aver goliya el friyo
La soledad del kamino dezyerte
Ma lo mas ekstranyo de todo
Esta bruma ke kuvijava el entorno

No vide nada mas ke un grande grizo
No puediya persivir nada, ni el suelo
Edifisyos entereos se aviyan eskondido
Detras de una nuvla ke aviya abashado

Es la primera vez ke veiya una nuvla
Ke mos englutiya, tan era densa
La sivdad mas no estava
La vida se aviya kedado akeya demanyana

Keriya bolar, ir a los leshos
Ande se viyan el sielo I los pasharos
A los sityos kayintes I klaros
Para allegrar mi korason I mis ojos

Una noche sin lunar I sin estreyas
El friyo yelando la tierra I las piedras…
Kuando vere la primavera I las rozas ?
Las sorizas de los gatikos I de las ormigas ?..

Sharope blanco
SEFARADIMUESTRO
Istambul