De la pluma de Sharope: EN LOS PROFUNDOS por Sharope Blanco

Ver todos los artículos de esta sección >>

Ken no kijyera bivir en un Paradizo ?

EN LOS PROFUNDOS

Demanyanadas tivias, aguas freskas, barkas de color
Los pinos en el monte enfrente enkantan de sus vedror
Lo ke se ve mas aya es el blue el mas ekstraordinaryo
De la Mar del Mediterraneo ke se konfunde kon el sielo

Mi imaginasyon avre velas, leshos a los largos
Ande las rokas moradas abrasan los sityos deskonosidos
A las plajas ande se espanden sin pudor las arenas
Yo me libero de mis kadenas i alkanso a las estreyas
Las olitas i el ayre burlon kantan un kanto konosido
Son melodias i versos ke no son ajenos a mi oyido
Siento ke me envolvo en un dulse i relaksante repozo
Serro los ojos, los rayos del sol karesan mi puerpo.

No se del todo a ke puerto yeva este ekstranyo viaje
No veygo la tierra… Me sorprende de no espantarme !
Las aguas estan trankilas, kontemplo los dolfinos
El silensyo es mi kompanyero, pasharos son mis amigos

No dezeyo yegar a dingun lugar, esto bien ansina…
Kijyera durmir kon el kanto de la mar komo en la kuna
I ke un koryente me yeve, arezvalandome en mi suenyo
Al payis ande biven las sirenas, nadando.. nadando…

Sharope blanco
SEFARADIMUESTRO
Istambul