De la pluma de Sharope: BNEY ANUSIM SON JUDIOS por Sharope blanco

Ver todos los artículos de esta sección >>

PARA KUALO TANTA DISKORDIA, TANTA RAVIA, TANTA OPPOZISYON ?

Me da satisfaksyon i la vedra es ke so muy muy orgulyoza de todos ke partisiparon, partisipan, i seguro partisiparan dayinda mas i mas a la kontribusyon de muestra kultura i su literatura, a la bushkada del judaizmo moderno kon una relijyon mas tolerante, sovre todo por los Bney Anusim, los konversos i los ke keren ser parte de muestro puevlo asigun la TORA santa.

Nesesitamos muestros ermanos pedridos ! Eyos no trokaron de relijyon keryendolo ma porke teniyan de salvar sus vidas i las de los miembros de sus famiyas… Di-o, El Mizmo, mos izo saver kon el instinkto de konservasyon ke la vida viene antes de todo.  Los Bney Anusim son muestros, mizmo si ojas i ojas de historya se aboltaron dospues de estas epokas dezgrasyadas… La Tierra Santa los nesesita en frente de sus enemigos ke en poko tiempo yegaran a ser la majoritad… Muestra Ley los nesesita para ke SU Puevlo no dezapareska…

I… Si eyos lo keren kon tanta konviksyon i fuersa, ken es el ke les va salir en frente kon una seya dizyente ley de los rabinos ?  Es el echo del D.io de akseptarlos o rechesarlos i El, de dinguna manera va arrondjar sus ijos, basta ke rekonoskan sus Kreador i la Ley de sus ansestros.   Son mas judios de la mayoriya de los judyos, observantes i attados al Estado de Israel mas ke los Israelianos (si se puede !…).  Los konosi de serka i me namori de sus limpyo korason, de sus ambre de ambezarse la Tora mas i mas, de sus esfuersos de dar a sus ijos i a sus ijas el amor de muestra patria i de muestro puevlo.

Para mi, i munchos komo mi, es bastante de kerer ser judio,  amar i sakrifikarse si neseseyo por su puevlo, rekonoser Adonai komo el Uniko D.io, el Abastado ke mos krio i es el Duenyo de Todo i Todos,  para azer partido de Bney Israel, rekonosido i amado por todos los muestros.  Ser arrekojido por su grande famiya kon el derrito de su sangre, el, su famiya i todos sus desendyentes todo el tiempo ke lo keren i lo sienten en sus korason !

I, entre mozotros, ke mos importa lo ke pensan x, y, z ?   D.io es el Uniko Juzgador !

Tengo imuna ke EL nunka mos va abandonar i sera kon mozotros mizmo kuando mos parese ke no esta… EL ESTA… I ESTARA SIN FIN….

Arogando por la salud i el bienestar de todos en estos tiempos

dezgrasyados del Covid 19…  Leshos de mozotros !

Sharope Blanco
Estambol

SEFARADIMUESTRO