De la pluma de Sharope: LA NOSTALJIYA AMARGA I DULSE DEL PASADO

Rekuerdos … Rekuerdos…
Ke vos yeven tambien kon eyos….
A los diyas de  vuestra chikes,
A los brasos de vuestros parientes !
Ke lamban vuestras almas eskarinyozas
De la ermozura de vuestras memoryas…

Kazas ande renyava la dulsor,
La eskola i el viejo profesor !
Kaminos konosidos,
El tiempo pasado kon los amigos,
Los livros eskondidos debasho del kolchon,
Las primeras letras guadradas en el kashon !

El fostan muevo de dantela,
Akeya kamiza blanka de seda.
Los horas ke korriyan muy presto,
La chapeta del primer bezo,
I akeya noche sin esuenyo…..
Rekuerdos de los diyas de kandor
Kero arrodeyarme en vuestra kayntor !

KE ERMOZO ERA LO KE ME AKODRO OY

I KE TRISTESA  ME DA  DE ALEVANTAR
LA MANTA PARA TENER EN FRENTE DE
LOS OJOS LA NOSTALJIYA  AMARGA I DULSE
DEL PASADO…

No puedo supito espertarme en la luz ensyegadora
i brutala de la teknolojiya tan impersonala, tan  inhumana….
Yo bivo dayinda en la innosensya, kon mi konsiensya sana.

Portanto:

*

Ken es el blanko angelo ke nunka peko ?

I komo lo dize OMER HAYYAM tan ermozo
Si sos TU ke me dates la vida i mi destino
Saviyas de antes ke pekariya sin espanto !
Alora, ke es TU ravya ?  En kualo so kupavle yo ?

*

Veygo delantre de mis ojos viejas fotografiyas de

Istanbul kuando todo estava ermozo, las personas
edukadas i elegantes,  no gritavan en los lugares
publikos, teniyan buenas maneras i se respektavan,
todos los produktos eran abundantes i teniyan
savor,  no egzistiya la gentorya ke vazyaron los
kazales de la Anatolia para vinir i inchir de
1 Milyon a 17 Milyones de habitantes esta sivdad
maraviyoza…. Lo izyeron porke se diziya ke las
piedras i la tierra de Istanbul eran de oro !  Los
anyos 50-70 kedaron muy muy leshos en muestras
memoryas…  Eran el tiempo de muestra chikes i
muestra manseves…

Una agra-dulsurya me inche kuando veygo

fotografias,  filmos de esta epoka, meldo livros,
poeziyas ke kontan la vida de las personas ke
tuvyeron el mazal de savorar  todo lo ke una
sivdad historika de grande kultura, bellezas
naturales,  maraviyas artistikas, kon una sosyetad
rafinada i kultivada ofresiya…

Definitivamente no es mas la mizma sivdad….
Malgrado las fraguas ke dan a pensar a un
grande metropol moderno kon sus razga-sielos,
muy grandes  sityos muevos por el allojamiento
kon seguritad, mas parkes, mas restaurantes, mas
mezkitas, mas bruido i una lingua ke desrepoza
las orejas sensiblas, vistas diferentes de lo ke era…

Todo troko..  i los  keridos no estan mas…
Kuervos tomaron el lugar de las golondrinas,
las palomitas… Las gaviotas tienen ambre..
Se  installaron en la sivdad i bushkan komida
ke sovre de las personas porke no topan bastante
pishkado en los bodres de mar.. Esta mar no
es la mizma  i la agua no es la mizma agua ke
korriya de los chorros antes….  Se beviya i era
dulse i buena… Oy no mas !