eSefarad Noticias del Mundo Sefaradi
JUDAIZMO I PATRIOTIZMO
kon 3 poeziyas de Sharope Blanco
EL BLUE I EL BLANKO
En el azul luminozo del sielo
Veygo una gaviota blanka bolando
Sus alas bien estiradas kedan immobilas
Ke grasya en su bolo i en sus vueltas
El sielo esta klaro de un blue intenso
Kon nuvlas redondas en blanko, briyando
Desinan kastilyos de algodon, inaksesibles
Son las moradas de los kuentos inkreyivles
Nunka vide el blue i el blanko tan unidos
Komo si no puediyan ser mas ke endjuntos
Las kolores de mi kerida bandyera
Ke siempre ondeara sovre mi medina
Sharope blanco
ESPERANSA EN EL
Amigo..
Sufrites en los duros anyos..
Olvidate de las dolores,
todo paso !
No mos arrovan mas
muestros keridos
Es un mundo loko
ma no tenemos espanto.
Mozotros no veremos
diyas dezgrasyados
A muestra edad,
aserkandomos del Repozo !
Es un mundo de firyidas
en el kual bivimos
Unos estan al abrigo,
otros siempre en peligro !
Deke peryemos esperansa
i dezesperamos ?
El Puevlo Judyo
siempre se salvara del enemigo !
Es la Alliansa
en la kuala mos kreyemos
SU Puevlo sovrebivira
i sera duenyo del Destino.
En muestra larga historya
no mos mankan egzemplos
Fuimos esklavos, egzilados,
torturados ma ken kedo?
Todos dezaparesyeron
en miles i miles de anyos
El Puevlo Judyo kedo.
Siempre mas fuerte mas rezyo!
Mos arrekojeremos
en muestro payis !
Ke los mansevos tornen
a las Tierras Santas !
Israel es la esensya,
la seva de muestra rayis
Es de Eya ke bevemos
la leche de las fuersas
Es Eya ke mos avre sus brasos
i mos aze felis
Es pormodo de eya
ke muestras kavesas estan altas
Le daremos todo
i muestra vida mizmo in extremis
Sin hezitar seremos heros muertos
para sus tierras!
Sharope blanco
TIERRA ADORADA
Ke ermozo de ver ke la gente de mi payis
Se appropriyan de todo lo ke toka a mi rayis !
Al nivel de sus proprias famiyas..
Israel es komo sus guertas i sus kazas…
Ke Amor es este por su piedra i su arena
Sus montes i sus plenas, su agua i su vedrura
No tenemos rikezas naturalas.
No vendemos petrol, metales presyozos.
Lazramos en kondisyones duras
Kuando el sol kema los kueros
Kuando savemos ke kada gota ke gastamos
Es presyoza por las tierras ke lavoramos
Vendemos siensya, muestros esfuersos,
El saver, la technolojiya i eksperimentos
Vendemos muestros talentos
I un pokito de muestros frutos…
Fiestamos, selbramos, mos allegramos
Kuando resivimos premios presyozos !
Komo miramos a muestro payis !
Komo una madre maraviyandose
De los primeros biervos de su bebe…
La kudyamos komo este presyozo bebe
A su mas insinyifiante kayintura,
A su yoro ke mos parte la alma…
Por eya damos i daremos muestra vidaT
Tanto sangre koryo i mas korrera…
Kon akeyos ke djuraron a muestra pedrita…
Dulse payis de muestros padres
No tengas kudyado i trembles
Tsahal te guadra..Yehuda tiene liones…
Sharope blanco
Sharope Blanco
Sefaradimuestro
En esta seksion Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
Ver todos los artículos de esta sección >>
