De la pluma de Sharope: FRANSYA, MI NAMORADA, EN KE HAL* KAYITES ! DEDIKODU* POLITIKO ENTRE MIS MANOS !

«Espejo espejo !  Dime a mi oyido
Ken es el mijor en el mundo ?»
«Eras tu Nicolas Sarkozy, el mas haham !
Ma  a Francois Hollande lo izyeron benadam !»

Un amigo miyo  me disho ke la Fransia teniya  un Bonaparte,  no el de la «buena parte»  (!) ma Napoleon ke mato a todos  los novyos de Fransya i de akeyos tiempos en delantre la Fransiya se izo  «errrrrotika» ! I… Agora tienen  el Levi 16 en !  (Eyos lo yaman Louis…)

Si  ?  En kualo pasha  ?  Le agrada lukso al «Amigito» muevo ?

No ! No es Hollandezo… Solo se yama ansina…
Francois Hollande, el amante i el padre de las 4 kreaturas de Segolene Royal, de la Siedra komo el !   Dospues de 30  anyos, les asuvyo umos a la kavesa i  se espartyeron kon los chatales* en la mano… Atyotyotyo !
El ya esta kon una mueva hanumika…..  Ansina, bivyendo kon keyf* endjuntos… Komo la otra ke teniya. Se yama Valerie i es jurnalista.  No es agora ke se izo Monsieur le President ke le va deshar la yaka* !  No…. Es hora de apegarse mas i mas… Dezmazalada de Segolene !  Esto se aze ?  Hombre no es ?  El mijor al palo !  Ansina dizen… No es yo ke lo digo !

Me parese ke a la Fransia le esta  plazyendo prezidentes ke son tipos kon vidas eskandalozas, mujeres «eksantrikas», en un biervo tipos «tipos !» A lo manko son los jurnales ke tiendran ganansyas buenas si no el puevlo Fransez !
Por lo bueno ke van a eskrivir……

Krizas ekonomikas i sosyales ademas kon tanta kriminalitad no pueden ser solusyonados kon ansina de » Monsieur un tel» o  «Madame une telle » !  Ya lo savemos todos.. Vedra ?
Ke agan lo ke keren i ke se engleneyen* entre eyos ma a mozotros ke no mos token !   Es echo difisil la pokitika por mi vida !

LA POLITIKA

Es echo difisil la politika !
Un diya estas en la kavesa
Al otro diya te topas en la kola,
I estas oyendo lo ke «el otro» avla….

Es el pueder ke ensyega
El ojo ve i la alma dezeya !
Kon el pueder viene honores i fuersa
I… Las paras kon palas en seguida !

Tienes mas enemigos ke amigos…
Te odyan i oyes dezgrasyados biervos
Las kritikas vienen kon faktos inventados
Tu kulpa es de no ser de sus partidos !

No ser del mizmo partido,
Basta para ser enemigo !
I mizmo en el mizmo partido,
No estas seguro de no ser kucheyado
Porke es la honor de la siya ke esta en juego !

La siya ke es el trono moderno,
De un poderozo rey el simbolo !
Un rey sin korona  ma ke importa
Si la korona de diamantes no esta ?
Si todo lo de mas asemeja ?

Sharope blanco
12 de May 2012

Mi amigito dize ke la unika error ke Sarkozy kometyo era de deshar la media dezvelopar el odyo kontra el.
Inyoro a ke punto la televizion i los jurnales teniyan poder ensima de las personas. Des del diya ke tomo el
poder deviya serrarles la boka i sensurar lo ke le ariya danyo… Esto fue una error ke de Gaulle no kometyo.

Si mi alma… Tienes razon !   Al nombre de la demokrasiya, ke la veyga manko, estos jurnalistos dezmeyoyados estan echando de embasho embasho Israel tambien !  No abasta lo ke el mundo mos empretese, i de aryento de muestro korason mos echan lodo a la kara !  No ay ken les diga «Basta !» …   Kale unos kuantos Ataturkes ke vengan al mundo i mos enderechen todo lo tuguerto ! Demokrasiya deve tener mezuras… Limitos….No deve kavzar danyos ma aklarar las mientes.. Kritikar  pozitivamente.  Andeeeee ?
El mundo, mizmo los  payizes  adelantados NO  estan prontos  para la demokrasiya dayinda….

Penso ke Sarkozy era muncho mijor de sus predesesores….
Yo lamento la ida del naniko… Ke ermoza mujer ke tiyene ! Si Carla lo kere tanto bien i se izo su mujer, eya kon tanta belleza, kon tanta fama i no era paras ke le mankava ni todo lo ke keriya, es ke el naniko es uno de mil maraviyas !

I lo es !  Mas el tiempo avansa i mas las personas se azen stupidas parese… El Hollandezo gano kon una muy chika diferensya… Ke pekado !  Son los arabos ke incheron las kashas de sus votos… Lo merese la Fransia !

El muevo prezidente ni se puede azer la unyika del naniko ke es un giante kon su intelijensya i saver kuentos i politika.
Lo bushkaran kon kandelikas al naniko.. Yo lo eskrivo aki !!!

Sorizas para todos

Sharope blanco

*   Hal  :   Estado
*   Dedikodu  :  En buen Judyo es kitar el rey i meter el vizir !
*   Chatal  (Catal en Turko)  es piron, tenedor, fourchette, fork
La ekspresyon «chatales en la mano»  sinyifika «pletos!»
*   kon «keyf»   es tomando plazer – biervo tomado del Turko.
*   yaka  :  Biervo Turko ke sinyifika el cuello, le col, collar
no deshar la yaka  :  ekspresyon para dizir «no desharlo irse»
*   Engleneyar :  Verbo tomado del Turko  EGLENMEK  ke
sinyifika  jugar, tomar plazer, divertirse.