eSefarad Noticias del Mundo Sefaradi
En esta mueva seksion “De la pluma de Sharope”, Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
EL KEYF DE SER HOMBRE !
FUERON KRIYADOS PRIVILEJYADOS!
PADRES ERMANOS MARIDOS I IJOS….
EYOS SON MUESTROS MUY KERIDOS.
MA, NO ES POR ESTO KE NO MOS SELAMOS!
EL KEYF DE SER HOMBRE!
– Estos no tienen la ovligasyon de pelarsen
kon esta pega dezgrasyada los pelos de todo
el puerpo! No se ke sadisto ambezo esto
a las mujeres!
– Tener mustachos es sus orgulyos!
No tienen dinguna verguensa de ESTO!
– Les abasta un sako chiko para meter sus
kozas kuando van en vakansyas.
– Tienen la kapasitad de avrir todo modo
de bokales, konservas, jarros sin demandar
el ayudo de dingunos!
– No tienen ke pintarsen la kara, la seja,
el ojo i la boka kon estas suzyedades chimikas
kon kolores violentos i ir al banyo kada poko
para meter mas i mas, pensando ke se efaso!
– Los keridos no los miran kon piadad en sus
ojos kuando se engodran un poko…
– No tienen menester de kaminar ensima de los
«palos» debasho de los povretikos de los karkanyal
komo si fueran azyendo un show en el sirko !
Un otro sadisto ke invento ansina de dezgrasya !
– Sus kalsas nunka se fuyen i dunke no tienen ke
echarlas al sierkol muevas muevas…. Todo para
ke el fabrikante gane mas i mas… Los van
azyendo delgadiiiiiiiiiiitos!
– Penyarse? Segundos! No les importa….
Kon kaveyos tan kurtos no tienen ni de pensar
mizmo a esto ! No tienen ni menester de sekarlos,
sin avlar del todo de lo ke mozotros azemos por
muestros kaveyos ! Ademas, bushkamos las manos
ekspertas de los kuafores, manko los vere!
Mos sorven el tiempo, la pasensya, paras, inyervos….
AAh ah ! No demandes…. I… Bigudis en la kavesa
en durmyendo? Eyos se burlan solo de muestra
agoniya sin mizmo pensar ke si la mujer se sumete
a esta tortura es para plazerles! Paara kualo mas?
No kreyesh a dinguna mujer ke dize «Si lo ago es
para mi mizma !» Es falso ! Mintiras…..
– El sekso fuerte puede apanyar i kortar el animal
ke va komer kuando tiene ambre…
– Tomar una dush i vistirsen les toma 10 minutos!
Toman sus jaketa i salen afuera! I… Si tienen de
asperarte… La fin del mundo!
– No uzan yevarsen kon eyos una bolsa yenna de
kozas ke no tienen de menester… Tienen aldikeras
para meter paras, yaves i a vezes (!) una rida!
Los sharonfonfones te kitan un kalem i un briquet
si se nesesita! Papeles i papelikos tambien kaven
en esta multitud de aldikeras en sus pantalon i la
jaketa!
– Los chamashires ke se visten debasho de sus
vistidos en paketos de 5 deyos, kostan el 10 porsyen
de un soutien de una mujer! … Ma pezan i toman
lugar syen vezes mas!
– Mizmo a 50 anyos, dingunos diran por el ke
«kedo en kaza» ! …. Se puede kazar kuando se desida
– Las kolores de su kara son orijinal ! No «abashan»
en la luvya i ensima de las tovajas kuando se lavan
la kara!
– Dingunos les van «echar ojos» al pecho o a las
piernas kuando avlan kon eyos!
– No tienen el ovligo de trokar de alkunya kuando
se kazan!
– Un chiko slip les abasta para ir a nadar.
– No tiyenen ke provar ke tienen los mizmos derritos
kon la mujer!
– No tienen una «tiya» ke los vijita kada mez !!!
– Sus ijos les viene en los brasos echos i prontos
sin ke tengan de lavorar i sufrir 9 mezes para azerlos!
NUNKA SE TIENE OYIDO UN DOKTOR
POR HAZINURAS DE HOMBRES!!!
No lo tienen de menester…..
– Son «honorados» por ser «Don Juan» i englenarsen
kon los sentimientos de las mujeres ! Ven veras ke
la mujer perye su «honor» i no tiene dinguna dinyitad
i konsiderasyon si aze lo mizmo komo los hombres!
Ken invento esto? Por seguro los hombres!
Kon el tiempo ke pasa i el progresso en la vida
kultural i sosyal, se estan trokando las kozas
poko a poko, porke son las mujeres ke no
estan «komyendo chanchas» mas ! Ganan sus
vida i eskojen sus maridos tambien ! Ma dayinda
ay i siempre avra DIFFERENSYAS ke mos
daran selos i gritaremos «injustiya» ! Komo no?
Eyos fueron kriyados privilejyados!
Ke vuestros ojos briyen siempre de plazer!
Sharope blanco
en SEFARADIMUESTRO
http://groups.yahoo.com/group/
