De la pluma de Sharope: UN OTRO DIYA EN EL KALENDARYO

En esta mueva seksion “De la pluma de Sharope”, Sharope Blanco, fundadora de Sefaradimuestro, un foro en Internet para korrespondensia  sovre kultura sefaradi kon el buto de ranimar la kultura de los djudyos sefaradis,  va a partajar kon mozotros su penserios i kriasiones literarias.

UN OTRO DIYA EN EL KALENDARYO

Un diya muevo en muestra vida…
Kon lo malo i lo bueno…No savemos dayinda..
LE arrogamos para ke mos oyga en SU Glorya
I ke este diya tengamos salud i pase sin lagrima
Un diya de paz i de alegriya…. Sin hora mala..
Un diya de akodrarmos de mas, en muestra vida…

La vida sigue su korso adelantre
No importa si estas felis o triste !
Nada keda en su primera dolor,
No se muere ni de dolyo ni de amor !

Otr’un amaneser… Otras noches pasan
Kon las mizmas estreyas ke briyan,
Kon el mizmo lunar ke dezeya engradeser
I en sus katorze empesa a enchikeser  !

Bolan bolan muestros diyas
Sin mizmo ke sepamos ande se van
No se pueden  apanyar ni guadrar
No seya ke para mirar a las memoryas,
Komo un filmo mas bivo ke fotografias,
Tomar un reflo de la vida, deskansar !
No abasta lavorar,  kale saver i gozar..

No importa si son suenyos
Si los vimos o mos imajinimos !
Mos enrikesimos de rekuerdos,
En las miradas los tenemos enklavados.
Suenyos dorados, amores olvidados,
Bezos ke dayinda keman los lavios,
Desepsyones, el silensyo i los bruidos…
En sivdades leshanas o en kaminos asolados

Sharope Blanco
25-09-2011
http://groups.yahoo.com/group/Sefaradimuestro