eSefarad Noticias del Mundo Sefaradi
EL ANIYO VEDRE
KE SE TOPA KUANDO S’ESKAVAN
LOS KASHONES DEL OLVIDO ?
Miliun objekto sin motivo i sin valor
Letras, mas letras, fotografias sin kolor
Una flor arrugada ke yeva ayinda su golor
Una piedra yelada, sin forma, dura, portanto
Arrekojida kon ke plazer i kon ke dulsor…
UN ANIYO ENTRE ANIYOS… KE ERA ?
El olvido tapo las memoryas, nada me kedo
M’esfuerso a akodrar, pusho l’aniyo a mi dedo
I no es mas mi mano, veygo un dedo delgado !
De la flama del vedre en el oro m’estas mirando
Te kero arrondjar, aleshar el karinyo profundo…
PALAVRAS SIN BOZ ENTERRADAS EN MIS OYIDOS
Biyervos mas biyervos inchen estos kashones
Biervos ke no se sienten mas en mis kantones
Promessas doradas ke se bolaron komo balones
Sera verdad ke las oyi ? Eran halusinasyones !
No se sekan los chorros de la dolor
No se pueden serrar las fuentes de l’amor !
Sharope Blanco
Sefaradimuestro
En esta seksion Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
Ver todos los artículos de esta sección >>
