De la pluma de Sharope: CARPE DIEM

En esta seksion Sharope Blanco, fundadora de Sefaradimuestro, un foro en Internet para korrespondensia  sovre kultura sefaradi kon el buto de ranimar la kultura de los djudyos sefaradis,  va a partajar kon mozotros su penserios i kriasiones literarias.

CARPE DIEM

La vida se arezvala kon bueltas
De un monte abasho komo piedras
Komo si fuyera de las miradas
Pasa de entre las manos avyertas.
Ke es esta adjile* preta
Ke mos va matar ?
Korre aki, korre aya
Sin asperar ?

Ago kozas
Unas detras de las otras..
Siempre penar, siempre lavorar
Sin tiempo de respirar
I sin nunka kedar.
Me siento kansada
Yegi de akeyos sityos leshos
Kero arepozar mis ojos
Bever una kupa de agua
Tengo mis lavios sekos
Anyudos en mis kaveyos largos
Kale penyar i arrekojerlos

Portanto kero durmir
Si, espandirme i durmir
Esto es, deshame durmir…
Serrar mis parparos !
No puedimos avlar !
Ansina, sin nada pensar…
Artarmos de enjuntos estar
Kon mi bienamado,
El ke kero tanto !…

Me kedo mirando..
Sin estar seguro
Tomo mi mano !….
Yo entera tremblando….
El sin mover, kayado…
No kijyendo romper el silensyo !
Para kualo es esta loka korrida ?
Estamos tensos, el ojo en la hora !
Mos amamos kon armadas detras !
Lavoramos espantandomos de kedar atras..
Kale yegar i no mankar !
Ay unos siempre de bushkar !
Tratar de azer las kozas i terminar.
La sudor del diya de amanyana
Se meskla al de ayer kon la tuya !
Tan presto, ansina, fuyen los minutos ! …
A vezes son horas los sigundos!
Kuando te aspero kon batimyentos
Los ojos tornados a los leshos
A las luzes de la sivdad…

No se si es un suenyo o la realitad
Una monstruoza mentira o la verdad
Me eskondo de mis sentimientos
Topo las vizyones de rekuerdos presyozos
Los guadro kon los polvos de los anyos!
Ayre, sal i siniza es muestra vida
Es la de los otros ke mos importa…
El karinyo i el kudyado mos anima..
Muestros oyidos en sus boz ke mos yama !..
Ke izimos ?
Siempre remetimos
A futuros tiempos
Muestros dezeyos
De alevantarmos sin prestor…
Kon keyf i anchor,
Sin el espertador !
Kon la travadora golor
De los panes tostados
De los dezayunos
Muertos ambyertos !
Kon sorizas i dulses bezos !…
Siempre a mas tadre remetimos
Muestros paseos amorozos
Largos fines de semanas a dos
Vakansias luksuozas, viajes karos
Mismo kon poko mos kontentimos
Para pueder yegar a muestros suenyos ..
Portanto ke kuryozo ke es la vida
Ves ke todo lo ke izites no valyo a nada !
La vida se burla de ti, no le importa
Nunka es seguro si se keda o se va !
Difisil de entender… Ya es !
Viene el diya de la retreta o la vejes
Te puedes alevantar kuando keres
Ma avres los ojos a l’amaneser !
O no durmes i te alevantas mizmo antes !…

Kuando bushkas a tu lado tu mujer
Esta desrepozada o tiene dolores…
Asperas los dulses bezos, i no puede ser !
El tiempo paso, ma ven ver…
Todo troko !

De muevo kale aprender
A bivir sin angustya
I kon grande plazer
Gozar de la pasensya
Ke mankava o dezaparesiya
Kuando lo mas se teniya menester…

Saver akseptar i admeter
Todo lo ke mos aparejo
El imprevizible destino…
No resivir kon apreto
Lo ke esta eskrito…
Rogar por vidas largas
Sin aksyetad i hazinuras…