eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
KANTES DE PARIDA (Moshe Attias)
El envestigador de la romansa I del kante Djudeo-espanyol: Moshe Attiash, eskrivio dos livros sovre estos temas.
Los livros fueron eskritos en Ebreo i aki vos traygo un rezumen ke trazladi al Ladino, sovre: «Los kantes de Parida».
El venimiento del nasimiento de un ijo, es konsiderado komo koza muy emportante en la vida de la famiya sefardita.
De aki, vienen munchas kreensas i munchas tradisiones, kostumbres i seremonias, ke fueron formadas i guadradas kon severidad, durante las jenerasiones.
La emportansa de este evenimiento, proviene, probavlemente, del fakto ke entregro dos elementos: del derecho del individual ke esta kompozado de una mitzvah relijioza, de una alegria familiar ke viene de esta kreensa de la kontinuasion de la kadena familiar, mesklada de emosion relijioza, porke el padre de la famiya tuvo el zahut de kumplir la mitzvah antika –una mitzvah ke sus raises estan plantados en la vida de los primeros –los padres de la nasion.
Ocho dias fueron guadrados para la parida.
Su madre i su famiya la arrodeavan kon amor i kon afeksion, la sirvian i le ayudavan, tenian kudiado de eya, i, sovre todo, la guadravan muncho i al resin nasido, de koza mala i de kavzo malo.
Eyos se akavidavan muncho en la vijilensia de la noche, por ke se espantavan de los danyozos.
Segun la kreensa popular, los danyozos se enselan de estos ke tuvieron el zahut de tener un ijo varon, i de azer la Berit mila, i bushkan la ora adapta para akavzar danyo a la madre i para tokar la kriatura. Por esta razon, ay ke akavidarse muncho de eyos.
Una vieja konto, ke se deve akavidar mezmo de la komadre, kon la plasenta i kon la sangre en sus manos, i de vezes, de su kazamiento kon las kazas de lo danyozos, para azer parir a sus ijas. Por esta razon, sus kontakto kon la parida no es bueno.
La romansa i el kante popular del Djudeo-espanyol, ekspresan los sentimientos del puevlo verso este akontesimiento, i entre eyos, topamos la ekspresion de la alegria de la famiya i de la kontentes relijioza, ke inchia sus korasones, de tener el gran zahut de kumplir esta mitzvah emportante.
El poeta popular anonimo, atto koronas a la kavesa de Avrahan Avinu, el padre de esta mitzva, en romansas espesialas ke le dediko, sovre las sirkunstansias de su nasimiento, la aparision divina, su lucha brave i korajoza kontra Nimrod, i la Akeda de Yitzhak.
Los kantes de parida, se kantavan durante todos los ocho dias.
La noche, kuando todos se echavan a durmir, la luz briyava en la kamareta de la parida, i de eya se sintia el son de las romansas, ke salia i kortava el silensio de la noche.
Este era el kante de las protektoras alado de la kama de la parida, arrodeadas por su madre, ke kantavan para aleshar el esfuenyo de sus ojos, i para adulsar el esfuenyo de la parida. Eyas, tambien, asperavan sin pasensia, a la luz de demadrugada.
La tradision mos desho dos kantes ke empesan kon las palavras: «Kanta gayo, kanta«, ke esta deskriviendo el asperar al kante del gayo, i otras komo:»Kuando la parida dolores tienes» o,»Ya se alevanto el parido».
Kanta, gayo, kanta, ke ya va amaneser.
Si dormish, parida, kon bien vos despertesh.
El gayo keria una kamizika.
Ke bien le keriash a sus karnizikas.
Kanta, gayo, kanta, ke ya va amaneser
El gayo keria i un kushakito,
Ke bien le yakishea en su beliziko.
Kanta, gayo, kanta, etc.
El gayo keria una fezizika,
Ke bien le yakishea en su kavesika.
Kanta, gayo, kanta, etc.
El gayo keria unos eshuekitos
Ke bien le yakishea en sus piezizikos
Kanta, gayo, kanta, etc.
El gayo kere un gerdaniko
Ke bien le yakishea en su garoniko.
Kanta, gayo, kanta, etc.
Adjustamos a eyas las romansas: «Oh, ke mueve mezes» i, «Estabase la parida».
Segun sus estilos i sus nivel liriko, podemos supozar ke estas romansas fueron kompozadas entre los siglos 18 i 19.
Esperemos ke estas ovras nunka seran ulvidadas i siempre se toparan entre los trezoros de muestra kultura tan presioza.
Medi kohen Malki
Djulio 2012 – Yerushalayim
