eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
ESTOS SEMOS MOZOTROS
Poema kompozado i trezladado del ebreo al ladino por Medi Malki
Sovre la muza ya avlimos.
I de kualo mas avlaremos?
Ultimamente vimos la luz
ke troko a una fantazma.
Sekretos son muestros kaminos
koriendo a eyos sin saver.
Sin kerer van a kalmar la pasion
kalmar el silensio,
para bushkar i no topar
i para siempre aspirar.
Kriados de serenidad i de fuego
ke siempre se amatan i s’ensienden,
mirando komo fue un muevo mundo
un Olimpus buyendo,
un esfuenyo de enganyo,
dientro lo ke ay de nada
i el nada de lo ke ay.
Estos semos los dos i solos estamos
i esta luz reflektara el tapete
de muestro kampo, en muestro esfuenyo,
ke, puede se, mas no esta….
Medi Cohen Malki
2012 – Yerushalayim
