eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
El dia de famiya en Israel
Aze unos luantos dias ke selebrimos aki el dia de famiya.
Latradion de esto empeso kuando fiksaron en primero el dia de la madre, en memoria de Henriyeta Sold –la fundadora de la organizasion Hadasa.
Kuando selebravan el dia de las madres , el era karakterizado kon la espesifikasion de la onor de la mujer i todos azian un esforso de kontentarla en kozas komo: sesar los echos de kaza: toda la famiya se metia akel dia a lavar a fregar a barrir i a kuzinar o a alimpiar, diziendo ke en este dia la madre deve de repozarse.
En mi chikes perkuravamos de merkar regalos komo flores o bijutes o bonbones. Yo siempre lo azia kon la media voluntad por ke pensava ke tambien mi padre tiene ke resivir algun rengrasio. Ma. viendo mis amigos, me sintia mal i me iva merkar alguna koza para mi madre, ekskuzandome frente mi padre ke el merese tambien un regalo.
Deke vos lo esto kontando? por ke akeos dias ya pasaron. Las feministas reklamaron kontra esta fiesta, diziendo ke kada mujer merese un rengrasio, i mas tadre, este dia devinio en dia de famiya, ansi ke tambien sus valores trokaron.
Se trata del respekto i de la onor a kada miembro de la famiya, no emporta si es mujer o ombre, kriatura o djoven soltero o kazado, padre, madre, elc.
Ke penso de este dia ?diziendo ke es de toda la famiya, el se refiere a todos sus miembros.
En la famiya todos son iguales, ma el rolo de los padres es de edukar.
Las mujeres tienen los mezmos derchos ke los ombres, ma, saviendo ke algunas vezes el uno no es kapache de azer lo ke el otro puede, ay ke ekilibrar i ovrar ansi ke kada uno kontribuya el mksimo ke puede.
En esta jenerasion de komputadoras i de medios de komunikasion tan dezvlopados, los miembros de la famiya estan dedikando muncho tiempo a los aparatos i no para avlar, para aserkarse el uno al otro, para diskutir, para dezbafar ,para riyir o para rezolver algun problema.
Espesialmente agora, ay ke meter tino a lo ke muestros keridos puedan dialogar kon mozotros, si es en una sena kondjunta en el tiempo ke sera dedikado para reunir la famiya. O las fiestas ke son una buena okazion para azerlo,ma, en la vida kotidiana, tenemos ke apartar el timpo para muestros keridos, para ke sepan ke ay ken los eskucha i los entiende.
La edukasion ke es una de las kozas mas preokupantes de los padres deve de ser entensiva ma kon pasensia.de la otra parte-edukar no kere dizir de ser un profesor.para esto se topan las eskolas o los sirkulos.
Avlando de ambezar: ay ke guadrar las buenas relasiones kon la eskola i kon los profesores-por ke el bienestar de la kriatura es lo mas emportante.
La famiya de oy no asemeja a esta de mezmo antes vente o trenta anyos.
Komo lo mensioni, la alta teknolojia esta «rovando» la imajinasion de las kriaturas.todo esta pronto i klaro. El enternet esta aziendo fasil la bushkedad de enformasion, ma, de la otra parte, esta paralizando la kapachidad de imajinar, de sonyar,de ambezarse el kamino i no solo el buto.los livros kaje ke se dezaparesieron,la televizion los esta remplasando.De vezes, no podemos kontrolar el kontenido de lo ke mos prezentan.tambien munchos de mozotros , los adultos, semos ostajes del ekran: no tenemos tiempo de avlar kon muestras kriaturas. Azemos manko la aktividad fisika komo el deporte o la jimnastika, mos metemos a komer i a mirar los programas, i, ansi, tambien, muestros ijos.
I por terminar kero felisitarvos keridas famiyas ke kada dia del anyo sea vuestro dia de famiya i ke siempre seash unidos i shalorozos a vuestros keridos.
Medi Cohen Malki
2012 – Yerushalayim
