eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
DOS POESIAS DE NOSTALJIA
Esta semana vos prezento la una de dos poezias de las dos ermanas: Matilda Cohen Sarrano i Miryam Raymond.
Eyas se egrandesieron i fueron edukadas en Italia, i pasaron sus primeros anyos basho la solombra de holokausto, ke arivo tambien ayi
El orijen de sus famiya es de Aydin (Turkia).sus madre se engrandesio en Izmir i sus padre en Rodes.Eyos se enkontraron en Milano i se kazaron en el 1938.
Matilda i Miryam moran oy en Israel i son gran pilares del Ladino.
El raporto al pasado es ekspresado aki via las dos poesias ke prezentare aki.Esto de dos puntos de vista diferentes: la una via la tornada a la sivdad de la chikes i la otra, via un biju sinyifikante para la ke lo merko.
Eskoji estas dos poezias, prensipalmemte por estas razones: la parientes de las ke eskrivieron i el modo espesial:diferente i semejante en estas dos poezias ke las estan atando al pasado i les estan permetiendo de»avlarle».
Esta semana tratare de la poesia: SIVDÁ DE MI CHIKÉS
En la primera estrofa la avlante esta deklarando el buto de su vijita. Eya empesa en adresandose a su sivdad natal, en tornando a sus kalejas tan konosidas.
Esta aviertuta esta karakterizada por verbos de movomiento:»vini»,»torni, etc.Despues eya yega a la sivdad de su chikes, ma los vizinos i los parientes ya no se topan ayi.
El lugar esta biviendo en eya ma, se avia trokado.Asperando a enkontrar alguno de su pasado, i ke , immediatamente se deziluziona.mirando la ventana,eya se imajina de ver ayi a su padre i a su madre.Eya se kere atar a alguna koza.para un momento eyos se arebiven en sus fantazia, Esta ventana puede simbolizar una vista a traverso de la realidad…
Los guezmos i las savores se estan mesklando, ma, la kaye komo eya la akodra troko.Las estasiones de su pasado le estan aziendo despertar todos los sensos .i de la otra parte, realmente, eyas ya no egzisten.
Agora el lugar es diferente:la kavane es en sus ojos komo lugar sin tiempo:un simbolo de boraches ke no esta atada a la realidad, ke ayi es komplikada:el lugar esta bivo i aktivo, ma los ke se topanen el , no biven siempre la realidad.Eya ya esta borracha sin entrar.eya responde a los prezentes ke vino a bushkar su chikes.
En esta poezia estamos viendo un kadro realistiko ke es el largo viaje de la avlante i dientro de el el kadro kaje fantastiko: la bushkedad del pasado: las iluziones i la deziluzion tan doloroza .Este viaje tuvo empesijo, un punto d’en medio i una fin.
SIVDÁ DE MI CHIKÉS
Sivdá de mi chikés vini a toparte,
Sivdá de mi chikés torní a ti.
Kalejas konosidas ulvidadas,
En tram i en metró yo vini akí.
En el lugar ke era la mi kaza
Amigos i vizinos no stan mas.
A mí sólo mirando la ventana
Me paresió de ver papá i mamá.
La fabriká de dulses sta serrada,
El panadero pan no aze mas.
Golor siento de pan i chikolata,
Savor de mi chikés al paladar.
Sólo la meaná st`aínda avierta.
Ya sto burracha mizmo sin entrar.
“Sinyora, kualo bushkas?” me demandan.
“Yo bushko mi chikés ke no sta mas”.
Rekordos tanto dulses i keridos.
El tiempo se kedó ay para mí.
Sivdá de mi chikés vini a toparte,
Sivdá de mi chikés torní a ti.
Miriam Raymond,
Ramat-Gan 22.12.04
Medi Cohen Malki
Yerushalayim
