eSefarad Noticias del Mundo Sefaradi
Haim Vitali Sadacca, que escribió y publicó poesía en turco en sus años jóvenes, ahora compone sólo poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía.
Disfrutaremos en esta sección la habilidad de Haim como poeta y su dominio de la lengua ladina.
«KONSEJOS A UNA KERIDA»
Mi Kerida, mis palavras no son por konsolarte
Yo so tu serkano , deseo un konsejo darte.
La vida es komo un esfuenyo, yena surprizas
Kuando ansyas, kuando dekorada kon sonrizas.
El mal destino de tus alegrias te alesho,
Kedates en esta ansya, desgustosa te desho.
La vida es pasajera, olvida lo pasado,
Kalma tu korason, ten el meoyo deskansado.
Mi alegria es verte feliz en todos los dias
La vida pasa komo soplo, ya lo saverias.
Mira a bivir tu tiempo kon vyejas alegrias,
Deseo verte kontente, siempre kero ke rias.
Komo transferar a tu korason una senteya?
Para darte una luz sin ke ninguno la veya.
Deseo verte bivir komo antes tus primaveras
Dando a tu alma plaseres kon rizas verdaderas
Haim Vitali Sadacca
Montreal
——————————————————————
«EL DESEO DE UN PADRE»
Mi kerido,
El tiempo ke yo estare mas aedado,
I ke me veras la mas parte asentado,
En vezes mal vestido i no arapado,
No t’ansieyes de verme en este estado.
Te rogo mira a entenderme.
No me kritikes si do valor al dinero,
Siempre devo pensar al dia vinidero.
La vida es larga, dinero da koraje,
Esperar ayudos es media muerte kaje,
Yo kero asembrar para ke tu rekoltres.
Por favor, a mis konsejos no te revoltes,
Te rogo mira a entenderme.
Nunka topes el menester de korijarme,
Kon siertas avlas no mires a derokarme.
Si en mis komeres estare vagaroso
O si me veras un poko mas angustyoso
En mi kama si esto medio esviyoso,
Komo si fuera kon mi persona ravyoso.
Te rogo mira a entenderme.
Akodra tu chikes ,komo me okupava,
En tus primeros pasos komo te kaminava,
Mismo la komida a la boka te dava
Siempre a tus yoros remedios topava,
En grande a tus estudios te ayudava
Para ver tu sonrisa kualo no pensava?
Kon mis bezos i mis kantes te konsolava
Yo , yeno de gozo en los sielos bolava….
Si un dia ,se trokara mi buen destino
No me aleshes de tu alma, de tu tino…
Te rogo,no te olvides todas mis penas,
Mis deseos k`esten gravados en tus venas.
En mi dezespero i ennuvlado dia
Tu sonrisa ke seya komo sol ke bria,
Siempre kero ver akel amor ke yo via.
Deseo ser tu orgulio ,tu alegria.
Fin al dia d’alkavo de mi espartision
Te vere kon muncho gozo i konsolasion
Te rogo mira a entenderme.
Haim Vitali Sadacca
Montreal
