eSefarad Noticias del Mundo Sefaradi
Haim Vitali Sadacca, que escribió y publicó poesía en turco en sus años jóvenes, ahora compone sólo poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía.
Disfrutaremos en esta sección la habilidad de Haim como poeta y su dominio de la lengua ladina.
«KONOSI UNA ERMOZA«
Era de edad de diziocho a los vente,
Una kara linda, kon mirada inosente,
Una avla kalma su sonrisa diferente,
Kon kaminada de pasharo, boz no se siente.
Kaveyos sedozos fin la taya estirados
Eran kon una brosh i kon flores dekorados.
Me bazava a las kozas ke mi ojo viya
En su enterior komo era? yo no saviya.
Dezeava ver sus ermosuras envisibles.
Konoser sus sentimientos si eran sansibles.
La modestiya vera esta en la konsensya
Si tiene dezdenyo d’el prove, d’el manko de sensya.
Si su korason ve al k’esta en desolasyon
Si les da una mano yena de konsolasyon.
Envista amare kon mi alma su luzyura,
L’adorare kon sus aktos i su ermosura.
Haim Vitali Sadacca
Montreal
——————————————————————
«EL AMOR KON SENTIDOS DE UN PINTOR»
Te huites a un riko, yo un pintor no famoso,
So un ombre enfeliz, dezesperado i sin gozo.
Kon kolores las mas kayentes deseyi desinarte,
Nunka pensi en una tela o en karton pintarte.
A tu dulsura unas luzes divinas kije darte
Durante mi vida para pueder posesionarte.
Te gravi en mi korason i hize mi sinyatura,
Metiendote en kuadro ke reflekta tu hermosura.
Me mata la kolor de sielo ke ay en tus miradas,
Siempre fueron kon tus dulses sonrizas dekoradas.
Estaras ariento de mi,para ke tu me enspires
Kon tus lindos ojos deseo a ke siempre me mires…
A tus lavyos les di la kayentura de tus sonrizas
Pinti las miradas kon la alegria de tus rizas.
Todo tiempo k’estare dekorado kon tu prezensia
Kayentaras mi alma, alargaras mi egzistensia..
Haim Vitali Sadacca
Montreal
