eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Maurycy Gottlieb
o Maurycego Gottlieba
(Drohobych, Galicia, 1856 – ? 1879)
de Wikipedia
Pintor djudió polonezo, Maurycy Gottlieb, nasió en Ukraina, i era ijo de una famiya de 11 kriaturas. A 15 anyos entró a la Akademia de Artes en Viena. Después izo estudios de arte en Krakov debasho de Jan Mateijko. Manko de un anyo después tuvo de deshar el estudio de Mateijko a kavza de las manifestasiones de antisemitizmo de parte de los otros estudiantes, sus kompanyos, i se transferó a Molde en Norvejia. Pasando unos kuantos anyos, él tornó a Viena, para bushkar sus raízes djudías.
A 20 anyos ganó una medalya de oro en una kompetisión de arte de Mónako, por su kuadro «Shylock i Jessica», ke amostra una shena del «Merkante de Venezia» de William Shakespeare. El fiksó komo model para la kara de Jessica, Laura Rosenfeld, la ija ke amava i a la kuala propozó matrimonio. Laura rempushó su demanda i se kazó kon un bankier en Berlino. Aun ke Gottlieb pensara de kazarse kon Lola Rosengarten, kuando sintió del kazamiento de Laura, se suisidó, ekspozándose a los elementos, i murió de komplikasiones, kavzadas por el frío.
Malgrado su muerte prematura, mas de 300 de sus ovras surbivieron, munchas de las kualas no terminadas. Después de la kayida de la Kortina de Fierro, fueron deskuviertas en el Este munchas koleksiones polonezas deskonosidas, i la reputasión de Gottlieb pujó grandemente.
Se konosen de él munchos retratos, munchas ovras de sujeto djudió i no-djudió, i unos kuantos autoretratos en varias vestes. El mas famozo es su autoretrato, degizado en Asueros (Ahashverosh).
Su ermano, el pintor Leopold Gottlieb, nasió 5 anyos después de su muerte.
