eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 40
Ambezaron muestros maestros: Una matrona demandó a Rabí Yosé ben Halafiá lo sigiente: «Ke kere dizir el versíkulo: Dará saviduría a los savios (Dan 2,21). No será: I El le adjustará? Yo kreo ke no ay ke meldar a la letra, si no: «El dará saviduría, aún ke no a los savios».
Le respondió el Rabino: «Si vinieran a tu kaza dos ombres para ke les emprestaras, uno de eyos prove el otro riko, a kual de los dos prestarías? Al prove o al riko?»
Respondió eya: «Al riko»
Disho él: «Porké?»
«Porké si el riko pedriera mi dinero, siempre tendría de ande pagarme, ma si lo pedriera el prove, de ande me iva pagar?»
Disho Rabí Yosé: «Oygan tus oyidos lo ke dize tu boka. Del mizmo modo, si el Santo Bendicho El diera la Torá a los inyorantes, eyos se asentarían a meditar en eya en los sirkos i en los banyos. Ma los savios se asentan a meditar sovre eya en las sinagogas. Por esto está dicho: Da saviduría a los savios (Dan. 2, 21).
Fuente foto rabino: UCL LIBRARY
