eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
EL VENDEDOR DE AGUA I EL DJARRO
Al tiempo avía en Rodes un vendedor de agua, ke iva kada día a Rodino, inchía un grande djarro de agua yelada de las fuentes de ayí i la traía a Rodes, para venderla en las kalejas de la sivdá. Este ombre yevava el día entero el djarro de agua enriva la spalda, i este pezgo lo avía uzado a kaminar enkorkovado.
Se konta ke kuando él se izo viejo i ya no pudo mas lavorar, no riushó a kitarse este uzo, i kontinuava a kaminar enkorkovado, keshándose todo el tiempo, i diziendo ke tinía sovre la spalda un djarro pezgado, ke no le estava deshando repozo.
La famiya i los amigos bushkaron en todas las maneras de kitarle esta idea, ma no riusheron, asta ke un día uno de sus amigos disho ke lo iva a milizinar él.
Tomó un sako, metió adientro un djarro de barro i tomó en la mano un palo godro. Se eskondió detrás de una puerta i asperó ke el ombre pasara por el kamino ke estava uzado a azer kada día.
Kuando el ombre pasó por ayá, el amigo le vino por detrás kon pasos kayados, le aserkó el sako a la spalda i dio una dada fuerte al sako, rompiendo el djarro ke estava ayá adientro. Kitó pishín los pedasos del djarro roto afuera del sako i disho al amigo:
“Vites? Ya rompí el djarro ke tinías sovre la spalda! Na, mira los pedasos rotos!”
El ombre, ke no estava una de mil de lo ke avía echo el amigo, se espantó muy muncho de la shematá ke izo el djarro en rompiéndose. Ma kuando se aboltó i vido los pedasos del djarro roto, se alegró muy muncho i se konvensió ke no tinía mas nada sovre la spalda.
I ansina fue ke el vendedor de agua se kitó el djarro de la kavesa i empesó a kaminar derecho.
Kontado por Moshé Sarano, en los anyos ’50
(Del livro Kuentos del folklor de la famiya djudeo-espanyola de Matilda Koén-Sarano, Kana, Yerushaláyim, 1986)
