eSefarad Noticias del Mundo Sefaradi
Por Rivka Abiry
La tiya Klara
Mi tiya Klara nasio, se engradesio i bivio en Varna (Bulgaria), ke komo se save es una sivdad situada a la Mar Preta i es muy vijitada de touristos, espesialmiente en el enverano Eya teniya una kasa ermosa kon munchas kamaretes i un kortijo no lechos de la playa. Después de la muerta de su marido eya alkilava una de las kamaretas. De esta manera enrikesiya su renta i no teniya estadias finansieras. No puedo dizir ke teniya bolsas kon dukatos de oro, ma tuvo bol bol para bivir una vida ferah, arepozada i simple.
Un anyo kuando no pudo alkilar la kamareta, no se le apreto la alma, no se desespero, supo komo ayudar se. Apanyo un periodiko i mando una reklama. Resivio ansina dos repuestas una de Bourgas (sivdad en la Bulgaria) in una de Ruschuk (una otra sdivdad de la Bulgaria). Anke la persona de Ruschuk podia pagar menos, eya desido de tomarla pormodo ke era una mansevika.
Kuando ayego la muchacha, le disho»buirun», avlaron al shirut, i le amostro su kamareta. Las dos se yakishearon i eran kontentes. Mi tiya estuvo mazaloza de tener la mansevika a su lado. Una muchacha buena. La kamareta suya era siempre espajada, a eya no se le sientiya la boz, veniya a kaza a una ora spesifika, i nunka retornava tarde. Eya aziya su propio lavado, gizava sus komidas i no dava angarya a la proprietaria. Kuando paso el enverano, se salio, ma le prometo de venir el anyo ke viene . En vista de esto, mi tiya se desidio de aresentar una otra kamareta, para alkilarla. El anonsio le trujo un ombre del vizindado, ma esta vez eya no fue bareranit.
La muchacha i el djoven se enkontraron por la primera vez en el kortijo, mi tiya los miro i tuvo la impresión ke el era un muchacho muy agradavle, instruido ma un poko avagaroso en aziendo sus aserkas. Ma bueno komo el pan bueno. Mi tiya no se merikio si se van plazer, porke saviya ke esto tomariya tyempo. Ma, kuando mas de un mez paso, eya vido ke su aserkamientos eran muy floshos, muy avagar.
De esta manera se metio a eskucharlos kuando avlavan. De vista se le izo klaro ke el, en rogandola a dar un paseo, eya keriya tomar el autobús, kuando el propozava de yevarla al sinema, eya dezeava irse al teatro, kuando el la invitava tomar una dondurma, eya proposava de merkar un simit. Siempre era kyefizlik, inat, desverguensada le dava la kortada, i no dava bueltas. I el desmazalado, desamparado, no savia komo komportarse.
Esto atristo mi tiya, i se desido a ver el haham de la sivdad i tomar su konsejo. Le disho todo i rezumo ke kuando el dezeava la derecha, eya propozava la eskyedra. Alora el haham demando: “Es la sinyora de Ruschuk???” Mi tiya kedo shashkin. “Komo save ke la sinyora vino de Ruschuk? le demando. Meneando su kaveza tristemente, el hamam disho: “Mi espoza es de Ruschuk.
Fuente: Rivka Abiry – Publicado en El Amaneser Nº 42
