Sefer Tora en Djudeo Espanyol – Transkrivida kon letras latinas del livro por Ye’huda Sidi / VAYIKRA: 26 – SHEMINI (9 a 11)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

26 – SHEMINI

9

¹I fue en el dia ochavo ke Moshe yamo a A’haron i a sus ijos, i a los vyejos de Yisrael. ²I disho a A’haron, tomate un bezerro ijo de vaka, por sakrifisyo por pekado, i un barvez por alsasyon, sanos, i ayegalos delante de A’. ³I a los ijos de Yisrael avlaras, dizyendo: tomad un kavrito de las kavras por sakrifisyo por pekado, i un bezerro i un karnero de edad de un anyo, sanos, por alsasyon; ⁴i un buey i un barvez por sakrifisyo de pases, para sakrifikar delante de A’, i un prezente enbuelto en azeyte; porke oy A’ se aparesera a vozotros.

⁵I tomaron lo ke enkomendo Moshe delante de la tyenda del plazo, i se ayegaron toda la kompanya, i se pararon delante de A’. ⁶I disho Moshe: esta es la koza ke enkomendo A’ ke agash; i la onra de A’ se aparesera a vozotros. ⁷I disho Moshe a A’haron: ayegate al ara, i az tu sakrifisyo por pekado, i tu alsasyon, i az ekspiasyon (kapara) por ti, i por el puevlo; i az la ayegasyon del puevlo, i az ekspiasyon por eyos, komo A’ enkomendo.

⁸I se ayego A’haron al ara, i degoyo el bezerro del sakrifisyo por pekado ke era por el. ⁹I los ijos de A’haron ayegaron la sangre a el; i mojo su dedo en la sangre, i puzo sovre los kuernos del ara, i vazyo la sangre al simyento del ara. ¹⁰I el sevo, i los rinyones, i el redanyo del igado del sakrifisyo por pekado, saumo en el ara, komo A’ enkomendo a Moshe. ¹¹I la karne i el kuero kemo en fuego afuera del real. ¹²I degoyo la alsasyon; i los ijos de A’haron entregaron la sangre, i el la esparzyo sovre el ara al derredor. ¹³I le entregaron la alsasyon por sus myembros, i la kavesa; i el los saumo sovre el ara. ¹⁴I lavo las entranyas i las pyernas, i las saumo sovre la alsasyon en el ara.

¹⁵I ayego la ayegasyon del puevlo, i tomo el kavrito del sakrifisyo por pekado ke era por el puevlo, i lo degoyo, i lo ayego por sakrifisyo por pekado komo el primero. ¹⁶I ayego la alsasyon, i la izo segun la ordenansa. ¹⁷I ayego el prezente, i inchyo su palma de el, i lo saumo sovre el ara, afuera de la alsasyon de la manyana. ¹⁸I degoyo el buey i el barvez por sakrifisyo de pases, ke era por el puevlo; i los ijos de A’haron le entregaron la sangre , i el la esparzyo sovre el ara al derredor: ¹⁹i los sevos del buey i del barvez, la kola ke kuvre las etranyas, i los rinyones, i el redanyo del igado. ²⁰I puzyeron los sevos sovre los pechos, i el saumo los sevos en el ara. ²¹I los pechos i la anka derecha mesyo A’haron por mesedura delante de A’, komo enkomendo Moshe.

²²I also A’haron sus manos al puevlo, i los bendisho; i desendyo de azer el ekspiasyon por pekado, i la alsasyon, i el sakrifisyo de las pases. ²³I entro Moshe i A’haron en la tyenda del plazo, i salyeron i bendisheron al puevlo; i la onra de A’ se aparesyo a todo el puevlo. ²⁴I salyo fuego de delante de A’, i konsumyo sovre el ara la alsasyon i los sevos; i vyendolo todo el puevlo, esklamaron i se echaron sovre sus fases.

10

¹I los ijos de A’haron, Nadav, i Avi’hu, tomaron kada uno su brazero, i metyeron fuego en eyos, i sovre el puzyeron saumeryo, i ayegaron delante de A’ fuego estranyo, ke el no les enkomendo. ²I salyo fuego de delante de A’, i los konsumyo, i muryeron delante de A’. ³I disho Moshe a A’haron: esto es lo ke avlo A’, dizyendo: en mis ayegados sere santifikado, i delante de todo el puevlo sere onrado. I A’haron se kayo. ⁴I yamo Moshe a Mishael i Eltsafan, ijos de Uziel, tio de A’haron, i les disho: ayegadvos, alsad a vuestros ermanos de delante del santuvaryo afuera del real. ⁵I se ayegaron, i los alsaron kon sus tongas afuera del real, komo disho Moshe. ⁶I disho Moshe a A’haron, i a Elazar i a Itamar, sus ijos: no deskuvrash vuestras kavesas, ni razgesh vuestros vestidos para ke no murash, ni se ensanye sovre toda la kompanya; empero vuestros ermanos, toda la kaza de Yisrael, yoren por la ardedura ke ensendyo A’. ⁷I no salgash de la puerta de la tyenda del plazo, no sea ke murash; porke el azeyte de la untasyon de A esta sovre vozotros. I izyeron segun la palavra de Moshe.

⁸I avlo A’ a A’haron, dizyendo: ⁹vino ni sidra no bevas, tu, ni tus ijos kontigo, en vuestro entrar en la tyenda del plazo, para ke no murash. ¹⁰Fuero de syempre sera por vuestros djerenansyos: ¹⁰i esto es para azer diferensya entre lo santo i lo profano, i entre lo enkonado i lo limpyo; ¹¹i para anbezar a los ijos de Yisrael todos los fueros ke A’ les avlo por mano de Moshe.

¹²I avlo Moshe a A’haron, i a Elazar, i a Itamar, sus ijos ke kedaron: tomad el prezente ke keda de las ofrendas kemadas de A’, i komeldo sin levadura serka del ara; porke es koza santisima. ¹³I lo komeresh en el lugar santo, porke es tu fuero, i el fuero de tus ijos, de las ofrendas kemadas de A’; porke ansi fue yo enkomendado. ¹⁴I el pecho de la mesedura, i la anka de la levantadura komeresh en lugar limpyo, tu, i tus ijos, i tus ijas kontigo; porke son tu fuero, i el fuero de tus ijos, dados de los sakrifisyos de las pases de los ijos de Yisrael. ¹⁵La anka de la levantadura, i el pecho de la mesedura, kon las ofrendas kemadas de los sevos, traeran para meserlo por mesedura delante de A’; i sera para ti, i para tus ijos kontigo, por fuero de syempre, komo A’ enkomendo.

¹⁶I peskuzar peskuzo Moshe por el kavrito del sakrifisyo por pekado, i ek, fue kemado; i se ensanyo kontra Elazar i Itamar, los ijos de A’haron ke kedaron, dizyendo: ¹⁷por ke no komistesh el sakrifisyo por pekado en el lugar santo? porke es santisimo, i lo dyo el Dyo a vozotros para yevar el delito de la kompanya, para azer ekspiasyon (kapara) por eyos delante de A’. ¹⁸Ek su sangre no fue traida adyentro del lugar santo; komer aviash de komerlo en el lugar santo, komo yo enkomendi. ¹⁹I disho A’haron a Moshe: ek, oy ayegaron su sakrifisyo por pekado i su alsasyon delante de A’, i tales kozas me akontesyeron; i si yo uvyera komido el sakrifisyo por pekado oy, ¿uvyera agradado en ojos de A’ ? ²⁰I kuando Moshe oyo esto, se kontento.

11

¹I avlo A’ a Moshe i a A’haron, dizyendoles: ²avlad a los ijos de Yisrael, dizyendo: estos son los animales ke komeresh de todas las kuatropeas ke estan sovre la tyerra. ³Todo el ke tyene [1]pesunya, i ke tyene la pesunya endida, i ke alsa la rumya, entre las kuatropeas, este komeresh. ⁴Empero estos no komash de los ke alsan la rumya, i de los ke tyenen pesunya: el kameyo, porke alsa la rumya, ma no tyene pesunya; enkonado vos sera. ⁵I el konejo, porke alsa la rumiya, ma no tyene pesunya; enkonado vos sera, ⁶i la lyevre, porke alsa la rumiya, ma no tyene pesunya; enkonada vos sera. ⁷I el puerko, porke tyene pesunya, i tyene la pesunya endida, ma no alsa la rumiya; enkonado vos sera. ⁸De la karne de eyos no komash, i en su kalavrina no tokesh; son enkonados para vozotros.

⁹Esto komeresh de todo lo ke ay en las aguas; todos los ke tyenen alas i eskamas en las aguas, en las mares, i en los arroyos, akeyos komeresh. ¹⁰Ma todos los ke no tyenen alas i eskamas en las mares, i en los arroyos, de toda syerpe de las aguas, i de toda koza biva ke esta en las aguas, abominasyon vos seran: ¹¹i abominasyon vos sean; de su karne no komash, i sus kalavrinas tendresh en abominasyon. ¹²Todo lo ke no tyene alas i eskamas en las aguas, abominasyon sera para vozotros.

¹³I de las aves, estas tendresh en abominasyon; no sean komidas, abominasyon son: el agila, i el osifrago, i el esmerejon, ¹⁴i el buitre, i el milano segun su manera, ¹⁵todo kuervo segun su manera, ¹⁶i el avestruz, i la lechuza, i el laro, i el gavilan segun su manera, ¹⁷i el buo, i el somorgojo, i el ibis, i el sisne, ¹⁸i el pelikano, i el buitre de karonya, i ¹⁹la siguenya, la garza segun su manera, i la abubilya, i el mursyegalo.

²⁰Toda syerpe i ave ke anda sovre kuatro pyes, abominasyon vos sera. ²¹Empero esto komeresh de toda sierpe de ave ke anda sovre kuatro pyes, ke tyene pyernas arriva de sus pyes, para saltar kon eyas sovre la tyerra. ²²Estas komeresh de eyas: la langosta segun su manera, i el langostin segun su manera, i el hargol segun su manera, i el hagav segun su manera. ²³I toda otra syerpe de ave ke tyene kuatro pyes, abominasyon vos sera. ²⁴I por estos seresh enkonados: todo el ke tokare en su kalavrina sera enkonado asta la tarde. ²⁵I todo el ke yevare algo de su kalavrina, lavara sus vestidos, i sera enkonado asta la tarde. ²⁶Todas las kuatropeas ke tyenen pesunya, ma ke no tyenen la pesunya endida, ni alsan la rumiya, enkonadas vos seran; todo el ke las tokare, sera enkonado. ²⁷I todos los ke andan sovre sus palmas, entre todos los animales ke andan sovre kuatro pyes, enkonados vos seran; todo el ke tokare en su kalavrina, sera enkonado asta la tarde. ²⁸I el ke yevare su kalavrina, lavara sus vestidos, i sera enkonado asta la tarde; enkonados son para vozotros.

²⁹I estos vos seran enkonados entre las syerpes ke van arrastrando sovre la tyerra; la komadreja, i el raton, i el lagarto, segun su manera, ³⁰i [2]la anaka, i el koah, i la letaa, i el homat, i el kameleon. ³¹Estos vos seran enkonados entre todas las syerpes; todo el ke los tokare kuando son muertos, sera enkonado asta la tarde. ³²I todo akeyo sovre ke kayere algo de eyos, kuando son muertos, sera enkonado, sea algun atuendo de lenyo, o vestido, o kuero, o sako, kualkyer atuendo kon ke se aze ovra, sera metido en agua, i sera enkonado asta la tarde, i ansi sera alimpyado. ³³I todo atuendo de barro adyentro del kual kayere algo de eyos, todo lo ke uvyere en el sera enkonado; i lo kevraresh. ³⁴De toda komida ke es de komer, akeya sovre la kual vinyere agua, sera enkonada; i todo bevraje ke es de bever, en kualkyer atuendo sera enkonado. ³⁵I todo akeyo, sovre ke kayere algo se su kalavrina sera enkonado; orno o ornayas seran derrokados; enkonados son, i enkonados seran para vozotros. ³⁶Empero fuente, i pozo onde se akojen aguas, sera limpyo; ma lo ke tokare en su kalavrina, sera enkonado. ³⁷I si kayere algo de su kalavrina sovre alguna simyente de asembradura ke se a de sembrar, sera limpya. ³⁸Ma si fuere puesta agua sovre la simyente, i kayere algo de su kalavrina sovre eya, enkonada vos sera.

³⁹I kuando muryere alguna kuatropea de las ke podesh komer, el ke tokare su kalavrina sera enkonado asta la tarde. ⁴⁰I el ke komyere de su kalavrina lavara sus vestidos, i sera enkonado asta la tarde; i el ke yevare su kalavrina lavara sus vestidos, i sera enkonado asta la tarde. ⁴¹I toda syerpe ke va arrastrando sovre la tyerra, abominasyon es; no sera komida. ⁴²Todo lo ke anda sovre el pecho, i todo lo ke anda sovre kuatro, o mas pyes, de toda syerpe ke va arrastrando sovre la tyerra, no los komash; porke son abominasyon. ⁴³No ensuzyesh a vozotros mizmos kon ninguna syerpe ke va arrastrando, ni vos enkonesh kon eyas, para ke seash enkonados kon eyas. ⁴⁴Porke yo soy A’ vuestro Dyo, i vos santifikaresh, i seresh santos; porke yo soy santo. I no enkonesh a vozotros mizmos kon ninguna syerpe ke se remoeve sovre la tyerra. ⁴⁵Porke yo soy A’ ke vos ago suvir de la tyerra de Ayifto, para ser vuestro Dyo; seresh pues santos, porke yo soy santo.

⁴⁶Esta es la ley de la kuatropea, i del ave, i de toda koza biva ke se remoeve en las aguas, i de toda kriadura ke va arrastrando sovre la tyerra: ⁴⁷para apartar entre lo enkonado i lo limpyo, i entre el animal ke es de komer, i el animal ke no es de komer.

[1] unya del pye, komo la del kavayo o de la vaka

[2] todos estos son diversas maneras del lagarto

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.