eSefarad Noticias del Mundo Sefaradi
La albadra
Avia un padre i un ijo.
El ijo se izo grande i vendia albadras para personas. Akel tiempo no avia arabas, no avia nada. Los hammales se mitian las albadras, tomavan un sako i lo akarreavan.
Este ijo vindia albadras. Avia viejas, avia muevas.
I na ke el padre stuvo hazino. Avia un`albadra echada en un kanton.
Le sta diziendo el ijo al padre: “Saves, papa?” dize, “Vino uno… Akeya albadra ke stava arrojada, la vendi!”
“Aman!”dize el padre, “Todo lo ke lazri de liras de oro, todo lo ke tinia stava ay guadrado. No tinias kualo azer?”
El ombre se izo hazino hazino. Stava para murir.
Ensupito viene uno i le traye al ijo l`albadra vieja, ke se l`adove.
Mira el ijo, el oro sta adientro! Akel no tomo haber.
Korre el ijo and`el padre, le dize: “Papa, l`albadra la trushi atras!”
“E,” disho el padre, “l`albadra ya vino, ama yo ya me sto indo!”
Kontado por HAIM REFAEL – 1998
Notado i redaktado por MATILDA KOEN-SARANO
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
