eSefarad Noticias del Mundo Sefaradi
Dizen ke los djudyos son el puevlo eskojido, esto no se ke rarar de djusto es ma ke tyenen una entelijensya pratika i repuestas en su lugar esto lo aksepto.
En el anyo 1954 el primer Ministro de İsrael Ben Gurion, vijito los Estados Unidos. En esta vijita, el sekreter del Estado Unido John Foster Dulles, le demando a Ben Guryon estas demandas:
-Sinyor Ministro me puede dizir, el, a ken reprezenta egzaktamente? A los djudyos de Yemen, a los djudyos de Polonia, ¿de Romania o de Brazil? Dospues de 2000 anyos de eksilyo, Oy, es posivle de avlar de una nasyon unika, de una kultura unika?
Ben Gurion le responde:
-Sinyor Sekretaryo de Los Estados Unidos, antes 400 anyos, el barko nombrado Mayflower, salyo de Ingletera para trayer los primeros emigrantes a Los Estados Unidos. Le rogo durante sus viajes en Amerika, ke tope 10 mansevos djudyos Amerikanos i les demande estas demandas:
- Ken era el kapitan del vapor
- Ke karar de tyempo sureyo el viaje?
- Ke komyeron?
- Komo estava el estado del la mar?
No kreyo ke no va tomar repuestas djustas.
Ma antes 3000 anyos la nasyon djudia, partyo de Ejipto para la Tierra de İsrael. Le rogo kuando va vijitar diferentes paises, kual pais ke kere ke seya, ke tope 10 mansevos djudyos i les demande antes 3000 anyos kuando salitesh de Ejipto
- Ken era el kapitan
- Ke karar de tyempo sureyo el viaje?
- Ke komyeron?
- Komo estava el estado del la mar?
En las repuestas ke le van a dar va topar mi repuesta.
Agora veremos ke repuesta entelijente le va dar Salamon a su Amigo Moshe:
Salamon asentado en un kafe de Batyam, meldando una revista Araba, Moshe en otra meza, bevyendo kafe remarka ke su amigo Salamon esta meldando una revista Araba.
Enkantado se va allado de Salamon i le demanda:
-Salamon tu buen djudyo ke te akontesyo deke estas meldando un artikolo arabo loko sos?
-No Moshe no so loko, fin agora meldava todo revistas de djudyos, me se apretava el korason
– Deke?
– En las novelas djudias, todo eskrive ke los Djudios estan en perikolo, Israel esta atakado, los kazamyentos mix i la asimilasyon ya vino al chifro 50%, los Djudyos estan proves i se van a deperder. Ma kuando meldo las novelas arabas me se esta achileyando el korason.
-Yabasta Salamon los jurnalistos arabos no eskriven bueno por mozos
– Melda kualo esta eskrivyendo
– Kualo?
Salamon empesa a meldarle:
Los Djudyos posedan kaji todas las bankas del mundo, el sektor de diamantes, el sektor de filmos esta en sus manos, todos son rikos i entelijentes, eyos estan dirijando el mundo i kada anyo el 50% del prix de Nobel son de eyos.
Para kada anyo ke mos ayege el Dyo.
Forti BAROKAS
Fuente: turkisrael.org.il
