“Antolojía de Kuentos Sefaradíes” Kapítolo I: Kuentos de Kulli: 22. EL KAMPO DEL REY por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

22. EL KAMPO DEL REY

Un rey tenia un kampo i bushkava de darlo en poder de djente ke lo pudieran rejir. Yamó a uno, le disho:

– ¿Aresives tu este kampo?

Le respondyo, diziendo:

– No tengo fuersa de servirlo.

I ansí le disho al segundo, i el tresero i el kuarteno, ke ninguno lo kijo resivir. Yamo a el kinteno, le preguntó:

– ¿Aresives este kampo?

Disho: – Si.

– ¿Estas dispuesto de servirlo en todo lo ke es menester?

Disho: – Si.

Kuanto entro adientro, se izo del bovo i lo desho el kampo sin arar i sin sembrar.

I siendo ansí, ¿sovre ken se aravya el rey? ¿Sovre akeyos ke disheron: – «No podemos resivirlo»; o sovre el ke lo resivyo i no perkuró de servirlo? Sierto ke toda su ravya es lo mas sovre ken lo aresivio el kampo i no le fue rijendo.

—————————————–

En sierto modo, este supuesto literario guarda relasion kon el numero 20: Los puevlos ke no resivieron la Ley fueron konsekuentes kon su dezision; pero si Israel la akseptó despues de konoserla, deve ser fiel a lo prometido, igual ke el ombre del ekzemplo. Esto viene de Shemot Rabbáh, i folio 201 de la version djudeo-espanyla del M. L. Exsodo ke segimos.

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli