eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
10. EL EMPERADOR MALVADO
Kontan de viezo en un emperador ke era muy malo i estan los djidyos muy angustyados de él, a tanto, ke kada dia rogavan por su muerte para eskapar de sus sentensyas. Kon tiempo, se muryo i enreinó su ijo en su lugar, i salio ke era mas malvado ke su padre, i muy enemigo de djidyos. Un dia estava asentado kon un djidyo ke entrava i salia en su palasio. Le pregunto el rey:
– Kero ke me digas ke tienen los djidyos en su korason por mi.
Disho el djidyo:
– Ke bivas munchos anyos en tu reinado.
Se maraviyo el rey, i disho:
– Pos yo les ize munchos males mas ke mi padre, ¿i komo puede ser ke eyos arogen por mi vida?
Le respondio el djidyo, diziendo:
– Savras ke en vida de tu padre teniamos esta esperansa, a dezir ke muriendo él eskaparemos de males, ke tu seras bueno kon mozotros. Ma siendo en muestra ventura salites tu mas fuerte ke él, por esto rogamos por tu vida, ke ya se ve ke muestra ma’arakah (1) lo kavza ke estamos abatidos. Por esto rogamos ke no mos trayga el Dió en poder de otro rey, ke sierto será mas fuerte ke ti.
——————
(1) Disposición, orden, suerte.
——————————————–
El sinismo del Faraón, impenitente ante la plaga de tábanos, al pedir a los djudios ke arogaran al Dió por él (Ex 8-24), permite al otor sefaradí arecojer esta konseja, tomada de la koleksión Mishkenot Yaacov, i reprodusida en el folio 41 d de la edisión ke se uzo. Ambeza ke, en la vida de la persona, se kere ke los males pazen presto, dunke non sempre sea mijor lo ke le aspera. en sierto modo, guadra relasión kon la afortunada fávula de las ranas pidiendo rey, ke aparese en los otores klásicos i modernos del djénero (Esopo, Fedro, el Arcipreste de Hita, La Fontaine i Samaniego)
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli
