“Antolojía de Kuentos Sefaradíes” de Pascual Pascual Recuero – Kapítolo II – Kuentos de Magriso: 42. LA BOTA DE VINO por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

42. LA BOTA DE VINO

Unos yevadores de karga yavavan una vota de vino de un lugar a otro. En lo ke la yevavan, kijeron arepozar un poko. La armaron la bota en la kaye debasho de un kanal ke kore del tejado. Se aparesio un demonio i les rompio la bota. Se fueron los dichos kargadores a djusgo de Rabi delantre de Mar Bar Rav ‘Ashi, i le kontaron lo akontesido. Vino dicho haham i kitó servidor, i lo enjeremó a el demonio por lo ke rompio la bota. Vino el demonio delantre del haham. Le disho el dicho haham a el demonio:

– ¿Porke rompites la bota?

Le respondio el dicho demonio, diziendo:

– Lo ke la rompi fue porke arimaron la bota enriva de la oreja, ke estava yo ayi durmiendo en akel lugar en akea ora.

Le disho el dicho haham:

– I tu ¿ke bushkavas a echarte a dormir en medio de la kaye, ke es lugar de kaminantes? I siendo tu izites yero de echarte a dormir en lugar ke pasan djente, eyos no tienen ninguna kulppa en lo ke arimaron la bota en akel lugar. I siendo ansi, eres ovligado de pagarles la bota ke rompites.

Le disho el demonio:

– Siendo ansi, dame unos kuantos dias de tiempo. Pasó el tiempo ke le disho el haham i no vino el demonio. Kuando ya vino el demonio para pagarle, le disho el haham al demonio:

– ¿Por ke pasates del tiempo ke te ataksé i no vinites en su tiempo?

Le disho el demonio:

– Savras senyor, ke toda la koza esta atada i seuada, o mezurada o kontada, no tenemos lisensya de tokar ni podestar en eya asta ke topamos una koza ke no esta kon algunas de estas; i por esto tadré de venir a pagar, por no topar presto una koza suelta.

—————————————–

Segun la tradision rabinika,la komanda del Dió a Moshe, al empesijo del livro de Numeros, para ke aga senso de todos los israelitas ombres mayores de vente anyos (Nm 1-2), enkonve a la proteksion de su puevlo ante los peligros del dezierto i la estima en ke le tenia, porke lo disperso se toma komo despresiado. Tomando del tratado Hullim i de RAshi, Magriso lo metio en su komentario para el M. L. Bamidbar (4ten edision, Esmirna 1867, folio 3 a.b)

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.