eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
52. KUANDO SHELOMÓ ABASHÓ DE SU REYNADO
En tiempo ke abashó el Rey Shelomó de su reinado, iva demandando tzedaká por las puertas para mantenerse. I enkontró kon un ombre, i lo konosió akel ombre komo era el Rey Shelomó el ke iva demandando tzedaká. Lo tomó akel ombre a Shelomo i lo yevó a su kaza, i le izo un konvite de muncha komida i de muncha bevida; i entre medio de la komida ke le izo, le empesó a enmentar kozas de ru reynado, diziendole:
– ¿Te akodras, senyor, lo ke izites kuando eras rey tal dia, i lo ke izites tal dia?
Siendo le empesó a enmentar kozas de su reynado akel ombre, empesó a yorar Shelomó de akodrarse de su reynado, asta ke no pudo komer. I se alevantó de ayi kon yoro, i se fue por la kaye. A la manyana, enkontró kon otro ombre, i lo konosió komo era el Rey Shelomó, i le disho:
– Senyor: Kero ke vengas a mi kaza i ke komas kon mí un bokado de komida.
Le disho a él Shelomó:
– ¿Kisás me keres azer komo me izo tu haver?
Le rogó muncho, i lo yevó a su kaza i le disho:
– Savrás, senyor, ke yo so un prove i lo ke tenfo ke komer es una salatika de vedruras. si te plaze, asenta i kome kon mí.
Luego le dio a lavar la kara, i las manos i los pies, i le trusho delantre la salatika ke tenia. I empesó a komer kon el, i lo empesó akel ombre a afalagar a Shelomó, diziendole:
– Mi senyor: No te tomes en kontrario, porke djuramento djuro el Dió, bendicho sea, a tu padre ke no se korte el reynado de su semen (Sal 132-11); sino ke ansí es el rezo de el Dió, ke lo kastiga al ombre, i despues torna i lo afalaga (Pr 3-12). I es aparejado el dió, Bendicho sea, de tornarte a tu reynado.
Siendo ke oyo estas palavras, Shelomó komio i se artó, i estuvo kontente de las palavras de akel ombre ke lo konfortó. I kuando voltó despues de tiempo a su reynado, disho ke mijor fue akeya komida de vedrura ke komio serka de akel prove, kon kererlo amistad i afalagarlo kon palavras, «mijor ke el buey engodrado ke me dio a komer akel ombre, kon enmentarme mi pena i akodrarme el reynado ke tenia, ke esto fue tenerme enemistad» (Pr 15-17).
—————————————–
En el rekonto de las etapas rekorridas por Israel desde Ejipto asta el Iardén, se arekojen todas las penas, mankuras i esforso ke somportaron, en espesial la mankura de agua (Nm 33-14). La anekdota del midrash de Shelomó kuando no reyna akonseja kompadeserse i ser kortés kon el desmazalado. viene esta konseja del Meil Tzedaká, i figura en el folio 157 a del komentario de Magriso al livro de Numeros.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.
