eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
71. EL PRINCHIPE KE MUNCHO KOMÍA
En tiempo avanti avía un rey grande i fuerte. el tuvo un ijo pronto i kumplido en todo modo se sensya; la forma de su puerpo era bien rezia; su facha, klara komo el sol; sus manyas muy buenas; la buendad tenia por vistido; derecho en todos los kavzos. Ma solamente una negra manya tenia de su chikez, ke se le mayorgó sovre él: El dezeo de komer i bever. Esto fue su uzo de kuando el se konosió, ke su komida era un karnero asado o kuzinado en djunto kon sesenta panes. Esto era su komida dos vezes en kada dia, afuera de aves i peshkado, ke estas kozas las komia por avrir su gana. el rey, kuando vido este uzo de su ijo i el negro dezeo de su korason, pensó por matarlo; ma de otra parte se achideó de el mansevo i de su buendad ke él tenia. Ande más ke el mansevo era muncho rekerido en ojos de su puevlo i su kompanya, i, en matandolo, non sea ke le traiga alguna revuelta entre el puevlo i él.
A esta razón, su korasón le konsejó de matar a el ijo; ma porke el puevlo non konsientan, lo izo kon enchenyo, i es kon diziendo ke él tiene idea de enviar a su ijo a las Indias, a la sivdad de Parxa, para tomar a él por mujer a la ija de su tío, el kualo es el rey Arnay; nombe de la ija; Rauma, ermoza komo la luna, klara komo el sol. I le envió kon él kuatriguas i kavayeros i djente armada en djunto kon tropas i modos de kiemanes, ke ansí era el uzo ke lo engleneavan kon el tanyer en la ora ke estava komiendo. I entrego en poder de el mansevo una karta para ke la diera a su tío, serada i bien serada. I esto es lo ke eskrivio adientro la karta:
«Serkano en mis penserios i londje de mis ojos, el kual es el rey fuerte, mi ermano Armay, ke siempre seas sonalsado en tu reinado, amen. ¡Kerido!
«Yo envio a ti a ninyita de mi ojo, el kual es mi ijo, un ombre ke es meresido de alavarlo. El suvió su grado mas de toda la djente de su boy, sea en sensya fisika, sea en la sensya mistika fisika, sea en rejos de sivdad, sea en»la sensya de los sielos para arriva. solamente en su komer es demudado mas de kualunke kriansa: Un karnero entero, afuera de pichones i aves, djunto kon 60 panes i maneras de modos de komidas echas i envueltas kon guevo, esto es u uzo en kada dia dos vezes, un karnero kome la manyana i otro kome la tadre.»
«Rogo, mi ermano, kumple mi velundad en mi demanda ke te vo
«a demandar, i si non me lo azes, sepas ke mi vejes es muncha an-
«syoza i suspiroza. Mi demanda es ke lo mattes i ke non achidees
«a su sensya ke el tiene.
«De tu ermano el amargo i el suspirozo,
‘Avdeel
Despues ke el mansevo se espartió de su padre i eyos se alondjaron kamino de siete dias, kaminando en medio de una montanya alta, el mansevo se asentó por mirar a el rio debasho de la solombra de un árvol plantado serka del rio. en asentándose, el vido una kavesa ke estava nadando; el puerpo, kon la aharvasion ke se vía de la kuala se murio; ma el puerpo, a la razón de su pezgadia ke tiene kon él, pozó a la oriya debasho de este arvol, el kual el mansevo, el ijo de el rey, estava debasho asentado.
El mansevo miró en todos sus miembros i en la forma de todos sus guesos, i entendió ke la garganta es metida, ke de él ke salga la palavra, i ke de el sale ayre i toma ayre; i el esofago es por englutir la komida i por bever todo modo de bevienda. Paro mientes ke la garganta, la hazinura ke tenia kon él ni se menguava ni pushava, kijendo dezir ke si apretava por enriva la garganta, non mankava la hazinura, i si si se apretava adientro del burako de la garganta, non pujava ninguna aviertura. La kontra vido ke el esofago, ke es semejante a la lástika, ke manka i se enkoje i se anchea; lo mezmo es el esofago, ke, si apretas enriva, el aire de lo vazio ke tiene non se tapa, i si metes el dedo dientro, el aire de el esofago lo yeva. El mansevo prevó i vido ke metió un dedo adientro el esofago i lo yevó; metió dos i lo aferó; en korto es fin ke metio su mano entera i entró djunto kon el braso baraber.
Devista el mansevo entendió ke el muncho komer ke él tiene está dekolgado en la mailsya de su negro uzo, ke si dos karneros reiva, se komerá todo. Él pensó i disho en ké verguenza él se tiene ke topar kuando su tio lo va a salir a resivirlo; kon ke gran onor lo va a salir a resivir i kon ke gran alteza lo tiene ke asentar a lado de él; i en ke verguenza se tiene ke topar kuando lo tiene ke yamar para komer, i él non tiene ke deshar ninguna koza en la meza. El se atristó muncho por esta manya i yoró sin kantidad; i ultimo por azer fin a este negro uzo del komer. I devista ke vino ande estavan sus esklavos, yamo a su amigo i le disho ke le trushera a komer delantre de él un karnero ke sea manko del braso i las kishadas; i le enkomendó ke, en pasado un dia o dos, ke kitara de el karnero tambien las pachas i las entranyas. I lo mezmo también le enkomendó de kada dia i dia ke vaya mankando sea de los sesenta panes, sea del karnero, semejante tambien de las gaynas i del peshkado, a fin ke dientro de sesenta dias ya se uzó komo resto de la djente. I el mansevo i su amigo estan muncho alegres i gustozos.
A fin de tres mezes ke eyos salieron de su sivdad, eyos arivaron a el dezierto de Praxa. El ijo del rey apozó frente el rio yamado Tesa, i el rey Arnay salio por resivirlo kon muncho puevlo i kon muncho onor, segun se aze a reyes i dukes; i en viniendo serka de él, el mansevo se abashó de su karosa, el se echó enbasho delantre de su tio todo su boy entero (ansí era el uzo de avanti, ke uno ke via las karas del rey, la onor era ke se espandia entero en basho); i el rey Arnay se abokó un poko, i kon dos sus manos lo alevantó, Kuando el vido el relustror de su facha i el buen ayre ke él tenia, bendisho a el Dió, b.H: «Bendicho el ke en su mundo krio unas figuras ermozas komo esta».
El mansevo metio su mano en su pecho i kito la karta, la kuala estava serada i bien serada. El le dio a su tio en sekretamente; i el, kuando meldó la karta, su facha se le demudó i bafo non kedó a él, mirando la gran mirekía ke tiene su sovrino i ke de siempre fue su amigo.
En viniendo la ora de komer, el rey enkomendó a ke metieran a todos los pashás komidas buenas kada uno segun su onor; i a el mansevo, ijo de su sovrino, ke le metieran en resparte segun la kantidad de su komida, la kuala estava eskrita en la letra ke el tenia en su mano; i el rey i la reina se asentaron a su lado. El mansevo tomó kon el pirón de las komidas i el resto de kozas segun el uzo de los senyores i ombres; i el resto de komida i maneras de savores non kijo komer del todo.
El rey i la reina entendieron ke, siendo se asentaron eyos kon él, de la muncha verguensa, sochiguó por akel punto a su dezeo. I el otro dia enkomendó el rey ke le metieran solamente a el mansevo la kantidad de su komida; i el rey Arnay i su donzea se eskondieron por ver ke va a ser el kavo de esta koza. I despues ke el mansevo komio i bevió, yamó a un pashá de su djente ke le kitaran el pan i las komidas; i el rey i la reina se maraviyaron ke non entendieron i supieron ké es esto. A la noche entró el rey i la senyora a la kámara del mansevo. eyos disheron a él:
-Te rogamos ke mos des a entender i ke mos digas ke modo vino a ti este deuso del komer, ke segun la karta ke trushites kontigo, el modo de el komer ke tu komias era una verguensa para ti i para tu madre, le ke te parió. damos a entender komo sochiguates a tu dezeo por demudar este uzo negro, ke de kuando nasites fina agora estuvites uzado en este modo de komer.
El mansevo les repondio:
-Vos diré, mis senyores: Yo, en partiendo de mi sivdad, topé un matado por el kamino. El me embezó esta sensya.
I les kontó a eyos todo el kuento komo pasó. I el rey i la reina eyos se maraviyaron por la fineza de su agudisya i su sensya; i le dieron a él a su ija, la ermoza i la estimada, por mujer. I fue una alegría grande en la kapitala Praxa, ke este ijo del rey dio una amostrasión ke el meoyo alondja a todas las kozas ke es esprito del ombre dezea; i afilu ke su uzo ya fue kuando salio de la tripa de su madre, kon todo esto el meoyo abandona a todo modo de manya negra.
—————————————–
Grande komentario al pasuk «Vos komió i bevió, i se alegró su korasón» (Rt 3-7) , faktos ke yevan no pokas vezes al pekado. Ansí, el kuento imajinario permete dedusir ke todos los vizios se pueden dominar. Mandado del titolo ebreo «Ayummah» ka-nidgalot (Cnt 6-4, lo enkontrmoas en las pp. 221-224 de la explikasion sefaradí al livro de Rut (Cfr. nota numero 40)
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo V: Kuentos de Meir Benveniste.
