eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
35. EL BEVERAJE DEL MEDIKO
Un médiko ke era haham gadol, se aravyó el rey kon el i enkomendo ke lo metieran en prezo mal aprezado, kon kadenas de fiero en la garganta, i ke lo deznudaran de sus vestidos i ke lovistieran de sako al deredor de sus karnes, i ke le dieran por komida pan de sevadas i un punyado de sal i un djaro de agua kon mizura al dia, i ke lo metieran a la prizion en un lugar estrecho komo la fuersa. I enkomendó el rey djente ke estuvieran a su lado a ke siniteran lo ke avlava. I estuvo munchos dias en la prizion, i demandó el rey por el a la djente ke tenia a su lado. Le disheron su djente:
– Senyor rey: El rav del dia esta kayado, i kuando ya avla dos palabras es kon muncha hohmá.
Despues de dias, enkomendo el rey a sus parientes i a sus amigos ke fueran a prizion para ver si le avlava alguna koza a sus parientes; i ansí izieron. I fueron a la prizion a vijitarlo i le disheron a él:
– Muestro senyor, te estamos mirando kon tanta angustya i tanto mal en tan mala prizion, ke estas kon tantos kastigos ke estas yevando de estar kon tanto pezgo de kadenas en la garganta i en los pies, i estar en el lugar apretado, muerto de ambre i de sed, i mos maraviyamos de ver la kolor de tu kara ke no se demudó i tus karnes ke no se apokaron.
Les disho a eyos:
– Savresh ke me ize un beveraje muy luzyo kon siete modos de drogas adientro i vo beviendo un poko de eyo kada dia; i esto es lo ke me sostuvo asta agora ke no se demudo mi kara ni se aflako mi fuersa.
Le disheron a él su djente:
– Ambezamolo a mozotros este modo de beveraje asigun se aze, ke si, has ve shalom (1), mos akonteserá alguna koza de este modo, para azerlo i no morir.
– Savresh le las siete kozas ke mesklé en el beveraje son estas. Onde la una es tener la segurida en el Dio, Bendisho sea, ke Él es el poderozo i Él me puede eskapar de todos estos males i meterle en le korason del rey ke me kite de esta prizion, siendo el korason del rey esta en mano del Dió. La sigunda droga es de estar kon buena esperansa, ke no ay otra melezina luzya para el ke tiene munchas angustias otro ke estar kon esperansa ke el Dió lo salvara de eyos. La trezera droga ke metí es ke supe ke mis pekados me lo kavzaron esto i por mis pekados es ke fui prendido; i siendo ansi, ¿por ke lo tengo de tomar afuerte, siendo yo me lo kavzé? La kuartena droga es ke, siendo es mando del rey, ¿ke ay en mi mano ke azer? I si komandó él ke muera sin ser mi tiempo de morir, morire. La sinkena droga es ke sierto por mi bien me esta kastigando el Dió para purgar mis pekados en este mundo i tener bien en el otro mundo, asegun dize es pasuk: «Bienaventurado el varon a kien Tú, A. kastigas» (Sal 94-12). I siendo ansí, ¿komo no estare yo gustozo i kontente kon estas penas, siendo ke son por mi bien? La sezena droga es ke estó yo alegre i dando loores a el Dió por estas penas, ke podia ser ke eran unos kastigos mas fuertes ke no los podia somportar; ke si agora me dan pan de sevadas, podia ser ke enkomendava ke no me dieran nada; i si agora me dan agua kon mizura, podia ser ke enkomendava ke no me dieran del todo agua; i si agora esto vestido kon sako, podia ser ke me dejavan del todo deznudo; i podia enkomendar ke me dieran mas fuertes kastigos, ke venia a dezear la pasada de agora; i siendo ansí, ‘komo no dare loores a el Dió por la pasada de agora a ke no me traiga el Dió en mas negro ke esto? La setena droga es ke sé ke el Dió es poderozo i se arepiende del mal, i la salvasyon de el Dió es en avrir i serra ojo, i aspero ke presto me apiadara el Dió i me eskapara de estas angustyas. I teniendo yo este beveraje de estas drogas luzyas ke bevo kada dia, ¿komo keresh ke me aflake i me se demude la kolor de la kara?
I oyendo el rey todos estos dichos luzyos del mediko, kon tanta hohmá i kon tanta pasensia ke estava de no avlar una avla en kontra del rey i no kesharse de los kastigos ke estava yevando, sino ke los resivio kon alegria por ekspiasion de los pekados, luego envio el rey i lo kito de la prizion, i le emprezento su kulpa i lo suvio en muncha grandeza mas de lo ke estava antes.
Ke de esto tome preva i kastigerio el ken es temiente de el Dió i aresiva los kastigos kon alegria, i ke sepa ke todo es por su bien para serlo digno de mundo en viniente, Olam Habá, i ke no se aleje de eyos.
(1) Literalmente abstención y paz: ¡Dios nos libre!
—————————————–
Kuando la muerte de sus ijos «Aron kayó» (Lv 10-3) kon akto de resignasion rekomendavle en los malos momentos. El fakto, tomado de Péreq Yesh Nohalin, se arekoje en el folio 39 d-b del komentario en ladino echo por Isaak Magriso, i se va a repetir otruna vez en el de Issak Arugeti para el M. L. Dvarim (Izmir 1873, folios 159 d-160 b.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.
