“Antolojía de Kuentos Sefaradíes” de Pascual Pascual Recuero – Kapítolo II – Kuentos de Magriso: 29. EL APARESIDO por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

29. EL APARESIDO

Era un hasid ke no savia meldar mas ke pasuk solo, i muerto dicho hasid kon buen vejez. Despues de trenta dias ke murio el hasid, le vino en suenyos a otro hasid ke avia en la sivdad i se le aparesyo kon su mortaja asegun lo enteraron, i kon un livriko chiko en la mano. Le demando el hasid vivo a el muerto, i le disho:

– Tu no eres el fulano ke enteremos tal dia?

Le disho a el:

– Yo so.

Le tornó a demandar el dicho hasid:

– Dime, ¿ke es este livriko ke tienes en la mano?

Le disho a el:

– Este livriko es de Tehilim. I te vine a darte a saver ke vos ferash de esta sivdad, porke tiene de venir muncho mal. I todo tiempo ke estuve vivo yo i meldava el sefer Tehilim entero kada semana, se sostuvo la sivdad por este zajut asta agora; i agora ke deskanse yo, no ay ken mampare sovre eyos.

Kuando se desperto el dicho hasid de manyana, les envio avizo a la djente de la sivdad de lo ke vido entre suenyos, i los akavido ke miraran de eskapar sus almas. I ovieron djente ke no izieron kavdal del suenyo, i kedaron en la sivdad i yevaron su mal anyo; i los ke eran temientes del Dió i oyeron las palavras del hasid, eskaparon i salieron en paz sin ningun mal.

—————————————–

A proposito de la piadoza kostumvre entre algunos djudios de meldar kadal’dia los sinko livros de los Salmos durante los kuarenta dias ke median entre el primero de Elul asta Kipur, viene esta konseja milagroza, komo komentario al pasaje final de Ex. 34, ke avla del velo kon ke Moshe tapava su kara al tornar de avlar kon el Dió. Sin aklarar el manadero ebreo de ande fue tomado, lo tomamos del folio 91 b-c de la mizma ovra sefaradí del punto de antes, ande se remarka la bueno de la piedad.

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.