eSefarad Noticias del Mundo Sefaradi
Unos penserios sovre el Ir aKodesh, la Sivdad del Santuvario, en la mente djudia populara.
Para los Djudios, Yerushalayim no es solamente el foko fikso (a lo manko en los ultimos tres mil anyos) de sus vida espirituala, o la kapitala del Reinado bibliko de Israel (kapitala en la kuala akapitaron los kapitulos mas gloriozos de la istoria sagrada i mundana del puevlo de Israel), sino ke tambien El Ombligo del mundo mundial.
Sigun la tradision djudia populara, el Santo bindicho El kito al Mundo de la inegzistensia detiniendo al primer-kriado grano del polvo djustamente por el punto el kual, en el avenir, dezvalopara a ser Yerushalayim. Sale, demek, ke Yerushalayim es komo una Impresa Dijitala Divina en muestra planeta. Algo paresido a la firma del artista en su ovra. Saviendo esto, no es de maraviyarse muncho ke la mente djudia populara koloka tanto a la Kreasion del Ser Umano djustamente al espasio konsagrado del Ar aBayit. Nombramente, del mizmo akel punto del kual el futuro Yeushalayim se incho i se unflo, asta ke no se fizo la Balota de la Tiera, tomo el Santo binicho El al polvo del kual los formo a Adam arishon i a Hava imenu. Sale ke tanto el Mundo mundial, mizmo komo el Ombre komo tal, los dos son “meyd in Yerushalayim”.
Yerushalayim es el DNA de La Kreasion. Todo fue kreado del polvo yerushamli. Todo proviene de Yerushalayim i todo retorna a Yerushalayim.
A ke me refero? Sigun la kreensia djudia populara, ninguna tefilla, afilu ninguna invokasion de la Divinita (tala komo “El Dio moz de” o “No mos de el Dio”) no asuve a los sielos dezde kualseker Nyuyorkeziko o Moskvita, Pekingiko o Briseliko. Yok, djanum! Kada tefila i tefila i kada invokasion i invokasion prima deven viajar orizontalmene a Yerushalayim, para poder suvir de aki a los altos sielos vertikalmente. I todo esto por ke? Porke Yerushalayim es el Shar aShamayim, la Puerta de los Sielos, Bab il Sama. El solo lugar pore el kual pasa el kontakto kon El ke disho i fue el Mundo.
En munchas lenguas el ombre de Yerushalayim se traduse komo la Sivda de la Paz. Ama esto es djusto en kuanto al nombre viejo i bijejo de Yerushalem, la sivda en la kuala maestro padre Avraam dio maaser al Malhisedek. Rey de Shalem. Ama ay milenios ke en leshon akodesh el nombre de esta sivdad aparese en dual: Yerushalayim, kere dizir dos Yerushalemes (komo todas las kozas ke vienen en par: sea yadayim o raglayim, sea enayim o oznayim). I ken es el par de Yerushalem? El par de Yerushalem de abasho es el Yerushalem de ariva, Kiryat Meleh Rav, la sivdad del Rey de los Reyes, el Santo bindicho El.
El Yerushalayim de ariva se topa djusto por ensima de Yerushalayim de abasho. Por esto, las tefilot vienen primeramente a Yerushalayim terestrial, para poder suvir dezde aki a Yerushalayim selestial.
Kuando el Dio, baruh U, kijo ambezar a Avraam Avinu sovre la diferensia entre el Dio ke invento al ombre, de una vanda, i los diozes ke fueron ivnetados por el ombre, de la otra; lo tento komportandose por un momento komo estos ultimos, demandando lo ke demandan eyos: un sakrifisio umano. Sigun la tradision djudia, el bueno de muestro padre Avraam akudio a la enkomendansa divina, atando a su fijo kisto, a muestro Padre Isak, para lo ofreser.
I onde lo ato? En San Petesburg? En Vashington? En Londra o en Shkodra? Yok, efendisi benum, lo ato sovre el Even aShetiya, sovre el Temel del Mundo, sovre la roka ke inche la boka del Abizmo. Sovre la piedra ke se topa en el punto del kual se dezvalopo el Mundo i del kual fue tomado el polvo del kual fueron kreados Adam i Hava. Sovre la piedra sovre la kuala estava pozado el Aron aBerit, tanto en el Primer komo en el Segundo Santuvario, i sovre la kuala estara pozado el Aron de muevo fayado kuando se fraguara el Treser Santuvario.
En este lugar Santo ande se erekto el primer Ser Umano, se erekto tanto una mueva fe, umana, sigun la kuala el Santo bindicho El le disho a Avraam a dezatar al Atado (atando kon esta piedad a la posteria del Atado por eternidad por Su lado). En este lugar aparejo el Rey David a la Fragua i su fijo Salamon la eskapo.
Ama, baavonotenu, en el anyo 587 antes de la era kristiana, uno de estos imperios ke siempre van alevantandosen i oprimiendo djentes i puevlos, deroko al Primer Santuvario; ama ma, el bueno de Ezra i el bueno de Nehemya, kon el apoyo del Prezidente Tramp de sus tiempo fraguaron en el mizmo lugar al Segundo Santuvario.
Unos mil i novisientos i sinkuenta anyos atras, otrun imperio deroko tanto al Sigundo Santuvario. Ama ma? Los mizmos profetas ke mos akavidaron profetizando al Sigundo Derokamiento, tambien mos afalagaron profetizando el Treser Fraguamiento, en su lugar propio, djusto basho el Kodesh selestial.
Por todo lo dicho, todas las esnogas del mundo mundial enfrentan a Yerushalem terestrial.
I el Yerushalem terestrial enfrenta al Yerushalem selestial.
Las dos, realmente konfazen una sola sivdad, ke mozotros la yamamos Yerushalayim, la doble sivdad de paz.
Buen dia de Yerushalayim buenos Djudios!
Dr. Eliezer Papo
Prezidente de la ANL
