eSefarad Noticias del Mundo Sefaradi
Keridos amigos i amigas
Aze dias ke se avla del dia ke el ombre metio los pies en la luna. Se izo mismo un filmo de esto en el aniversario de 50 anyos. El artikolo sigiente salio en el Daily Telegraph de oy. Venia de azer mi primer viaje komo uno lavorando en una kompanyia aerea en 1969 i vide en el EXPO de Osaka la piedra ke trusheros de la luna. Tenia 32 anyos en el tiempo i no puedo kreer ke 50 anyos pasaron desde este tiempo.
Saludes a todos.
——————————————————————————-
Komandante Neil A. Armstrong, Komandante Piloto Modulo Michael Collins i Piloto Modulo Lunar Edwin E. Aldrin Jr. 1 mayo, 1969.
Tomo 400.000 personas para yevar al «Apollo 11» a la luna kon «Neil Armstrong i Buzz Aldrin» 50 anyos antes. Era una fuersa a traves los Estados Unidos ke inkluía injenieros, sientistos, mekanikos, teknisianos, pilotes, shoferes, sekretarios i otros lavorando detras la eshena. En medio de las kamizas blankas i kravatas pretas en NASA en el lugar de ande se lansava Apollo II, estava asentada «Joann Morgan» komo la primera mujer en kontrol, en 16 Julio 1969. No fue tan fasil para yegar a esto. Morgan tiene oy 78 anyos i lavora en NASA desde 1958. En el tiempo se iva al kolejio i un ombre tuvo ke remplasarla. Tenia la impresion de resivir yamadas insultantes en la meza de Kennedy Space Centre. La situasion era peor en la puerta al lado en ‘Cape Canaveral Air Force». Avia solamente una tualeta de ombres i Morgan tuvo ke korrer siempre a un otro edifisio para topar la tualeta de mujeres. Estas kozas se ven en el filmo ke es titulado «Hidden Figures». A la fin eya fue akseptada por 99% del personel. Apollo II se preparava para ir al espasio en 09.32 de la manyana i Morgan estava monitorando los instrumentos del suelo. Kon Armstrong, Aldrin i Michael Collins al bodre su echo era terminado. Morgan kon su marido partieron en vakasiones i vieron en 20 Julio al Apollo abashar en la luna, en la television del otel. El marido le disho: «Honey, te toparan en los livros de istoria»
Morgan iva ser la primera mujer senior egzekutiva en «Kennedy» i eya enkoraja a las mujeres de azer estudios de injeniería.
En medio de la mision de Apollo 11 estava «Spencer Gardner» kon su ombre a la derecha «Gene Kranz» direktor del vuelo. Gardner tenia apenas 26 anyos kuando «Eagle Lunar’ se asentó en «Sea of Tranquility» en la luna, kon Armstrong i Aldrin, en 20 Julio 1969. Esta mision puedia ser anulada. Ke se pasaría entonses? Todo lo ke estava abasho tenia ke ser trokado. Gardner tuvo ke antisiparlo de antes i tener un plano. Una vez ke Eagle aterrisó se fue a la kaza de su amigo i todos estavan asentados alderedor de la television para ver «El paso chiko tomado ke era un paso grande para la umanidad. Gardner no estava en servisio asta 24 Julio kuando Apollo fue echado a la mar. Se fue a «Mission Control» al lado de sus kamaradas ke tenian en las manos bandieras i estavan fumando el sigarro. Ansi el viaje termino en el Pacifico. Gardner lavoro en 5 otras misiones. Despues estudio leyes en una eskola de noche. Desho NASA en 1974 i se izo «Asistant District Attorney». Oy en dia praktika leyes en Houston a la edad de 76 anyos.
Clancy Hatleberg tenia 25 anyos despues de azer un torno en Vietnam. Era uno de los 4 «Frogmen» saltando del helikóptero a la mar kon vestidos protektivos.Avrio la kuvierta del kapsul i echo un sako de 3 vestidos a las astronautas. Salieron afuera en kostumes kolor gri i eyos le dieron la mano, koza ke no entrava en el protokol. Malgrado esto les tomo la mano. Despues de meter una solusion sovre eyos kontra los mikrobes del espasio los yevaron a USS HORNETT ande se topava la Kaza de Karantina. El Presidente Richard Nixon vino ayi para resivirlos. Lo ke kedava del vehíkulo en la mar todo fue enterrado basho de las aguas. Kuando se mira atras eyos avian kumplido muncho. Fueron eyos ke metieron sus vidas en peligro i ivan a ser por siempre eroes. Halteberg tiene oy 75 anyos.
Trezladado por Shimon Geron.
Sydney, Australia
Fuente: Ladinokomunita
