eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.
Jorge Mehaudy
(Buenos Aires, Argentina)
Jorge Mehaudy nasió en Buenos Aires, es un autor de sukseso, kreador de espektaklos i kompozitor de kantigas para kriaturas entre las kuala sovresalen «El Show de los chikos enamorados» i el «Disko de los chikos enamorados», djuntos a María Rosa Yorio i Elsa Bornemann. Es autor de programas de televizión komo «Supermingo», muzikó ovras de teatro i partesipó al movimiento de «Fusión Folclórika Argentina» kon su CD «Gente Así». La orijín sefaradía de su famiya – del Maroko su padre i de Turkía su madre – lo empushan a entrar en la múzika étnika, rezgatando la freskor de ritmos i melodías orijinales sefaradías, i renovándolas kon una estétika aktual. Jorge kanta en djudeo-espanyol i en haketía. Su kantiga «Blanka i blanka» kon las palavras de Beatriz Mazlíah, arivó a la final del Festiladino 2006 en Yerushaláyim.
En el 2008 él lansó su CD «Sefarad, Kantes i Tanyeres». En 2009 él estrena su programa unipersonal «De Tetuán i Estanbol», ande kanta ermozas kantigas del repertorio sefaradí, i avla de los momentos mas salientes de su kultura. Su sukseso lo yeva a prezentarse en diversos senarios, los mas sovresalientes de los kualos son: el Acto Sentral del Día del Idiona Espanyol en la Feria del Libro, organizado por la Academia Argentina de la Lengua; El akto sentral en el primer enkontro de «Entitades Sefaradíes» realizado en Santa Fé; la partensia del Embasador de Israel en Argentina, Rafael Eldad. El jurnal «El Oeste» en su edisión del día de la 
prezentasión de su CD en el 2008 eskrivió: «Patrón de una boz potente, Jorge Mehaudy provokó emosiones i arrankó serrados aplauzos en el djudisio mas presiozo: el de sus propios paizanos».
El revitalizó i infundió mueva vida a kantigas «A la una yo nasí» i «Buenas semana», «Bre Sarika», «Tres ermanikas», «En el kafé d`amaneser», endjuntos a su kantiga «Blanka i blanka».
