eSefarad Noticias del Mundo Sefaradi
La Seremonia de aviertura de la 17en Kongreso de Estudios Djudeo-espanyoles tuvo lugar ayer la tadre, en el Sentro Wohl, de la Universidad Bar Ilan, kon la kolaborasion de la University College Londra i el CSIC – Consejo Superior de Investigaciones Cientificas, Madrid.
Una muchidumbre de djente ke vinieron de todas las partes del paiz, incheron la grande sala de una pared a la otra. Los bezos i abrasos de amigos ke no se vieron largo tiempo, i los enkontros kon los musafires de onor ke yegaron a este evenimiento era koza de ver.
La emosion mesklada kon la alegria krearon un ambiente de fiesta i de kalor, ke se puede konsentir solamente al seno de los sefaradis.. esta es una de muestras kalidades..
A este kongreso estan partisipando los mas eminentes investigadores de diversos paizes del mundo i entre eyos Prof. Elena Romero, Dr. Paloma Diaz-Mas de Espanya; Dr. Hilary Pomeroy,Ingletierra; Dr. Michael Studemund Halevy, Almanya, i Karen Gershon, Turkia, ke pokos mezes atras fue galardonada kon el titolo de «Chevalier dans l’Ordre des Arts et Lettres».
La tadrada fue avierta por el Prezidente de la Universidad Bar Ilan, Prof. Moshe Kave, ke fue segido por el Sr. Selim Salti, Fondador del Sentro Yeoshua i Naime Salti, para los Estudios del Ladino i su Kultura.
Tomaron la palavra Dr. Hilary Pomeroy, University College, i la Prof. Elena Romero. CSIC, ke saludaron al publiko i eksprimaron sus agradesimiento al Sr. Selim Salti i a su dama, la Sra. Naime Salti, por los alkanses a los kualos yego sus Sentro, en el kual, diezenas de estudiantes, estan investigando la kultura djudeo-espanyola, en todos sus ramos i aspektos.
El Prof. Shmuel Refael, Direktor del Sentro fue el ultimo a tomar la palavra, en esta primera parte de la tadrada.
La konferensia de aviertura fue dada por el Prof. Moshe Orfali, intitulada «Parafrazeando el Pentateuco en djudeo-espanyol: djugos de palavras, ritos i kustumbres» ke dediko a la memoria de Cynthia Crews.
La parte ofisila de la tadre se termino kon un konserto de kantes djudeo-espanyoles i espanyoles por la kantadera Silvia Kigel i su orchestra alegrando al publiko ke en algunos de los kantes se djunto a eya.
Este evenimiento muy esmoviente i muy importante sea para la Universidad Bar Ilan i sea para muestra kultura se termino kon un riko kokteyl.
Los moderadores de la tadrada fueron Ayala Schwartz i Eliad Koen, ke kumplieron sus mision kon muncho hen, i no menos, avlando en tres lenguas: ebreo, ladino i inglez.
Munchas grasias al Sentro Salti i a su fondador Selim Salti i su dama Naime, ke todos los elojios ke les fueron atribuyidos anoche los meresen i un poko mas.
Reportado para Ladinokomunita
Zelda Ovadia – Yerushalayim
Fotos de Yehuda Hatsvi – Tel Aviv
