eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.
Lolik
(Givat Shmuel, Israel, 1939)
Lolik Levi nasió en Givat Shmuel en el 1939, i es uno de los trubadures del kanto djudió. Dezde mas de 40 ayos él tiene una karriera yena de kantigas ermozas, ke no apartienen a dinguna moda. Lolik i su gitarra son una koza sola indivizable dezde el tiempo de la «Laakat Pikud Atzafón», atraverso las poezías de García Lorca i de Leah Goldberg, las komedias muzikales «Ish hasid ayá» i «Nesiyá medumá», las romansas en ladino, i munchas otras kantigas, ke se izieron klásikas en el kanto djudió. Kuando era miembro de la «Laakat Pikud Atzafón» kon Beny Berman i Tzadok Savir fue la boz de los dos primeros albomes del grupo. Lolik es ermano del aktor i kantante Oshik Levi. En el 1958 él kantó «Ayir alevaná», kantiga eskrita para el kurtometraje 
de Adam Grinberg «Yom valayla be-Tel-Aviv» (Día i noche en Tel-Aviv). Un anyo después enrejistró su primer disko en la kompanía «Hed Artzí», ande sovresalió la kantiga «Zemer Amalah aitalkí». Al prinsipio del 1960 él enrejistró un albom entero de las poezías de poeta espanyol García Lorca, de Arié Levanón i de Paco Ibañes, traduizidos por Refael Eliaz. En el 1968 se adjuntó al grupo muzikal «Ish hasid ayá», ke interpretó kantes de la tradisión djudía antika i moderna. La reprezentasión ke fue produizida por el teatro «Bimot» tuvo un sukseso enorme onde el públiko sea djoven i sea adulto. Dos kantigas a solo de Lolik «Mihtav larabi» (Letra al rabino) i «Zemer layain» (Kante al vino) fueron entre las kantigas mas sovresalientes de la nochada. Al prinsipio de los anyos `70 se adjuntó a la nochada de kantes de Leah Goldberg «Nesiá Medumá» (Viaje imajinario). Entre los anyos `70-`80 Lolik moró al estranjero i aparesió en varios lugares. En el 1980 enrejistró komo djesta enverso sus djenitores el albom de romansas i kantigas en ladino «La roza enflorese». En el 1998 el enrejistró un albom, ande arrekojó sus mijores kantes, para komemorar los 40 anyos de su karriera.
