Las Notas de Matilda – Kantadores de la tradisión djudeo-espanyola: Judith Cohen

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Judith Cohen
Kantadera i muzikologa
(Toronto, Canada)
 

Dr .Judith Cohen PHD, kantadera i muzikologa espesializada tanto en múzika medieval komo en kantigas djudeo-espanyolas, ke eya prezenta en avlas i resitales ke están bazados sovre las tradisiones ke eya está envestigando.
 
Su prezentasión  de las kansiones ke se ambezó de los kazales espanyoles i portugezes, en el Canadá fransés o de  los diversos grupos étnikos urbanos kanadezos, es  dinámika i komprensible.
 
Eya enterpreta kantigas de la tradisión sefaradía de Turkía, Gresia, los Balkanes i  Maroko, de las rejiones kripto-djudías i de Espanya-Portugal, kon arranjamientos propios.
 
De la Edad Media eya intepreta las kompozisiones de los trubadures espanyoles i fransezes entrelasados, endjuntos a temas komunes. Eya se apasiona en el mizmo tiempo al repertorio balkániko,yidish i anglo-amerikano, i al romansero pan-evropeo.

Se akompanya kon la viola de arko medieval, el ut árabo i las perkusiones árabas i portugezas,  el dulsimer amerikano, i otros enstrumentos muzikales. Su ija Tamar Ilana Cohen Adam, nasida en el 1986, aparese kon eya en kanto i perkusión, i estudia flamenko i violino. Judith Cohen fondó el grupo muzikal sefaradí-marokano «Jerineldo», i dirijó el grupo «Nova Tradisiya», espesializado en kantes tradisionales balkanikos, i el grupo de mujeres «Na Carenza», espesializado en múzika medieval.

A eya se deve también la kreasión de varios programas multikulturales i medievales para djóvenes. Fue prezidente del 1993 al 1997 de la Canadian Society for Musical Traditions i dio lisiones de etnomuzikolojía i múzika medieval en la Universidad «York» en Toronto. Es la responsable de la Seria Espanya en la grande koleksión de CDs del lejendario muzikologo Alan Lomax.

En su tezina doktoral eya estudió las mujeres i la múzika en las tres komunitás monoteístas – kristiana, djudía i muzulmana de la Espanya medieval. En su teza doktoral (1989)  analizó las kantigas ke arrekojó i kontinúa a arrekojer en las famiyas sefaradías. 
 
Judith aparese sola  o kon su ija i/o kon varios muzisianos envitados. Sus programas pueden inkluyir kantigas djudeo-espanyolas ke se ambezó direktamete en las komunitás sefaradías en varios paízes del mundo, i kanta en estil tradisional, a kapela o kon instrumentos a kuedra i a perkusión.  
 
Eya prezenta en sus programas kansiones, estiles de kantar, i también bayles de los paízes balkánikos, temas de los kazales de varias rejiones de Portugal i Espanya, chansons-a repondre i romansas de Quebec, i otras rejiones del Canadá frankofón, kompozisiones de los trubadures de la Edad Media, en gaéliko-portugez, katalán, latin o oksitano. Eya prezenta además mesklas: una romansa en versión sefaradí, en versión yidish, eskoseza i italiana, i da programas para ninyos, adolesientes o ansianos.