eSefarad Noticias del Mundo Sefaradi
Keridos amigos amigas.
AJN Staff presento en el Jewish News de esta semana un artikolo sovre «Matti Caspi» ke kontribuyo muncho a la Musica de Israel. El viene de murir a la fin de la semana en una batalya kon kanser. Desho atras a su mujer Raquel i sus 4 kriaturas.
El prolifiko artisto kreo serka de 1000 kansiones en dekadas de su karriera ke inkluiye «Brit Olam, Eh Ze She Kohav, Hine Hine, Lo Yadati She Telchi Mimeni, Shir Ha Yona». Komo Judio i Israeli, Caspi estava muy konektado a su publiko i kuando desvelopo metastases de kanser en Mayo, informo a sus segidores en sosial media ke iva kanselar su performansia i tomar kudiado de su salud.
En mismo tiempo venia de kompletar un fondo de 1.5 miliones de Dolares en el experimento del trato ke no estava inkluido en el Sistem de Salud en Israel. Disho ke lucharia kon toda su fuersa, ma estava al punto de no tener fuersas para djugar el piano i la gitarra.
Su famiya anunsio su muerte en Alhad diziendo «Kon un korason duro i tristeza profunda anunsiamos la muerte de mi maridoת kerido i padre de muestras kriaturas». La luz en muestras vidas partio. Ma su amor i lavoro kreativo se kedan atras por siempre».
Nasido en 1949 en Kibutz Hanita, Caspi fondo su primera banda kon el trio «Gadi Oran i Yaakov Noy» djusto dias despues de ser deskargado de la armada. Su karriera musikal empeso kuando resivio una yamada de «Arik Einstein» Israeli Rock Music» i a traves su karriera Caspi lavoro kon munchos artistos i tuvo una kolaborasion kon «Leonard Cohen» en tiempo de la Gerra Yom Kipur en 1973. Kuando el kantante Canadiano vino a Israel el se metio kon el en la gitarra performando por las tropas en Sinai i kantando la kantika «Like a Bird on a Wire Next to a Landing Strip» A la fin Cohen i Caspi se metieron en kamiones yevando a los soldados feridos a los helikopteros. Fue esto el empesijo de unas dekadas prolifikas.
Caspi era ombre de Renaissance Musical i un Harmonisto ke reverava la Tradision de Folk Music de Israel i tenia tambien la kapasidad de krear komplex kompozisiones muzikales relatadas a la kultura de Israel. Amava su lugar de nasimiento de Hanita al Oeste de la Galilea. Se veyia komo una kriatura oroza, kantando i baylando. Siendo introdusido a «Shmuel Gogol» un muzisiano Israeli nasido en Polonya ke djugava la harmonika, fondo el «Ramat Gan Harmonica Band» performando serka del Kibutz de Caspi.
El fue kometido a la komunidad toda su vida. En 2014 en la «Operation Protective Edge» en Gaza, Caspi manejo abasho al sud performando a las komunidades en sus kamaretas de seguridad. En Desembre 2023 él i Shalom Hanoch devuaron un album a Guy [I]ouz ke fue tomado komo rehen por Hamas en 7 Oktobre 2023 i matado en kaptividad.
Caspi kontinuo a performar i azer tures asta Junio 2025 kuando se paralizo kon el kanser. El Presidente Herzog disho ke fuimos deshados kon maestros de lavoro i melodias grasiozas dandolas vida eterna, kon las kompozisiones ke dieron forma a la muzika de Israel i a muestras vidas en presente i ke kontinuara a akompanyar al mundo por jenerasiones.
SALUDES A TODOS
Fuente: Ladinokomunita
