eSefarad Noticias del Mundo Sefaradi
Munchos pensan ke Miguel de Cervantes, el autor del Don Kishot, era en realidad un «konverso» o desendiente de konversos, ke mizmo si no era kripto-djudio i no bushkava a kumplir en sekreto los mandamientos de la relijion djudia, konosia bien los prinsipales elementos de esta relijion. Ay tambien ken afirma ke el Don Kishot es en realidad una prova de Cervantes de ekspresar su opozision a aspektos negativos de la sosiedad espanyola de entonses komo la Inkizision, las sospechas de los kristianos viejos enverso los kristianos muevos, la doble vida ke estos ultimos eran ovligados a bivir i sus propias sufriensas frente al ovligo kontinual en el kual se topavan, de provar la «pureza de sus sangre», ke no tenian «mancha» en la istoria de sus famiya (es por esto ke yamo a su eroe Don Kishot de la Mancha?)
Una mueva kontribusion al debate ke se esta kontinuando a este sujeto es el livro Una página del Talmud en el Quijote ke mos fue embiado por su autor, el lisensiado Bernardo Baruh de San Jose en Costa Rica.
Al sentro de este livro se topa una konferensia en la kuala el Sr. Baruh eksplika komo, meldando de muevo el Don Kishot, en el kuadro de sus estudios universitarios, «le kayo la pezeta» sigun la ekspresion populara, o sea se le avrieron los ojos i vido la grande semejansa entre uno de los kuentos en este livro i un kuento del Talmud ke el estudio kuando era ainda djoven.
Tenemos aki, adjusta el, una transkripsion kaje literala del kuento sovre un djuzgo entre dos djudios, trezladado al djuzgo ke izo Sancho Panza komo Governador de la Izla Barataria. I para apoyar esta konkluzion suya el traye la fotokopia de la pajina del Talmud (Gemara Nedarim), paj. 25 de una edision de Praga, al lado de una fotokopia de la pajina del Don Kishot onde se topa este kuento.(Pag. 652 de la Edicion Pareja, Barcelona 1981).
Para ke el kuento pueda ser mijor entendido adjustaremos ke se trata aki de un viejo ke empresto a un otro 10 eskudos de oro, ma kuando vino la ora de darselos atras, el devdor refuzo i los dos yegaron al djuzgo.
A kontinuasion damos agora en djudeo-espanyol, el segito del kuento tal ke es kontado, en espanyol, en el Don Kishot:
…komo el no me pagava (dize el ke empresto) se los demandi munchas vezes i no solamente no me los da atras, ma nyega i dize ke nunka le empresti estos diez eskudos i ke si se los empresti, ya me los dio atras. Dezearia ke vuestra mersed lo aga djurar, i si djura ke me los dio atras, yo se los perdono para aki i para delantre del Dio.
– Ke dizish vozotros a esto, buen viejo del baston – disho Sancho.
A lo ke el viejo disho:
-Yo sinyor, konfeso ke me los empresto. Bashe vuestra mersed esta vara; i siendo ke el kere ke djure, djurare komo se los di atras i se los pagi real i verdaderamente.
Abasho el governador la vara, i entremientres el viejo del baston dio su baston al otro viejo, ke se lo tenga en lo ke djurava, komo si le embarasava muncho. Despues metio la mano sovre la kruz de la vara, diziendo ke era verdad ke le avian emprestado akeyos diez eskudos ke le demandavan, ma ke el ya se los avia dado atras de su mano a la suya.
Viendo esto el gran governador demando del ke avia emprestado, ke respondia a estas palavras de su kontrario, i disho este ke sin ninguna duda su devdor devia dizir verdad, porke lo konsiderava komo ombre de bien i buen kristiano, i ke el devia averse olvidado komo i kuando se los avian dado atras, i ke de ayi en adelantre no demandaria nunka nada.
Torno el devdor a tomar su baston i abashando la kavesa salio del djuzgo. Viendo lo kual Sancho, ke sin mas ni mas se iva i viendo tambien la pasensia del demandante, inklino la kavesa sovre el pecho, i metiendose el indise de la mano derecha sovre las sejas i la nariz, estuvo komo pensativo un kurto tiempo i despues alevanto la kavesa i mando ke le yamen atras al viejo del baston ke se avia ido. Se lo trusheron i Sancho le disho:
-Dadme, buen viejo, este baston, ke lo tengo de menester.
-De muy buena gana- respondio el viejo- aki esto, senyor.
I se lo metio en la mano. Sancho lo tomo i dandolo al otro viejo disho:
-Anda kon el Dio, ke ya estas pagado.
-Yo senyor? – respondio el viejo – Es ke esta kanya vieja vale diez eskudos de oro?
-Si – disho el governador – o sino, yo se el mas bovo del mundo. I agora se vera si tengo meoyo para governar todo un reyno. I mando ke ayi delantre de todos rompan i avran la kanya. Esto fue echo i en su korason toparon diez eskudos de oro.
Todos kedaron maraviyados i tuvieron a sus governador komo un muevo Salomon. Le demadaron de onde avia entendido ke en akeya kanya estavan akeyos diez eskudos, i respondio ke viendo el viejo ke djurava dar akel baston a su kontrario, i tomarlo atras kuando eskapo de djurar, le vino al tino ke adientro de el estava la paga ke demandava.
Moshe Shaul
Fuente: revista Aki Yerushalayim #51
