eSefarad Noticias del Mundo Sefaradi
Keridos amigos i amigas
En el Jewish News de esta semana en la parte dedikada a Pesah tenemos el artikolo del rabino «Ralph Genende» ke parese a la ovra de un maestro poeto. Lo komparto kon vozotros.
Saludes a todos.
UN ANYO DE BIVIR PELIGROZAMENTE
Era un anyo de bivir en peligro i de ser anksiozos. Era un anyo de toparse en Konfinamiento i de kayer esklavos a un ser muy Chiko i Tiraniko.
Era un anyo antes del Exodus kuando el mundo se avia tornado de arriva abasho kon las plegarias estranias aharvando a la Tierra i a los korasones. Kon esta eskuridad la djente no puedian ver unos a los otros. Ni puedian tokarsen unos a los otros. En supito vinieron muertes orrivles i no avia kaza ke no era tokada por el Anjel Anarkisto. Era en 1320 BCE, Era en 2020 CE. Era en Ejipto, un pais de Kaptividad i Konfinamiento ke en Ebreo se yama MITSRAIM, sinonimo por su estrechura en sus maneras de ser. El Psalmisto eskriviendo sus dezesperos disho en una fraza similar «MIN HA-MEITSAR KARATI/Yami al Dio de la estrechura de mi alma». Era en Melbourne i Mumbai. Era en Johannesburg i Jerusalem, New York i Londra. en 2020/5780 ke mos yamaron a irsen a los lugares solitarios de Konfinamiento en espasios estrechos i eskuros, separandomos unos de los otros kon sus Dekretos ke mos defendian de abrasar uno al otro, separando a los avuelos de sus inietos, los vizinos de los otros vizinos i los amigos unos de los otros. No fue nesesario demandar «MA NISHTANA HA LAILA HA ZE» Porke todo avia kambiado en muestras vidas. Lo sabian todos ke Este SEDER no estava BE SEDER. Las Yervas Amargas era la «RAISON D’ETRE» en esta noche. La Matza mos amostrava ke era el Pan de Afliksion.Pero agora es 2021/5781 i los dos sinyifikan ke tenemos un empesijo muevo. En este mez de NISAN, viene la primavera en Israel, kon la ahlama/vaksin en el braso viene la promesa de muestra Salvasion Mueva. Tiempo de esperansa para el Mundo. Este anyo azeremos el Seder todos endjuntos liberados de la tirania de Koronavirus. Deklaramos ke es la temporada de muestra mueva salvasion. En este anyo en la Australia estaremos endjuntos kon toda la famiya beviendo las 4 kupas de vino dulse en alegria i la matza mos akodrara de la Komida de Salvasion, terminando la noche kon la Kantika de Redempsion en nombre de muestra planeta ke era atakada sin piedad.
«BE SHANA HA BAA BE YERUSHALAYIM.» Oyeremos el bruido en las kayes de los viejos i mansevos i veremos al novio kon la novia.
«ZOTI TIKVATEINU/Esto es Muestra Esperansa».
Trezladado por Shimon Geron, Sydney
Fuente: Ladinokomunita
