eSefarad Noticias del Mundo Sefaradi
Keridos amigos i amigas,
El Jewish News de esta semana tiene un artikolo prezentado por Massye Kestenbaum tratando de la sivdad de Tevaria. Agora ke empesan las luvias uestros ojos se tornan al lago de Kineret kon la sivdad al lado Tiberias/Tevaria.Despues de Yerushalaim,Hevron i Tsfat (Safed), Tevaria es una de las 4 sivdades santas.Pero esto no aparese en la Biblia i esta sivdad fue kreada por el rey Herodpara servir komo el entro de Paganismo.Fue tomada mismo sovre el nombre del Imperador Tiberius ke vino despues de Augustus Caesar .Malgrado esto Los Santos reklamaron ke la Redempsion Mesianika empesaria en Tevaria. Segun el Mistisizmo Judio Tevaria es «La Sivdad de Agua siendo situada al borde del Lago de Kinneret ke es el mas grande lago en Israel de agua freska.
Saludes a todos.
——————————————————————————-
TIBERIAS/TEVARIA SIVDAD DE AGUA
Kon toda la desalinezasion, solamente 5% de la agua de Kineret se utiliza. Tevaria es konosida tambien por sus banyos termales naturales. Desde antigüedad la djente se aprovecho de la sanedad terapudika ke ofrese este lugar. Kon la destruksión del Segundo Templo en 70CE i la derrota del rebelion de Bar Kohva en 135CE, Yerushalayim estava en ruina i los Judios tuvieron ke irsen al Norte,traendo kon eyos el Sanhedrin/La Korte Judia Suprema.Se kedaron ayi por muchos anyos asta ke fueron echados afuera por los Imperadores Byzantinos.Malgrado esto Tevaria se izo un sentro de la vida Judia en Erets Yisrael por los 500 anyos sigientes, entre el medio del siglo 2 asta el medio del siglo 7. Dos ovras monumentales fueron ckompletadas aki.Se bazavan sovre La Ley Oral. Despues de 160 el Rabi Yehuda Nassi en la kavesa de Sanhedrin realizo ke las tribulasiones del Reinado Romano lo arían imposivle de prezervar La Ley Oral verbalmente i se desidio de meterla en eskrito.La mayor parte del lavoro fue echo en Tevaria i el produkto final fue La MISHNA ke se kompleto en 200.En los próksimos dos siglos uvo aktividad muy intensa en la Tierra de Yisrael.Esto rezulto kon el TALMUD YERUSHALMI finalizado en Tevaria. Estos dos livros se estudian oy mismo kon pasion.
Saltando al Siglo 10, kuando Tevaria estava basho Abbasid venian de kompletar El Rolo De La Tora/Sefer Tora» i en un milenium termino ser el mas viejo manuskrito de la Biblia Ebrea en el mundo.Todas las biblias Judias de oy se bazan sovre este teksto.Este rolo fue protejido por la Komunidad de Aleppo por siglos.Se konose komo ALEPPO CODEX. Para asegurarlo tuvieron ke traerlo a Israel en sekreto en los anyos 1950.Por finir termino en Tevaria en su lugar orijinal kon la idea de preservarlo en el futuro.En 1187 la sivdad fue tomada por Saladin kontra las Cruzadas Cristianas.La armada Musulmana rekapturo Yerushalayim. En 1204 Tevaria se izo el lugar del reposzo final del RAMBAM (Moises Maimonides).Pero la komunidad se izo mas chika en numero i prestije i yegando al Siglo 16 La sivdad estava en ruina.
La Renaissance vino en 1770’s, kuando se izo el primer lugar abitado en Erets Yisrael por los Judios Hassidim.Unas kazas i sinagogas se topan ayi mismo oy, mismo si todo fue modernizado.Tornando atras a la Sivdad de Agua los savios dizen ke la agua korre i pasa mismo a traves las rokas.Asi es la Tora ke pasa de una jenerasión a la otra.Por esta razon la Redempsion Mesianiaka empesara en Tevaria
Trezladado por Shimon Geron.
Sydney, Australia
Fuente: Ladinokomunita
