Tadrada de Umor Sefaradi en el Sentro Kultural de Neve Shalom en Estambol

El 26 de Enero 2014, el Instituto Cervantes kon el Sentro Sefaradi de Estambol estamos organizando una tadrada de Umor Sefaradi en el Sentro Kultural de Neve Shalom en Estambol.  El umor es una  karakteristika muy espesial de las kulturas i linguas i kontiene en su seno el karakter de la komunidad a ken apartiene, sus vida, sus augurios, sus penas, sus kerensias i sus rizas. El umor Sefaradi es muy espesifiko porke el Sefaradi save burlarse de si mizmo i esto es una karakteristika ke no se topa muy frekuentemente e n las komunidades del mundo.

En la tadrada ke estamos organizando va a partisipar el Dr. Eliezer Papo, viseprezidente del Sentro Gaon para los Estudios Sefaradis en la Universidad de Ben Gurion i va avlar de las agadas umoristikas. Yo, Karen Sarhon, va avlar del umor sefaradi en Turkiya i va utilizar anekdotas de muestra kerida Matilda Koen-Sarano. En esto mos akompanyara las karikatüras del famozo karikaturist Irvin Mandel, kon ken publikimos el primer i uniko livro de karikaturas en Judeo-Espanyol en el mundo. Por fin, uno de los mas grandes komedyanos de muestra komunidad, Jojo Eskenazi va partisipar kon su stand-up show ke siempre aze pishar de la riza a la djente.

Las linguas de komunikasyon en esta aktividad seran el Espanyol i el Judeo-Espanyol.

Los ke keren partisipar pueden eskrivir a la Sra. Emel Benbasat: sephardiccenter@gmail.com o telefonarla al numero: +90 212 231 92 82 /ext. 132.

Vos asperamos a todos los ke pueden para ke vos se achileye lo de arientro.