Sefer Tora en Djudeo Espanyol – Transkrivida kon letras latinas del livro por Ye’huda Sidi / YE’HOSHUA (16-20)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

YE’HOSHUA

21

¹I las kaveseras de los padres de los Levitas se ayegaron a Eliezer el saserdote, i a Ye’hoshua, ijo de Nun, i a las kaveseras de los padres de los trivos de los ijos de Yisrael. ²I les avlaron en Shilo en la tyerra de Kenaan, dizyendo: A’ enkomendo por mano de Moshe de darnos sivdades para morar kon sus arravales para nuestras kuatropeas. ³I los ijos de Yisrael dyeron a los Levitas de su eredad, por dicho de A’, estas sivdades i sus arravales,.

⁴I salyo la suerte por los linajes de los Ke’hatitas; i a los ijos de A’haron el saserdote, ke eran de los Levitas, fueron dadas por suerte, del trivo de Ye’huda, i del trivo de Shimon, i del trivo de Binyamin, tredje sivdades.

⁵I al resto de los ijos de Ke’hat, fueron dadas por suerte, de los linajes del trivo de Efrayim, i del trivo de Dan, i del medyo trivo de Menashe, dyez sivdades.

⁶I a los ijos de Gershon fueron dadas por suerte, de los linajes del trivo de Yissahar, i del trivo de Asher, i del trivo de Naftali, i del medyo trivo de Menashe en Bashan, tredje sivdades.

⁷A los ijos de Merari, por sus linajes, fueron dadas por suerte, del trivo de Reuven, i del trivo de Gad, i del trivo de Zevulun, dodje sivdades.

⁸I los ijos de Yisrael dyeron a los Levitas estas sivdades kon sus arravales por suerte, komo A’ enkomendo por mano de Moshe.

⁹I del trivo de los ijos de Ye’huda, i del trivo de los ijos de Shimon dyeron estas sivdades ke son nombradas por nombre. ¹⁰I fueron dadas a los ijos de A’haron, de los linajes de los Ke’hatitas. de los ijos de Levi; porke a eyos fue la suerte primera. ¹¹I les dyeron Kiryat-Arba, sivdad del padre de Anak, ke es Hevron en el monte de Ye’huda, kon sus arravales en sus derredores. ¹²Ma el kampo de la sivdad i sus aldeas dyeron a Kalev, ijo de Yefune, por su posesyon.

¹³I a los ijos de A’haron el saserdote dyeron la sivdad de akojimyento para el matador, a Hevron kon sus arravales, i a Livna kon sus arravales, ¹⁴i a Yatir kon sus arravales, i a Eshtemoa kon sus arravales, ¹⁵i a Holon kon sus arraveles, i a Devir kon sus arravales, ¹⁶i a Ayin kon sus arravales, i a Yuta kon sus arravales, i a Bet-Shemesh kon us arravales; nueve sivdades de estos dos trivos. ¹⁷I del trivo de Binyamin, a Givon kon sus arravales, a Geva kon sus arravales, ¹⁸a Anatot kon sus arravales, i a Almon kon sus arravales; kuatro sivdades. ¹⁹Todas las sivdades de los ijos de A’haron los saserdotes fueron tredje sivdades kon sus arravales.

²⁰I los linajes de los ijs de Ke’hat, los Levitas, los ke kedavan de los ijos de Ke’hat, tuvyeron las sivdades de su suerte del trivo de Efrayim. ²¹I les dyeron la sivdad de akojimyento para el matador, a Shehem kon sus arravales, en el monte de Efrayim, i a Gezer kon sus arravales; ²²i a Kivtsayim kon sus arravales, i a Bet_Horon kon sus arravales; kuatro sivdades: ²³i del trivo de Dan , a Elteke kon sus arravales, i a Giveton kon sus arravales, ²⁴a Ayalon kon sus arravales, a Gat-Rimon kon sus arravales; kuatro sivdades: ²⁵i del medyo trivo de Menashe, a Taanah kon sus arravales, i a Gat-Rimon kon sus arravales: dos sivdades. ²⁶Todas las sivdades para los linajes de los ijos de Ke’hat ke kedavan fueron dyez kon sus arravales.

²⁷I a los ijos de Gershon, de los linajes de los Levitas, dyeron del medyo trivo de Menashe la sivdad de akojimyento para el matador, a Golan en Bashan, kon sus arravales, i a Beeshtera kon sus arravales; dos sivdades: ²⁸i del trivo de Yissahar, a Kishyon kon sus arravales, a Dovrat kon sus arravales, ²⁹a Yarmut kon sus arravales, a En-Ganim kon sus arravales; kuatro sivdades: ³⁰i del trivo de Asher, a Mishal kon sus arravales, a Avdon kon sus arravales, ³¹a Helkat kon sus arravales, i a Rehov kon sus arravales; kuatro sivdades: ³²i del trivo de Naftali, la sivdad de akojimyento para el matador, a Kedesh en Galil kon sus arravales, i a Hamot-Dor kon sus arravales, i a Kartan kon sus arravales; tres sivdades. ³³Todas las sivdades de los Gershonitas segun sus linajes fueron tredje sivdades kon sus arravales.

³⁴I a los linajes de los ijos de Merari, los Levitas, ke kedavan, dyeron del trivo de Zevulun, a Yokneam kon sus arravales, a Karta kon sus arravales, ³⁵a Dimna kon sus arravales, a Na’halal kon sus arravales; kuatro sivdades. ([1]i del trivo de Reuven, la sivdad de akojimyento para el matador , a Betser en el dizyerto kon sus arravales, i a Ya’hats kon sus arravales, a Kedemot kon sus arravales, a Mefaat kon sus arravales; kuatro sivdades:) ³⁶i del trivo de Gad, la sivdad de akojimyento para el matador, a Ramot en Gilad kon sus arravales, i a Mahanayim kon sus arravales, ³⁷i a Heshbon kon sus arravales, a Yazer kon sus arravales; todas las sivdades kuatro. ³⁸Todas las sivdades de los ijos de Merari segun sus linajes, ke kedavan de los linajes de los Levitas , fueron por su suerte dodje sivdades. ³⁹Todas las sivdades de los Levitas adyentro de la posesyon de los ijos de Yisrael, fueron kuarenta i ocho sivdades kon sus arravales. ⁴⁰Estas sivdades tenian kada una sus arravales al derredor de eyas; ansi fue a todas estas sivdades.

⁴¹I dyo A’ a Yisrael toda la tyerra ke avia djurado a sus padres de dar; i la eredaron, i moraron en eya. ⁴²I A’ les dyo repozo al derredor, segun todo lo ke djuro a sus padres; i ninguno de todos sus enemigos se paro delante de eyos; A’ entrego en su mano todos sus enemigos. ⁴³No falto palavra de todas las buenas palavras ke avlo A’ a la kaza de Yisrael; todo se kumplyo.

[1] Algunos livros tyenen estos dos versos

22

¹Entonses Ye’hoshua yamo a los Reuvenitas, i a los Gaditas, i el medyo trivo de Menashe. ²I les disho: vozotros avesh guardado todo lo ke Moshe, syervo de A’, vos enkomendo; i avesh ovedesido a mi boz en todo lo ke vos enkomendi. ³No avesh deshado a vuestros ermanos en estos muchos dias asta oy, sino ke avesh guardado la guardya de la enkomendansa de A’ vuestro Dyo. ⁴I agora A’ vuestro Dyo a dado repozo a vuestros ermano, komo les avlo; i agora tornad i andadvos a vuestras tyendas, a la tyerra de vuestra posesyon, ke Moshe, syervo de A’, vos dyo de la otra parte del Yarden. ⁵Solamente guardad mucho para azer la enkomendansa i la Ley ke Moshe, syervo de A’, vos enkomendo, ke amesh a A’ vuestro Dyo, i ke andesh en todos sus kaminos, i ke guardesh sus enkomendansas, i ke vos apegesh a el, i ke le sirvash kon todo vuestro korason i kon toda vuestra alma. ⁶I Ye’hoshua los bendisho, i los enbio; i se fueron a sus tyendas.

⁷I al medyo trivo de Menashe avia dado Moshe eredad en Bashan; i al otro medyo dyo Ye’hoshua entre sus ermanos de esta parte del Yarden al oksidente. I kuando Ye’hoshua enbio tambyen a eyos a sus tyendas, los bendisho. ⁸I les avlo, dizyendo: tornadvos a vuestras tyendas kon grandes rikezas, i kon muy mucho ganado, kon plata, i kon oro, i kon alambre, i kon fyerro, i kon vestidos muy muchos. Espartid kon vuestros ermanos el espojo de vuestros enemigos.

⁹I los ijos de Reuven, i los ijos de Gad, i el medyo trivo de Menashe, se tornaron i se partyeron de los ijos de Yisrael de Shilo, ke esta en la tyerra de Kenaan, para ir a la tyerra de Gilad, a la tyerra de su posesyon, en la kual se avian aposesyonado, segun el dicho de A’ por mano de Moshe. ¹⁰I kuando vinyeron a las komarkas del Yarden, ke estan en la tyerra de Kenaan, los ijos de Reuven, i los ijos de Gad, i el medyo trivo de Menashe, fraguaron ayi una ara djunto al Yarden, una ara de grande aparensya. ¹¹I los ijos de Yisrael oyeron dizir: ek, los ijos de Reuven, i los ijos de Gad, i el medyo trivo de Menashe fraguaron una ara a la frontera de la tyerra de Kenaan, en las komarkas del Yarden, al pasaje de los ijos de Yisrael. ¹²I kuando los ijos de Yisrael lo oyeron, se adjunatron toda la kompanya de los ijos de Yisrael en Shilo para suvir [1]a pelear kontra eyos.

¹³I enbiaron los ijos de Yisrael a los ijos de Reuven, i a los ijos de Gad, i al medyo trivo de Menashe, a la tyerra de Gilad, a Pinhas, ijo de Elazar el saserdote, ¹⁴i dyez mayorales kon el, un mayoral de kada kaza de padre de todos los trivos de Yisrael; i kada uno era kavesera de la kaza de sus padres en los miles de Yisrael. ¹⁵I vinyeron a los ijos de Reuven, i a los ijos de Gad, i al medyo trivo de Menashe, a la tyerra de Gilad; i les avlaron, dizyendo: ¹⁶ansi dize toda la kompanya de A’: ¿ke falsia es esta ke falsastesh kontra el Dyo de Yisrael, tornadvos oy de detras de A’, en fraguandovos ara para reveyar oy kontra A’? ¹⁷¿Poko nos a sido el delito de Peor, del kual no estamos limpyos asta este dia, i por el kual fue la mortaldad en la kompanya de A’? ¹⁸I vozotros vos tornarash oy de detras de A’; i sera, ke si vozotros reveyaresh oy kontra A’, manyana el se ensanyara kontra toda la kompanya de Yisrael. ¹⁹Empero si la tyerra de vuestra posesyon es enkonada, pasadvos a la tyerra de la posesyon de A’, en la kual mora el tavernakulo de A’, i tomad posesyon entre nozotros; i no reveyesh kontra A’, ni reveyesh kontra nozotros, en fraguandovos ara afuera del ara de A’ vuestro Dyo. ²⁰¿No falso Ahan, ijo de Zerah, falsia en la koza enheremada; i uvo sanya sovre toda la kompanya de Yisrael? i akel varon no se deperdyo solo en su delito.

²¹I los ijos de Reuven, i los ijos de Gad, i medyo trivo de Menashe respondyeron, i disheron a las kavesereas de los miles de Yisrael: ²²el Dyo de los dyozes [El Elo’him]A’, el Dyo de los dyozes [El Elo’him]A’, el save, i Yisrael savra: si por revilyo, o si por falsia kontra A’ izimos esto, no nos salve oy: ²³si nos fraguamos ara para tornarnos de detras de A’, o si para alsar sovre eya alsasyon o prezente, o si para azer sovre eya sakrifisyos de pases, ke A’ mizmo lo bushke. ²⁴I si no izimos esto por temor de esta koza, dizyendo: manyana vuestros ijos podrian avlar a nuestros ijos, dizyendo: ¿ke tenesh vozotros kon A’ el Dyo de Yisrael? ²⁵I A’ a puesto el Yarden por termino entre nozotros i vozotros, ijos de Reuven, i ijos de Gad; no tenesh vozotros parte en A’. I ansi vuestros ijos arian a nuestros ijos a ke no temyeron a A’. ²⁶I dishimos: agamos agora para fraguarnos una ara, no para alsasyon ni para sakrifisyo; ²⁷sino para ke sea testigo entre nozotros i vozotros, i entre nuestros djerenansyos despues de nozotros, para ke sirvamos el servisyo de A’ delante de el kon nuestras alsasyones, i kon nuestros sakrifisyos, i kon nuestros sakrifisyos de pases; i no digan manyana vuestros ijos a nuestros ijos: vozotros no tenesh parte en A’. ²⁸Nozotros pues dishimos: sera, ke kuando disheren tal a nozotros o a nuestros djerenansyos manyana, entonses respondiremos: mirad la figura del ara de A’, la kual izyeron nuestros padres, no para alsasyon ni para sakrifisyo, sino para fuera testigo entre nozotros i vozotros. ²⁹Leshos sea de nozotros ke reveyamos kontra A’, o ke nos tornemos oy de detras de A’, fraguando ara para alsasyon, para prezente, o para sakrifisyo, afuera del ara de A’ nuestro Dyo ke esta delante de su tavernakulo.

³⁰I kuando oyo Pinha el saserdote, i los mayorales de la kompanya, i las kaveseras de los miles de Yisrael ke estavan kon el, las palavras ke avlaron los ijos de Reuven, i los ijos de Gad, i los ijos de Menashe, les plazyo. ³¹I disho Pinhas, ijo de Elazar el saserdote, a los ijos de Reuven, i a los ijos de Gad, i a los ijos de Menashe: oy supimos ke A’ esta entre nozotros, syendo ke no falsastesh esta falsia kontra A’; agora eskapastesh a los ijos de Yisrael de la mano de A’. ³²I se torno Pinhas, ijo de Elazar el saserdote, i los mayorales, de kon los ijos de Reuven, i de kon los ijos de Gad, de la tyerra de Gilad a la tyerra de Kenaan, a los ijos de Yisrael, i les trusheron respuesta. ³³I la koza plazyo a los ijos de Yisrael, i bendisheron al Dyo los ijos de Yisrael; i no avlaron mas de suvir kontra eyos en batalya, para destruir la tyerra en ke moravan los ijos de Reuven i los ijos de Gad. ³⁴I los ijos de Reuven i los ijos de Gad yamaron el ara Ed; porke disheron: testigo sera entre nozotros ke A’ es el Dyo.

[1] Ebreo: el fonsado

23

¹I akontesyo pasados muchos dias despues ke A’ dyo repozo a Yisrael de todos sus enemigos al derredor, ke Ye’hoshua era vyejo, entrado en dias. ²I yamo Ye’hoshua a todo Yisrael, a sus vyejos, i a sus kaveseras, i a sus djuezes, i a sus ofisyales, i les disho: yo soy vyejo, yo entri en dias. ³I vozotros vistesh todo lo ke A’ vuestro dyo izo a todas estas djentes por kavza de vozotros; porke A’ vuestro Dyo, el es ke peleo por vozotros. ⁴Mirad, yo echi por suerte para vozotros estas djentes ke kedaron, por eredar a vuestros trivos, kon todas las djentes ke yo taji dezde el Yarden asta la mar grande onde se pone el sol. ⁵I A’ vuestro Dyo, el las empushara de delante de vozotros, i las desterrara de vuestra prezensya; i vozotros eredaresh su tyerra, komo vos avlo A’ vuestro Dyo. ⁶Enfortesedvos pues mucho a guardar i a azer todo lo ke esta eskrito en el livro de la Ley de Moshe, sin apartarvos de el ni a la derecha ni a la izkyerda: ⁷ke no vengash entre estas djentes, estas ke kedaron kon vozotros, i no enmentesh el nombre de sus dyozes, ni djuresh por eyos, ni les sirvash, ni vos enkorvesh a eyos. ⁸Ma a A’ vuestro Dyo vos apegaresh, komo izistesh asta oy. ⁹Porke desterro A’ de delante de vozotros djentes grandes i fuertes; i a vozotros, ninguno se paro delante de vozotros asta oy. ¹⁰Un varon de vozotros persegira a mil; porke A’ vuestro Dyo, el es ke pelea por vozotros. komo vos avlo. ¹¹Por tanto guardad mucho por vuestras almas, ke amesh a A’ vuestro Dyo. ¹²Porke si tornar vos tornaresh, i vos apegaresh al remanesimyento de estas djentes, estas ke kedaron kon vozotros, i konsograresh kon eyos, i vinyeresh a eyos, i eyos a vozotros: ¹³saver sepash ke A’ vuestro Dyo no desterrara mas estas djentes de delante de vozotros; sino ke vos seran por lazo, i por enkampamyento, i por asote en vuestros lados, i por espinos en vuestros ojos, asta ke vos depyerdash de sovre esta buena tyerra ke A’ vuestro Dyo vos dyo. ¹⁴I ek, yo me voy oy por el kamino de toda la tyerra; i sepash kon todo vuestro korason i kon toda vuestra alma, ke no falto ni una palavra de todas las buenas palavras ke A’ vuestro Dyo avlo tokante a vozotros; todas vos akontesyeron; no se kayo de eyo ni una palavra. ¹⁵I sera, ke komo vino sovre vozotros toda palavra buena ke A’ vuestro Dyo vos avlo, ansi traera A’ sovre vozotros toda palavra mala, asta destruirvos de sovre esta buena tyerra ke A’ vuestro Dyo vos dyo. ¹⁶Kuando traspasaresh el firmamyento de A’ vuestro Dyo, ke el vos enkomendo, i anduvyeresh i sirvyeresh a otros dyozes, i vos enkorvaresh a eyos, entonses el fulor de A’ se ensendera kontra vozotros, i vos deperderesh presto de sovre la buena tyerra ke el vos dyo.

24

¹I adjunto Ye’hoshua a todos los trivos de Yisrael a Shehem, i yamo a los vyejos de Yisrael, i a sus kaveseras, i a sus djuezes, i a sus ofisyales; i se prezentaron delante del Dyo. ²I disho Ye’hoshua a todo el puevlo: ansi dize A’ Dyo de Yisrael: vuestros padres moraron antiguamente de la otra parte del rio , a saver, Terah, padre de Avra’ham, i padre de Nahor; i sirvyeron a otros dyozes. ³I yo tomi a vuestro padre Avra’ham de la otra parte del rio, i lo yevi por toda la tyerra de Kenaan; i muchiguo su semen, i le di a Yitshak. ⁴I a Yitshak di a Yaakov i a Esav; i a Esav di el monte de Seir para eredarlo; ma Yaakov i sus ijos desendyeron a Ayifto. ⁵I yo enbii a Moshe i a A’haron, i iri a Ayifto, komo lo ize en medyo de el; i despues vos saki. ⁶I saki a vuestros padres de Ayifto; i vinistesh a la mar; i los Aisyanos persigyeron detras de vuestros padres kon kuatriguas i kon kavayeros asta el mar ruvyo. ⁷I esklamaron a A’, i el puzo tinyevla entre vozotros i los Aisyanos, i trusho sovre eyos la mar, i los kuvryo; i vuestros ojos vyeron lo ke izo en Ayifto; i estuvistesh en el dizyerto muchos dias. ⁸I vos trushe a la tyerra de los Emorios, ke moravan de la otra parte del Yarden; i pelearon kon vozotros, ma yo los entregi en vuestra mano, i eredastesh su tyerra, i yo los destrui de delante de vozotros. ⁹I se levanto Balak, ijo de Tsipor, rey de Moav, i peleo kon Yisrael; i enbio i yamo a Bilam ijo de Beor, para maldizirvos. ¹⁰Ma yo no kiji eskuchar a Bilam, i el vos bendisho bendizyendo, i yo vos eskapi de su mano. ¹¹I pasastesh el Yarden, i vinistesh a Yeriho; i los moradores de Yeriho pelearon kon vozotros, los Emorios, i los Perizios, i los Kenaanios, i los Hitios, i los Girgashios, los Hivios, i los Yevusios; i yo los entregi en vuestra mano. ¹²I enbii abizbas delante de vozotros, las kuales los desterraron de delante de vozotros, a saver a los dos reyes de los Emorios; ma no kon tu espada, ni kon tu arko. ¹³I vos di tyerra en la kual no lazrastesh, i sivdades no fraguastesh, i morash en eyas; de vinyas i olivares ke no plantastesh, komesh. ¹⁴Agora pues temed a A’, i sirvelde kon prenizmedad i kon verdad; i kitad los dyozes a kyen sirvyeron vuestros padres de la otra parte del rio, i en Ayifto; i servid a A’. ¹⁵I si vos parese mal servir a A’, eskojedvos oy a kyen serviresh, si a los dyozes a kyen sirvyeron vuestros padres ke estuvyeron de la otra parte del rio, o a los dyozes de los Emorios, en la tyerra de los kuales morash; ma yo i mi kaza serviremos a A’.

¹⁶I el puevlo respondyo i disho: lesho de nozotros ke deshamos a A’ por servir a otros dyozes, ¹⁷Porke A’ nuestro Dyo es el ke nos izo suvir a nozotros i a nuestros padres de la tyerra de Ayifto, de la kaza de syervos, i ke izo a nuestra vista estas grandes senyales, i nos guardo por todo el kamino por onde anduvimos, i en todos los puevlos entre los kuales pasimos. ¹⁸I A’ desterro de delante de nozotros a todos los puevlos, i al Emorio, ke morava en la tyerra. Nozotros tambyen serviremos a A’, porke el es nuestro Dyo. ¹⁹I disho Ye’hoshua al puevlo: no podresh servir a A’; porke el es Dyo santo, Dyo zelozo es; no perdonara vuestros revilyos i vuestros pekados. ²⁰Si desharesh a A’, i sirvyeresh a dyozes estranyos, el se tornara i vos maltratara, i vos konsumira, despues ke vos izo byen. ²¹I disho el puevlo a Ye’hoshua: no, sino ke a A’ serviremos. ²²I disho Ye’hoshua a el puevlo: vozotros sosh testigos kontra vozotros mizmos, ke vozotros vos avesh eskojido a A’ para servirle. I eyos disheron: testigos somos. ²³Kitad pues agora, disho el, los dyozes estranyos ke estan entre vozotros, i akostad vuestro korason a A’ Dyo de Yisrael. ²⁴I el puevlo disheron a Ye’hoshua: a A’ nuestro Dyo serviremos, i a su boz ovedesremos. ²⁵I Ye’hoshua tajo firmamyento kon el puevlo akel dia, i le puzo fuero i djuisyo en Shehem.

²⁶I eskrivyo Ye’hoshua estas palavras en el livro de la Ley del Dyo: i tomo una pyedra grande, i la levanto ayi debasho del pino ke estava en el santuvaryo de A’. ²⁷I disho Ye’hoshua a todo el puevlo, ek, esta pyedra sera entre nozotros por testigo; porke eya a oyido todas las palavras de A’ ke el a avlado kon nozotros; i sera testigo kontra vozotros, no sea ke nyegesh a vuestro Dyo. ²⁸I enbio Ye’hoshua al puevlo, kada uno a su eredad.

²⁹I akontesyo despues de estas kozas, ke muryo Ye’hoshua, ijo de Nun, syervo de A’, de edad de syento i dyez anyos. ³⁰I lo enterraron en el termino de su eredad en Timnat-Serah, ke esta en el monte de Efrayim, al norte del monte de Gaash. ³¹I sirvyo Yisrael a A’, todos los dias de Ye’hoshua, i todos los dias de los vyejos ke alargaron dias despues de Ye’hoshua, i ke savian todos los echos de A’, ke el avia echo por Yisrael.

³²I enterraron en Shehem los guesos de Yosef ke los ijos de Yisrael avian traido de Ayifto, en la parte del kampo ke Yaakov kompro de los ijos de Hamor, padre de Shehem, por syen pyesas de plata; i fueron por eredad a los ijos de Yosef.

³³I Elazar, ijo de A’haron, muryo; i lo enterraron en la kuesta de Pinhas, su ijo, ke le fue dada en el monte de Efrayim.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.