Sefer Tora en Djudeo Espanyol – Transkrivida kon letras latinas del livro por Ye’huda Sidi / VAYIKRA: 32 – BE’HAR SINAY (25 a 26)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

32 – BE’HAR SINAY

25

¹I avlo A’ a Moshe en el monte de Sinay, dizyendo: ²avla a los ijos de Yisrael, i diles: kuando vinyeresh a la tyerra ke yo vos doy, olgara la tyerra shabat a A’. ³Sesh anyos sembraras tu kampo i sesh anyos apodaras tu vinya, i akojeras su renuevo; ⁴ma en el anyo seteno avra shabat de olgansa a la tyerra, shabat a A’: no sembres tu kampo ni apodes tu vinya. ⁵Lo ke kresyere de suyo, en tu segada no lo seges; ni vendimyes las uvas de tu vinya ke no avras apodado:[1] anyo de olgansa sera a la tyerra. ⁶I el shabat de la tyerra vos sera para komer; a ti, i a tu syervo, i a tu syerva, i a tu alkiladizo, i a tu moradizo, ke pelegrinaren kontigo. ⁷I a tu kuatropea, i a la bestya ke uvyere en tu tyerra, sera todo su renuevo para komer.

⁸I te kontaras syete shabatot de anyos, syete vezes syete anyos, de modo ke los dias de los syete shabatot de anyos te seran kuarenta i nueve anyos. ⁹Entonses aras pasar la promesa de aulasyon en el mez seteno, a los dyez del mez; en el dia de las ekspiasyones (hakipurim) aresh pasar la trompeta por toda vuestra tyerra. ¹⁰I sakrifikaresh el enyo de los sinkuenta anyos, i apregonaresh alforria en la tyerra a todos sus moradores. Este sera yovel a vozotros: i tornaresh kada uno a su posesyon, i tornaresh kada uno a su linaje. ¹¹Akel anyo de los sinkuenata anyos sera yovel para vozotros; no sembresh, ni segesh lo ke kresyere de suyo en el; ni vendimyesh las vinyas ke no fueron apodadas[2]. ¹²Porke es yovel; santo sera a vozotros; del kampo komeresh su renuevo . ¹³En este anyo del yovel tornaresh kada uno a su posesyon. ¹⁴I kuando vendyeres algo a tu kompanyero, o komprares de mano de tu kompanyero no enganyesh ninguno a su ermano. ¹⁵Segun el numero de los anyos despues del yovel kompraras de tu kompanyero; segun el numero de los anyos de los renuevos el vendera a ti. ¹⁶Segun la muchedumbre de los anyos muchiguaras su presyo, i segun el apokamyento de los anyos apokaras su presyo; porke el numero de los renuevos el vende a ti. ¹⁷I no enganyesh ninguno a su kompanyero; ma temeras a tu Dyo; porke yo soy A’ vuestro Dyo. ¹⁸Aresh pues mis fueros, i mis djuisyos guardaresh, i los aresh; i moraresh sovre la tyerra seguros. ¹⁹I la tyerra dara su fruto, i komeresh a la artura, i moraresh sovre eya seguros. ²⁰I si disheres: ¿ke komeremos en el anyo seteno? ek, no sembramos i no akojimos nuestro renuevo: ²¹entonses enkomendare mi bendisyon sovre vozotros en el anyo sejeno, i ara renuevo para tres anyos. ²²I sembraresh en el anyo ochavo i komeresh del renuevo vyejo asta el anyo noveno; asta ke venga su renuevo komeresh de lo vyejo. ²³I la tyerra no sera vendida arrematadamente; porke la tyerra es mia; porke pelegrinos i moradizos sosh konmigo, ²⁴i en toda la tyerra de vuestra posesyon daresh regmisyon a la tyerra.

²⁵Kuando se empovresyere tu ermano, i vendyere algo su posesyon, i vinyere su regmidor, el paryente mas serkano a el, regmira la koza vendida de su ermano. ²⁶I el varon, kuando no tuvyere regmidor, i alkansare despues su mano, i topare bastante por su regmisyon: ²⁷entonses kontara los anyos de su vendida, i tornara la demazia al varon a kyen vendyo, i tornara a su posesyon. ²⁸Ma si no alkansare su mano bastante para tornarselo, lo ke vendyo estara en mano del ke lo kompro asta el anyo del yovel; i en el yovel saldra, i el tornara a su posesyon.

²⁹I kuando varon vendyere kaza de morada en sivdad rodeada de muraya su regmisyon sera asta akavarse el anyo de su vendida: un anyo sera su regmisyon. ³⁰I si no fuere regmida asta kumplirse un anyo entero, la kaza ke esta en la sivdad ke tyene muraya sera afirmada arrematadamente al ke la kompro, por sus djerenansyos; no saldra en el yovel. ³¹Ma las kazas de las aldeas ke no tyenen muraya al derredor, seran kontadas komo kampo de la tyerra; tendran regmisyon, i saldran en el yovel. ³²Ma las sivdades de los Levitas, las kazas de las sivdades de su posesyon, syempre tendran regmisyon los Levitas. ³³I el ke komprare de los Levitas, la vendida de la kaza i de la sivdad de su posesyon saldra en el yovel; porke las kazas de las sivdades de los Levitas son su posesyon entre los ijos de Yisrael. ³⁴Ma el kampo del arraval de sus sivdades no sera vendido; porke posesyon de syempre es para eyos.

³⁵I kuando se empovresyere tu ermano, i deskayere su mano kontigo, tu lo esforsaras; komo pelegrino o moradizo biva kontigo. ³⁶No tomes de el logro, ni ganansya; ma temeras a tu Dyo, i biva tu ermano kontigo. ³⁷No le des tu moneda kon logro, ni des tu komida kon ganansya: ³⁸yo A’ vuestro Dyo, ke vos saki de la tyerra de Ayifto para darvos la tyerra de Kenaan, para ser vuestro Dyo.

³⁹I kuando se empovresyere tu ermano kontigo, i se vendyere a ti, no lo agash servir servisyo de syervo. ⁴⁰Komo alkiladizo, komo moradizo estara kontigo; asta el anyo del yovel servira kontigo. ⁴¹Entonses saldra de kontigo, el i sus ijos kon el, i tornara a su linaje, i a la posesyon de sus padres tornara. ⁴²Porke son mis syervos, a los kuales saki de la tyerra de Ayifto: no seran vendidos a manera de syervos. ⁴³No podestes sovre el kon dureza, ma temeras a tu Dyo. ⁴⁴I tu syervo i tu syerva ke tuvyeres, seran de las djentes ke estan en vuestros derredores; de eyos kompraresh syervos i syervas. ⁴⁵I tambyen de los ijos de los moradizos ke pelegrinan kon vozotros, de eyos kompraresh, i de los de su linaje ke estan kon vozotros, ke son nasidos en vuestra tyerra; i a estos tendresh por posesyon. ⁴⁶I los tendresh por eredad para vuestros ijos despues de vozotros, por eredad de posesyon. Para syempre vos serviresh de eyos; ma sovre vuestros ermanos los ijos de Yisrael , no podestesh kada uno sovre su ermano kon dureza.

⁴⁷I kuando alkansare la mano del pelegrino i moradizo kontigo, i se empovresyere tu ermano ke esta kon el. I se vendyere al pelegrino moradizo kontigo, o a la rasa del linaje del pelegrino; ⁴⁸despues de ser vendido, el tendra regmisyon; uno de sus ermanos lo regmira: ⁴⁹o su tio, o el ijo de su tio lo regmira, o algun karonal de su karne, de su linaje, lo regmira, o si su mano alkansare, el mizmo se regmira. ⁵⁰I kontara kon su komprador dezde el anyo ke se vendyo a el asta el anyo del yovel; i la moneda de su vendida sera segun el numero de los anyos; segun los dias de un alkiladizo sera kon el. ⁵¹Si dainda uvyere muchos anyos, asegun eyos tornara su reskate de la moneda de su kompra. ⁵²I si kedaren pokos anyos asta el enyo del yovel, entonses kontara kon el, i asegun sus anyos tornara su reskate. ⁵³Komo alkiladizo de anyo en anyo estara kon el; no podeste sovre el kon dureza a tu vista. ⁵⁴I si no fuere regmido kon estos medyos, en el anyo del yovel saldra, el i sus ijos kon el. ⁵⁵Porke son mis syervos los ijos de Yisrael, mis syervos son, a los kuales saki de la tyerra de Ayifto: yo A’ vuestro Dyo.

26   ¹No agash para vozotros idolos ni imajen, ni levantesh para vozotros estansya, ni pongash en vuestra tyerra pyedra afigurada para enkorvarvos a eya; porke yo soy A’ vuestro Dyo. ²Mis shabatot guardaresh, i de mi santuvaryo tendresh respeto: yo A’.

[1] Ebreo: tu nazir

[2] Ebreo: sus nazires

26

¹No agash para vozotros idolos ni imajen, ni levantesh para vozotros estansya, ni pongash en vuestra tyerra pyedra afigurada para enkorvarvos a eya; porke yo soy A’ vuestro Dyo. ²Mis shabatot guardaresh, i de mi santuvaryo tendresh respeto: yo A’.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.