Sefer Tora en Djudeo Espanyol – Transkrivida kon letras latinas del livro por Ye’huda Sidi / VAYIKRA: 27 – TAZRIA (12 a 13)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

27 – TAZRIA

12

¹I avlo A’ a Moshe dizyendo: ²avla a los ijos de Yisrael, dizyendo: kuando una mujer konsivyere, i paryere macho, sera enkonada syete dias; segun los dias del apartamyento de su manantio sera enkonada. ³I en el dia ochavo sera sirkunsida la karne de su serradura. ⁴I trenta i tres dias estara en las sangres de su limpyamyento; no toke ninguna koza santa ni venga al santuvaryo, asta ke sean kumplidos los dias de su limpyamyento. ⁵I si paryere embra, sera enkonada dos semanas, segun su apartamyento, i sesenta i sesh dias estara en las sangres de su limpyamyento. ⁶I kuando fueren kumplidos los dias de su limpyamyento por ijo, o por ija, traera un karnero de edad de un anyo por alsasyon, i un palombino, o un tortolo por sakrifisyo por pekado, a la puerta de la tyenda del plazo, al saserdote. ⁷I el lo ayegara delante de A’, i ara ekspiasyon (kapara) por eya; i sera limpya del manadero de su sangre. Esta es la ley de la ke paryere macho o embra. ⁸I si no alkansare su mano bastante para karnero, entonses tomara dos tortolos, o dos palombinos; uno por alsasyon, i otro por sakrifisyo por pekado; i el saserdote ara ekspiasyon por eya, i sera limpya.

13

¹I avlo A’ a Moshe i a A’haron, dizyendo: ²kuando un ombre tuvyere en el kuero de su karne inchasyon, o postiya, o mancha klara, i fuere en el kuero de su karne komo yaga de lepra, sera traido a A’haron el saserdote, o a uno de sus ijos los saserdotes. ³I el saserdote mirara la yaga en el kuero de la karne; i si el kaveyo en la yaga se uvyere tornado blanko, i la yaga paresyere mas onda ke el kuero de su karne, yaga de lepra es; i el saserdote lo mirara, i lo dara por enkonado. ⁴Ma si la mancha klara fuere blanka en el kuero de su karne, i no paresyere mas onda ke el kuero, ni su kaveyo se uvyere tornado blanko, entonses el saserdote enserrara al ke tyene la yaga syete dias. ⁵I el saserdote lo mirara al dia seteno; i ek, si la yaga a su pareser se uvyere estankado, i la yaga no se uvyere estendido en el kuero, entonses el saserdote lo enserrara syete dias segunda vez. ⁶I el saserdote lo mirara de nuevo al dia seteno; i ek, si la yaga se uvyere eskuresido, i la yaga no se uvyere estendido en el kuero, entonses el saserdote lo dara por limpyo; postiya es; i lavara sus vestidos, i sera limpyo. ⁷Ma si estender se estendyere la postiya en el kuero despues ke fue mostrado al saserdote por su limpyeza, sera mostrado al saserdote otra vez. ⁸I el saserdote mirara, i ek, si la postiya se uvyere estendido en el kuero, el saserdote lo dara por enkonado; lepra es.

⁹Kuando uvyere yaga de lepra en el ombre, sera traido al saserdote. ¹⁰I el saserdote mirara, i ek, si uvyere inchasyon blanka en el kuero, i uvyere demudado el kaveyo en blanko, i uvyere aparensya de karne biva en la inchasyon, ¹¹lepra envejesida es en el kuero de su karne, i el saserdote lo dara por enkonado, i no lo enserrara, porke es enkonado. ¹²I si enfloreser enfloresyere la lepra en el kuero, i la lepra kuvriere todo el kuero del ke tyene la yaga, dezde su kavesa asta sus pyes, a toda vista de ojos del saserdote, ¹³entonses el saserdote mirara, i ek, si la lepra uvyere kuvyerto toda su karne, dara por limpyo al ke tyene la yaga; toda eya se torno blanka; limpyo es. ¹⁴Ma en el dia ke se vyere en el karne biva, sera enkonado. ¹⁵I el saserdote mirara la karne biva i lo dara por enkonado; la karne biva enkonada es; lepra es. ¹⁶O kuando la karne biva tornare, i se demudare en blanka, entonses vendra al saserdote. ¹⁷I el saserdote lo mirara, i ek, si la yaga se uvyere tornado blanka, el saserdote dara por limpyo al ke tenia la yaga; limpyo es.

¹⁸I kuando en la karne de alguno, en su kuero, uvyere sarna, i se sanare, ¹⁹i uvyere en el lugar de la sarna inchasyon blanka, o mancha klara blanka envermejesida, sera mostrado al saserdote. ²⁰I el saserdote mirara, i ek, si paresyere mas basha ke el kuero, i su kaveyo uvyere tornado blanko, el saserdote lo dara por enkonado; yaga de lepra es, ke enfloresyo en la sarna. ²¹I si el saserdote la mirare, i ek, no uvyere en eya kaveyo blanko, ni fuere mas basha ke el kuero, sino ke esta eskura, entonses el saserdote lo enserrara syete dias. ²²I si estender se estendyere en el kuero, entonses el saserdote lo dara por enkonado; yaga es. ²³ Ma si la mancha klara se estuvyere en su lugar, i no se estendyere, senyal de la sarna es; i el saserdote lo dara por limpyo.

²⁴O la karne, kuando uvyere en su kuero kemadura de fuego, i uvyere en la krosta de la kemadura mancha klara blanka envermejesida, o solo blanka, ²⁵el saserdote la mirara, i ek, si el kaveyo se uvyere tornado blanko en la mancha klara, i paresyere mas onda ke el kuero, lepra es, ke enfloresyo en la kemadure i el saserdote lo dara por enkonado; yaga de lepra es. ²⁶Ma si el saserdote la mirare, i ek, no uvyere en la mancha klara kaveyo blanko, ni estuvyere mas basha ke el kuero, sino ke esta eskura, el saserdote lo enserrara syete dias. ²⁷I el saserdote lo mirara al dia seteno, i si estender se uvyere estendido en el kuero, el saserdote lo dara por enkonado; yaga de lepra es. ²⁸I si la mancha klara se estuvyere en su lugar, i no se uvyere estendido en el kuero, sino ke esta eskura, inchasyon es de la kemadura, i el saserdote lo dara por limpyo; porke senyal de la kemadura es.

²⁹I varon o mujer, kuando tuvyere yaga en la kavesa o en la barva, ³⁰el saserdote mirara la yaga, i ek, si paresyere mas onda ke el kuero, i uvyere en eya kaveyo ruvyo, delgado, entonses el saserdote lo dara por enkonado; tinya es, lepra es de la kavesa o de la barva. ³¹I kuando el saserdote mirara la yaga de la tinya, i ek, no paresyere mas onda ke el kuero, ni uvyere en eya kaveyo preto, el saserdote enserrera al ke tyene la yaga de la tinya syete dias. ³²I el saserdote mirara la yaga al dia seteno, i ek, si la tinya no se uvyere estendido, ni uvyere en eya kaveyo ruvyo, i la tinya no paresyere mas onda ke el kuero, entonses se traskilara, ma la tinya no traskilara; ³³i el saserdote enserrara al ke tyene la tinya syete dias segunda vez. ³⁴I el saserdote mirara la tinya al dia seteno, i ek, si la tinya no se uvyere estendido en el kuero, ni paresyere mas onda ke el kuero, el saserdote lo dara por limpyo; i lavara sus vestidos, i sera limpyo. ³⁵Ma si la tinya estender se estendyere en el kuero despues ke fue alimpyado, ³⁶entonses el saserdote lo mirara, i ek, si la tinya se uvyere estendido en el kuero, no bushkara el saserdote el kaveyo ruvyo; enkonado es. ³⁷Ma si la tinya a su pareser se uvyere estankado, i uvyere kresido en eya kaveyo preto, la tinya esta melezinada; el es limpyo; i el saserdote lo dara por limpyo.

³⁸I varon o mujer, kuando uvyere en el kuero de su karne manchas klaras, manchas blankas, ³⁹el saserdote mirara, i ek, si en el kuero de su karne uvyere manchas eskuras blankas, empeyne es ke enfloresyo en el kuero; limpyo es.

⁴⁰I un varon, kuando se le pelare la kavesa, es kalvo, ma es limpyo. ⁴¹I si a la parte de su kara fuere pelada su kavesa, antekalvo es, limpyo es. ⁴²Ma kuando en la kalva, o en la antekalva uvyere yaga blanka envermejesida, lepra es ke enfloresyo en su kalva o en su antekalva. ⁴³I el saserdote lo mirara, i ek, si la inchasyon de la yaga fuere blanka envermejesida en su kalva o en su antekalva, komo el pareser de la lepra del kuero de la karne, ⁴⁴varon leprozo es, enkonado es; el saserdote lo dara luego por enkonado; en su kavesa esta su yaga. ⁴⁵I el leprozo en kyen uvyere la yaga, sus vestidos seran razgados, i su kavesa deskuvyerta, i kuvrira el lavyo de arriva, i apregonara, enkonado, enkonado. ⁴⁶Todos los dias ke la yaga estuvyere en el, sera enkonado; enkonado es; morara solo, afuera del real sera su morada.

⁴⁷I kuando en el vestido uvyere yaga de lepra, en vestido de lana, i en vestido de lino, ⁴⁸o en estambre, o en trama de lino o de lana, o en kuero, o en kualkyer ovra de kuero; ⁴⁹i si la yaga fuere verde o envermejeda en el vestido, o en el kuero, o en el estambre, o en el trama, o en kualkyer atuendo de kuero; yaga de lepra es, i sera mostrada al saserdote. ⁵⁰I el saserdote mirara la yaga, i enserrara lo ke tyene layaga syete dias. ⁵¹I mirara la yaga al dia seteno, i si la yaga se uvyere estendido en el vestido, o en el estambre o en la trama, o en el kuero, o en kuelkyer ovra ke se aze de kuero, lepra punchante es la yaga, enkonada es. ⁵²I kemara el vestido, o el estambre, o la trama, de lana o de lino, o kualkyer atuendo de kuero en ke uvyere tal yaga; porke lepra punchante es; en fuego sera kemada, ⁵³i si el saserdote mirare, i ek, la yaga no se uvyere estendido en el vestido, o en el estambre, o en la trama, o en kualkyer atuendo de kuero, ⁵⁴entonses el saserdote enkomendara ke laven lo ke tyene la yaga, i lo enserrara syete dias segunda vez. ⁵⁵I el saserdote mirara despues ke la yaga fue lavada, i ek, si la yaga no uvyere demudada su kolor, aunke la yaga no se uvyere estendido, enkonada es; en fuego la kemaras; mengua es al [1]derecho o al arrevez. ⁵⁶I si el saserdote mirare, i ek, la yaga se uvyere eskuresido despues ke fue lavada, entonses la razgara del vestido, i del kuero, o del estambre, o de la trama. ⁵⁷I si se aparesyere mas en el vestido, o en el estambre, o en la trama. o en kualkyer atuendo de kuero, es yaga enfloresyen; en fuego kemaras lo ke tyene la yaga. ⁵⁸Ma el vestido, o el estambre o la trama, o kualkyer atuendo de kuero, ke lavares, i ke la yaga se le kitare, sera lavado segunda vez, i sera limpyo. ⁵⁹Esta es la ley de la yaga de lepra del vestido de lana o de lino, o del estambre, o de la trama, o de kualkyer atuendo de kuero, para darlo por limpyo, o para darlo por enkonado.

[1] Ebreo: en su kalva o en su antekalva

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.