eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
SHEMUEL BET
6 1I David adjunto a todos los eskojidos de Yisrael, trenta mil. 2I David se levanto, i se fue kon todo el puevlo ke estava kon el de Baal de Ye’huda, para yevar de ayi el arka del Dyo, sovre la kual fue yamado el nombre, el nombre de A’ Tsevaot, ke mora entre los Keruvim. 3I puzyeron el arka del Dyo sovre una karreta nueva, i la yevaron de la kaza de Avinadav, ke estava en la kuesta; i Uza i Ahio, ijos de Avinadav, giavan la karreta nueva. 4I la yevaron de la kaza de Avinadav, ke estava en la kuesta, kon el arka del Dyo, i Ahio iva delante del arka. 5I David i toda la kaza de Yisrael baylavan delante de A’ kon todo modo de instrumentos de madero de boshes, kon arpas, i lon navlas, i kon panderos, i kon sonajas, i kon retenyederas. 6I kuando vinyeron a la era de Nahon, Uza estendyo su mano sovre al arka del Dyo, i travo de eya; porke los bueyes se resvalaron. 7I el fulor de A’ se ensendyo kontra Uza, i lo iryo ayi el Dyo por el yerro; i muryo ayi djunto al arka del Dyo. 8I David se atristo por lo ke A’ avia echo portiyo en Uza. I fue yamado akel lugar Perets-Uza asta este dia. 9I temyo David de A’ akel dia, i disho: ¿komo vendra a mi el arka de A’? 10I no kijo David traer a si el arka de A’ a la sivdad de David; ma la izo bolver David a la kaza de Oved-Edom el Gitio. 11I estuvo el arka de A’ en la kaza de Oved-Edom el Gitio tres mezes; i bendisho A’ a Oved-Edom i a toda su kaza. 12I fue dado avizo al rey David, dizyendo: A’ bendisho la kaza de Oved-Edom, i todo lo ke tyene, por kavza del arka del Dyo. I anduvo David, i yevo el arka del Dyo de la kaza de Oved-Edom a la sivdad de David kon alegrias. 13I fue, ke komo los ke yevavan el arka de A’ avian andado sesh pasos, el sakrifiko un biey i un engordado. 14I David baylava kon toda su fuersa delante de A’; i Davod era senyido de un espaldar de lino. 15I David i toda la kaza de Yisrael yevavan el arka de A’ kon aulasyon i kon son de trompeta. 16I fue, ke komo el arka de A’ entrava en la sivdad de David, Mihal, ija de Shaul, mirava por la ventana, i vido al rey David saltar i baylar delante A’; i lo menospresyo en su korason. 17I trusheron el arka de A’, i la pararon en su lugar en medyo de la tyenda ke David avia tendido para eya i also David alsasyones i sakrifisyos de pases delante deA’. 18I kuando David akavo de alsar la alsasyon i el sakrifisyo de pases, bendisho al puevlo en el nombre de A’ Tsevaot. 19I espartyo a todo el puevlo, a todo el fonsado de Yisrael, tanto a ombres komo a mujeres, a kada uno un torta de pan, i una puesta de karne, i una torta de uvas. I se fue todo el puevlo kada uno a su kaza. 20I torno David para bendizir a su kaza. I salyo Mihal, ija de Shaul, a resivir a David, i disho: ¡Kuanto onrado fue oy el rey de Yisrael, ke se deskuvryo oy a vista de las syervas de sus syervos, komo se deskuvryera uno de los vanos! 21I disho David a Mihal: delante de A’, ke me eskojyo mas ke a tu padre, i mas ke a toda su kaza, para ordenarme por prinsipe sovre el puevlo de A’, sovre Yisrael; por tanto baylare delante de A’. 22I me desonrare mas ke esto, i sere basho en mis ojos; i kon las syervas ke dishiste, kon eyas sere onrado. 23I Mihal, ija de Shaul, no tuvo ninyo asta el dia de su muerte.
7 1I akontesyo, ke kuando el rey se avia asentado en su kaza, i ke A’ le avia dado repozo de todos sus enemigos al derredor; 2disho el rey a Natan el profeta; mira agora, yo moro en kaza de alarzes, i el arka del Dyo esta entre kortinas. 3I disho Natan al rey: va, az todo lo ke esta en tu korason; porke A’ es kontigo.
4I akontesyo akeya noche, ke fue palavra de A’ a Natan, dizyendo: 5va i di a mi syervo David: ansi dize A’: ¿tu me fraguaras kaza para mi morada? 6Porke no mori en kaza dezde el dia ke ize suvir a los ijos de Yisrael de Ayifto asta este dia, sino ke andava en tyenda i en tavernakulo. 7En kualkyer parte ke anduvi kon todos los ijos de de Yisrael, ¿avli yo palavra kon alguno de los trivos de Yisrael, a kyen ennkomendi para apasentar a mi puevlo Yisrael, dizyendo: ¿por ke no me fraguastesh kaza de alarzes? 8Agora pues, ansi diras a mi syervo David: ansi dize A’ Tsevaot: yo te tomi del koral, de detras de las ovejas, para ser prinsipe sovre mi puevlo, sovre Yisrael: 9i yo fue, kontigo en kualkyer parte ke anduviste, i taji a todos tus enemigos de delante de ti, i te ize fama grande, komo la fama de los grandes ke ay en la tyerra. 10I pondre lugar a mi puevlo Yisrael, i lo plantare, para ke more en su lugar, i nunka mas sea removido; i no tornaran los ijos de tortura para afriirlo, komo antes, 11i komo dezde el dia ke ordeni djuezes sovre mi puevlo Yisrael; i yo te dare repozo de todos tus enemigos. I A’ te dize, ke A’ te ara kaza. 12Kuando se kumplyeren tus dias, i yazyeres kon tus padres, yo levantare tu semen despues de ti, ke saldra de tus entranyas, i afirmare su reyno. 13El fraguare kaza para mi nombre, i konfirmare la siya de su reyno para syempre. 14Yo sere a el por padre , i el sera a mi por ijo. Si el atorsyere, yo lo kastigare kon vara de varones, i kon yagas de ijos de ombres. 15Ma mi mersed no se apartara de el, komo la aparti de Shaul, a kyen kiti de delante de ti. 16I sera firme tu kaza i tu reyno para syempre delante de ti; tu siya sera konfirmada para syempre. 17Segun todas estas palavras, i segun toda esta vizyon, ansi avlo Natan a David.
18I vino el rey David, i se asento delante de A’, i disho: Senyor A’, ¿kyen soy yo, i ke es mi kaza, ke me trushiste asta aki? 19I aun esto paresyo poko en tus ojos, Senyor A’, sino ke avlaste tambyen de la kaza de tu syervo por tyempo leshano. ¿I es esta la [1]uzansa del ombre, Senyor A’? 20¿I ke mas puede anyadir David para avlarte? Porke tu konoses a tu syervo, Senyor A’. 21Por tu palavra, i segun tu korason iziste toda esta grandeza, dandola a saver a tu servo. 22Por tanto te engrandesiste, A’ Dyo; porke no ay otro komo tu, ni ay Dyo afuera de ti, segun todo lo ke oimos kon nuestras orejas. 23¿I kual es la unika djente en la tyerra komo tu puevlo, komo Yisrael, por el kual el Dyo anduvo para regmirselo por puevlo, i para ponerse fama, i para azer a vozotros, ¡o Yisrael! kozas grandes i espantozas, ¡o Dyo! a tu tyerra, por amor de tu puevlo ke tu te regmiste de Ayifto, de las djentes i sus dyozes? 24I tu te konfirmaste a tu puevlo Yisrael por puevlo a ti para syempre, i tu A’ fuiste a eyos por Dyo. 25I agora, A’ Dyo, la palavra ke avlaste sovre tu syervo, i sovre su kaza, afirmala para syempre, i az komo avlaste. 26I sea engrandesido tu nombre para syempre, i se diga: A’ Tsevaot es Dyo sovre Yisrael; i sea la kaza de tu syervo David konfirmada delante de ti. 27Porke tu, A’ Tsevaot, Dyo de Yisrael, deskuvriste a la oreja de tu syervo, dizyendo: yo te fraguare kaza. Por tanto tu syervo ayo en su korason para orar a ti esta orasyon. 28I agora, Senyor A’, tu eres el Dyo, i tus palavras seran verdad, i avlaste tu syervo este byen. 29I agora envelunta, i bendize a la kaza de tu syervo, para ke kede para syempre delante de ti; porke tu, Senyor A’, avlaste; i de tu bendisyon sea bendicha la kaza de tu syervo para syempre
8 1I despues de esto akontesyo, ke David iryo a los Pelishtios, i los sodjifto; i tomo David a Meteg-‘Haama de mano de los Pelishtios. 2I iryo a Moav, i los midyo kon kuerda, azyendolos echar a tyerra; i midyo dos kuerdas para matar, i una kuerda entera para abidiguar. I fueron los Moavitas syervos a David pagando pecha. 3I iryo David a ‘Hadadezer, ijo de Rehov, rey de Tsova, en andando el a rekovrar su termino al rio Eufrates. 4I prendyo David de el mil i syetesyentos kavayeros, i vente mil varones a pye; i desjareto David todos los kavayos de las kuatriguas, ma desho de eyos los kavayos de syen kuatriguas. 5I vinyeron los Aramios de Damesek para ayudar a ‘Hadadezer, rey de Tsova; i David iryo de los Aramios vente i dos mil varones. 6I puzo David guarnisyones en Aram de Damesek; i fueron los Aramios syervos a David pagando pecha. I A’ salvo a David en kualkyer parte ke anduvo. 7I tomo David los eskudos de oro ke tenian los syervos de ‘Hadaezer, i los trusho a Yerushalayim. 8I de Betah, i de Berotay, sivdades de ‘Hadaezer, tomo el rey David muy mucho alambre.
9I oyendo Toi, rey de Hamat, ke David avia erido a todo el fonsado de ‘Hadaezer, 10enbio Toi a Yoram su ijo para saludarlo, i para bendizirlo, por lo ke avia peleado kon ‘Hadaezer, i lo avia erido; porke ‘Hadaezer azia gerras kon Toi. I en mano de el avia atuendos de plata, i atuendos de oro, i atuendos de alambre: 11los kuales tambyen el rey David santifiko a A’, kon la plata i el oro ke avia santifikado de todas las djentes ke avia sodjiguado: 12de Aram, i de Moav, i de los ijos de Amon, i de los Pelishtios, i de Amalek, i del espojo de ‘Hadadezer, ijo de Rehov, rey de Tsova. 13I gano David fama kuando torno de erir a Aram, dyez i ocho mil varones en el vaye de la sal. 14I puzo guarnisyones en Edom, por todo Edom puzo guarnisyones; i todos los Edomios fueron syervos a david. I A’ salvo a David en kuakyer parte ke anduvo. 15I enreyno David sovre todo Yisrael; i azia David djuisyo i djustedad a todo su puevlo. 16I Yoav, ijo de Tseruya, era djeneral sovre el fonsado; i Ye’hoshafat ijo de Ahilud, era kronista. 17I Tsadok, ijo de Ahituv, i Ahimeleh, ijo de Evyatar, eran saserdotes; i Seraya era eskrivano. 18I Benaya’hu, ijo de Ye’hoyada, era sovre los Keretios i los Peletios; i los ijos de David eran los prinsipales.
9 1I disho David: ¿kedo dainda alguno de la kaza de Shaul, para ke yo aga mersed kon el por amor de Ye’honatan? 2I avia un syervo de la kaza de Shaul, el nombre del kual era Tsiva. I lo yamaron a David, i el rey le disho: ¿eres tu Tsiva? i el disho: si, tu syervo. 3I el rey disho: ¿no ay dainda ninguno de la kaza de Shaul, para ke yo aga kon el mersed del Dyo? I disho Tsiva al rey: dainda kedo un ijo de Ye’honatan, kosho de los pyes. 4I el rey disho: ¿onde esta? i disho Tsiva al rey: ek, esta en kaza de Mahir, ijo de Amiel, en Lu-Devar. 5I enbio el rey David, i lo tomo de la kaza de Mahir, ijo de Amiel, de Lu-Devar. 6I kuando vino Mefivoshet, ijo de Ye’honatan, ijo de Shaul a David, se echo sovre sus fases, i se enkorvo. I disho David: Mefivoshet. I el disho: ek tu syervo. 7I David le disho: no temas; porke por seguro are kontigo mersed por amor de Ye’honatan tu padre, i tornare a ti todo el kampo de Shaul tu padre; i tu komeras pan a mi meza de kontino. 8I el se enkorvo, i disho: ¿kyen es tu syervo, para ke mires a un perro muerto komo yo soy? 9Entonses el rey yamo a Tsiva, moso de Shaul, i le disho: todo ke fue de Shaul, i de toda su kaza, yo lo di al ijo de tu senyor. 10I tu le lavraras la tyerra, tu, i tus ijos, i tus syervos, i traeras el renuevo, para ke el ijo de tu senyor tenga pan ke komer; i Mefivoshet, ijo de tu senyor, komera pan de kontino a mi meza. I Tsiva tenia kinze ijos, i vente syervos. 11I disho Tsiva al rey: segun todo lo ke enkomendo mi senyor el rey a su syervo, ansi ara tu syervo. 12I Mefivoshet tenia un ijo chiko, el nombre del kual era Miha. I todos los ke moravan en la kaza de Tsiva eran syervos a Mefivoshet. 13I Mefivoshet morava en Yerushalayim; porke komia de kontino a la meza del rey; i era kosho de sus dos pyes.
10 1I despues de esto akontesyo, ke muryo el rey de los ijos de Amon, i Hanun su ijo enreyno en su lugar. 2I disho David: are mersed kon Hanun, ijo de Nahash, komo su padre izo konmigo mersed. I enbio David para konortarlo por su padre por mano de sus syervos. I los syervos de David vinyeron a la tyerra de los ijos de Amon. 3I los mayorales de los ijos de Amon disheron a Hanun su senyor: ¿te parese ke por onrar David a tu padre te enbio konortadores? Por syerto enbio David sus syervos a ti por peshkirir la sivdad, i por eskulkarla, i por trastornarla. 4I Hanun tomo los syervos de David, i les rapo la mitad de la barva, i les korto los vestidos por la mitad asta sus nalgas, i los enbio. 5I kuando dyeron avizo a David, enbio a enkontrarlos, porke los varones estavan avergonsados mucho; i disho el rey: estadvos en Yeriho asta ke kreska vuestra barva, i entonses tornaresh.
6I vyendo los ijos de Amon ke se afedesyeron kon David, enbiaron los ijos de Amon, i alkilaron a los Aramios de Bet-Rehov, i a los Aramios de Tsova, vente mil ombres a pye, i del rey de Maaha mil ombres, i de Ish-Tov dodje mil ombres. 7I kuando lo oyo David, enbio a Yoav kon todo el fonsado de los barraganes. 8I salyeron los ijos de Amon, i ordenaron la batalya a la entrada de la puerta. I los Aramios de Tsova, i de Rehov, i los de Ish-Tov i de Maaha, estavan aparte en el kampo. 9I vyendo Yoav ke la frente de la batalya era por delante i por detras de el, eskojyo de todos los eskojidos de Yisrael, i se ordeno al enkuentro de los Aramios. 10I al resto del puevlo entrego en mano de Avishay su ermano, ke se ordeno al enkuentro de los ijos de Amon. 11I disho: si los Aramios se enfortesyeren mas ke yo, tu me ayudaras; i si los ijos de Amon se enfortesyeren mas ke tu, yo ire para ayudarte. 12Esfuersate i nos esforsemos por nuestro puevlo, i por las sivdades de nuestro Dyo; i aga A’ lo ke le parese byen. 13I se aserko Yoav, i el puevlo ke estava kon el, a la batalya kon los Aramios; i eyos fuyeron delantre de el. 14I los ijos de Amon vyendo ke los Aramios avian fuido, fuyeron tambyen eyos delante de Avishay, i entraron en la sivdad. I torno Yoav de los ijos de Amon, i vino a Yerushalayim. 15I kuando los Aramios vyeron ke fueron eridos delante de Yisrael, se adjuntaron auna. 16I enbio ‘Hadadezer, i sako a los Aramios ke estavan de la otra parte del rio, i vinyeron a Helam; i Shovah, kapitan del fonsado de ‘Hadadezer, iva delante de eyos. 17I fue dado avizo a David, i adjunto a todo Yisrael, i paso el Yarden, i vino a Helam. I los Aramios se ordenaron kontra David, i pelearon kon el. 18Ma los Aramios fuyeron delante de Yisrael; i mato David de los Aramios los ombres de syetesyentas kuatriguas, i kuarenta mil kavayeros; i iryo a Shovah, kapitan de su fonsado, i muryo ayi. 19I todos los reyes, syervos de ‘Hadadezer, vyendo ke fueron eridos delante de Yisrael, izyeron paz kon Yisrael, i les sirvyeron. I de ayi adelante temyeron los Aramios de ayudar a los ijos de Amon.
[1] Ebreo: ley
Ver todos los capítulos publicados en esta sección
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
