Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMUEL BET (11-15)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

SHEMUEL BET

11     ¹I akontesyo a la buelta del anyo, al tyempo ke salen los reyes a la gerra, ke David enbio a Yoav, i a sus syervos kon el, i a todo Yisrael, i destruyeron a los ijos de Amon, i asedyaron a Raba; ma David se kedo en Yerushalayim. ²I akontesyo a la ora de la tarde, ke David se levanto de sovre su kama, i paseandose sovre el tejado de la kaza real, vido de sovre el tejado una mujer ke se estava lavando; i la mujer era muy ermoza de vista. ³I enbio David i pregunto por la mujer; i le disheron ke eya era Bat-Sheva, ija de Eliam, mujer de Uriya el Hitio. ⁴I enbio David mensajeros, i la tomo; i eya vino a el, i el yazyo kon eya, porke eya se avia santifikado de su enkonamyento. I torno a su kaza. ⁵I se ensinto la mujer, i enbio i avizo a David, i disho: yo estoy prenyada.

⁶I enbio David a dizir a Yoav: enbiame a Uriya el Hitio. I Yoav enbio a Uriya a David. ⁷I kuando Uriya vino a el, David le pregunto komo estava Yoav, i komo pasava el puevlo, i komo iva la gerra. ⁸I disho David a Uriya: desyende a tu kaza, i lava tus pyes. I salyo Uriya de kaza del rey, i salyo detras de el komida real. ⁹I Uriya yazyo a la puerta de la kaza del rey kon todos los syervos de su senyor, i no desendyo a su kaza. ¹⁰I avizaron a David, dizyendo: Uriya no desendyo a su kaza. I disho David a Uriya: ¿no viniste de kamino? ¿por ke ni desendiste a tu kaza? ¹¹I disho Uriya a David: el arka, i Yisrael, i Ye’huda estan en kavanyas; i mi senyor Yoav, i los syervos de mi senyor, pozan sovre las fases del kampo; ¿i avia yo de entrar en mi kaza a komer i a bever, i a yazer kon mi mujer? Por tu vida, i por la vida de tu alma, no are esta koza. ¹²I disho David a Uriya: estate aki tambyen oy, i manyana te enbiare. I Uriya se kedo en Yerushalayim akel dia, i el dia siguente. ¹³I David lo konbido, i komyo i bevyo delante de el, i lo emborracho. I salyo a la tarde a yazer en su kama kon los syervos de su senyor, i no desendyo a su kaza.

¹⁴I fue ke a la manyana, David eskrivyo una karta a Yoav, i la enbio por mano de Uriya. ¹⁵I eskrivyo en la karta, dizyendo: poned a Uriya a la frente de lo fuerte de la batalya, i retiradvos de detras de el, para ke sea erido, i muera. ¹⁶I akontesyo , ke kuando Yoav asedyo la sivdad , puzo a Uriya en el lugar onde savia ke estavan los varones vayentes. ¹⁷I salyeron los varones de la sivdad, i pelearon kon Yoav, i kayeron algunos del puevlo de los syervos de David; i muryo tambyen Uriya el Hitio.

¹⁸I enbio Yoav, i avizo a David de todas las kozas de la gerra. ¹⁹I enkomendo al mensajero, dizyendo: kuando akavares de kontar al rey todas las kozas de la gerra, ²⁰sera ke su suvyere la sanya del rey, i te dishere: ¿por ke vos aserkatesh a la sivdad para pelear? ¿no saviash komo arrojan de sovre la muraya? ²¹¿Kyen iryo a Avimeleh, ijo de Yerubeshet? ¿no echo una mujer sovre el un pedaso de una rueda de molino de sovre la muraya i muryo en Tevets? ¿Por ke vos aserkastesh a la muraya? entonses diras: tambyen tu syervo Uriya el Hitio es muerto.

²²I se fue el mensajero, i vino, i konto a David todo lo ke Yoav lo enbio a dizir. ²³I disho el mensajero a David: syerto se mayorgaron kontra nozotros los varones, i salyeron a nozotros al kampo; ma nozotros fuimos sovre eyos asta la entrada de la puerta. ²⁴I flecheros tiraron a tus syervos de sovre la muraya, i muryeron algunos de los syervos del rey; i tambyen tu syervo Uriya el Hitio es muerto. ²⁵I disho David al mensajero: ansi diras a Yoav: no peze en tus ojos por esta koza, porka ya a uno ya a otro konsume la espada; esfuersate tu batalya kontra la sivdad, i derrokala. I tu konfortalo.

²⁶I la mujer de Uriya oyendo ke Uriya su marido era muerto, endecho por su marido. ²⁷I despues ke paso el limunyo, enbio David, i la rekojyo a su kaza; i eya le fue por mujer, i le paryo un ijo. Ma la koza ke David izo, desplazyo en los ojos de A’.

12     ¹I enbio A’ a Natan a David. I enbio a el, i le disho: avia dos varones en una sivdad, el uno riko, i el otro povre. ²El riko tenia ovejas i vakas muy muchas. ³Ma el povre no tenia nada, sino una chika karnera ke avia komprado i kriado; i se engrandesia kon el i kon sus ijos auna; de su bokado komia, i de su vazo bevia, i en su seno yazia. i era para el komo una ija. ⁴I vino un kaminante al varon riko; i el no kijo tomar de sus ovejas i de sus vakas, para gizar al kaminante ke le avia vinido, sino ke tomo la karnera del varon povre, i la gizo para el varon ke le avia vinido ⁵I se ensendyo el fulor de David kontra el varon, i disho a Natan: bivo A’, ke el varon ke izo este merese muerte: ⁶i deve pagar la karnera kon kuatro tantos, por lo ke izo esta koza, i por lo ke no tuvo piadad.

⁷I disho Natan a David: tu eres el varon. Ansi dize A’ Dyo de Yisrael: yo te unti por rey sovre Yisrael, i yo te eskapi de la mano de Shaul: ⁸i te di la kaza de tu senyor, i las mujeres de tu senyor en tu seno, i te di la kaza de Yisrael i de Ye’huda; i si esto era poko, te anyadiria tales i tales kozas. ⁹¿Por ke menospresyaste la palavra de A’, azyendo lo malo en sus ojos? a Uriya el Hitio eriste kon la espada, i tomaste a su mujer para ti por mujer, i a el mataste kon la espada de los ijos de Amon. ¹⁰Agora pues no se apartara espada de tu kaza para syempre, por lo ke menospresyaste, i tomaste la mujer de Uriya el Hitio para ser tu mujer. ¹¹Ansi dize A’: ek, yo levanto sovre ti mal de tu propya kaza, i tomare tus mujeres delante de tus ojos, i las dare a tu kompanyero, i el yazera kon tus mujeres a la vista de este sol. ¹²Porke tu lo iziste en la enkuvyerta; ma yo are esta koza delante de todo Yisrael, i delante del sol. ¹³I disho David a Natan: peki kontra A’. I disho Natan a David: tambyen A’ izo pasar tu pekado; no muriras. ¹⁴Ma por lo ke kon esta koza iziste a ke repudyen los enemigos de A’, tambyen el ijo ke te nasyo murir murira.

¹⁵I Natan anduvo a su kaza. I A’ iryo al ninyo ke la mujer de Uriya avia parido a David, i se izo muy hazino. ¹⁶I David rogo al Dyo por el ninyo; i ayuno David ayuno, i vino, i paso la noche echando en tyerra. ¹⁷I se levantaron los vyejos de su kaza a el, para azerlo levantar de la tyerra; ma el no kijo, ni komyo kon eyos pan. ¹⁸I akontesyo ke al dia seteno el ninyo muryo. I los syervos de David temyeron de azerlo saver ke el ninyo era muerto; porke disheron: ek myentras ke el ninyo bivia le avlavamos, i no keria oir nuestra boz; ¿i komo le diremos, el ninyo es muerto, i le ara mal? ¹⁹Ma vyendo David ke sus syervos avlavan entre si, entendyo David ke el ninyo era muerto. I disho David a sus syervos: ¿es muerto el ninyo? i disheron: muerto es. ²⁰Entonses David se levanto de la tyerra, i se lavo, i se unto, i mudo sus vestidos, i vino a la kaza de A’, i se enkorvo. I vino a su kaza, i demando, i le puzyeron pan, i komyo. ²¹I le disheron sus syervos: ¿ke koza es esta ke iziste? por el ninyo, myentras ke bivia, ayunavas i yoravas; i kuando el ninyo muryo, te levantaste i komiste pan. ²²I el disho: myentras ke el ninyo bivia, yo ayunava i yorava, porke dizia yo: ¿kyen save si el Dyo tendra piadad de mi, ke el ninyo biva? ²³Ma agora ke ya es muerto, ¿para ke tengo ke ayunar? ¿podre azerlo mas tornar? yo voy a el, ma el no tornara a mi.

²⁴I konorto David a Bat-Sheva su mujer, i vino a eya, i yazyo kon eya. I paryo un ijo, i el yamo su nombre Shelomo; i A’ lo amo. ²⁵I enbio por mano de Natan el profeta, i yamo su nombre Yedidya a kavza de A’.

²⁶I Yoav peleava kontra Raba de los ijos de Amon, i prendyo la sivdad real. ²⁷I enbio Yoav mensajeros a David, i disho: yo pelei kontra Raba, tambyen prendi la sivdad de las aguas. ²⁸Agora pues adjunta al resto del puevlo, i poza kontra la sivdad, i prendela, no sea ke yo prenda la sivdad, i sea yamada por mi nombre. ²⁹I adjunto David a todo el puevlo, i fue a Raba, i peleo kontra eya, i la prendyo. ³⁰I tomo la korona de su rey de sovre su kavesa, el pezo de la kual era un kintal de oro kon pyedras presyadas, i fue puesta sovre la kavesa de David. I sako el espojo de la sivdad, ke era muy mucho. ³¹I sako al puevlo ke estava en eya, i lo puzo debasho de syerras i de triyos de fyerro, i de destrales de fyerro, i los izo pasar por ornos; i ansi izo a todas las sivdades de los ijos de Amon. I se torno David kon todo el puevlo a Yerushalayim.

13     ¹I despues de esto akontesyo, ke Avshalom, ijo de David, tenia una ermana ermoza, el nombre de la kual era Tamar; i Amnon ijo de David, se enamoro de eya. ²I Amnon fue angustyado asta ser hazino por Tamar su ermana; porke syendo eya eskosa, paresia a Amnon ke seria difisil de azerle alguna koza. ³I Amnon tenia un amigo, ke se yamava Yonadav, ijo de Shima, ermano de David; i Yonadav era ombre muy agudo. ⁴I este le disho: ijo del rey, ¿por ke estas ansi flako kada manyana? ¿no me lo deskuvriras a mi? I Amnon le disho: estoy enamorado de Tamar, la ermana de Avshalom mi ermano. ⁵I Yonadav le disho: echate en tu kama, i mostrate de hazino; i kuando tu padre vinyere a vijitarte, dile: te rogo ke venga Tamar mi ermana, para ke me de a komer pan, i aga un gizado delante de mi, para ke yo lo vea, i koma de su mano. ⁶I Amnon se echo, i se mostro de hazino. I vino el rey a vijitarlo, i disho Amnon al rey: te rogo ke venga Tamar mi ermana, i aga delante de mi dos aletrias, par ke yo koma de su mano. ⁷I David enbio en kaza a dizir a Tamar: va agora a kaza de Amnon tu ermano i azle un gizado. ⁸I anduvo Tamar a kaza de Amnon su ermano, i el estava echado. I tomo arina, i amaso, i izo aletrias delante de el, i kozyo las aletrias. ⁹I tomo la sarten, i las vazyo delante de el; ma el no kijo komer. I disho Amnon: azed salir a todos de konmigo. I salyeron todos de kon el. ¹⁰I disho Amnon a Tamar: trae la komida a la kamara, para ke yo koma de tu mano. I tomo Tamar las aletrias ke avia echo, i las trusho a Amnon su ermano a la kamara. ¹¹I kuando eya las aserko a el para ke komyera, travo de eya i le disho: ven, echate konmigo, mi ermana. ¹²I eya le disho: no mi ermano, no me afrias; porke no se aze ansi en Yisrael; no agas esta vileza. ¹³I yo, ¿onde yevaria mi repudyo? I tu serias komo uno de los viles en Yisrael. I agora, te rogo ke avles al rey; porke no me refuzara a ti. ¹⁴I el no kijo oir a su boz, sino ke esforsandose mas ke eya, la afrio, i se echo kon eya. ¹⁵I la aborresyo Amnon kon aborresyon muy grande, de modo ke la aborresyon kon ke la aborresyo era mas grande ke el amor kon ke la avia amado. I Amnon le disho: levantate, vate. ¹⁶I eya le disho: no es razon; mas grande es este mal de echarme ke el otro ke me iziste. Ma el no kijo oirla. ¹⁷I yamo a su moso ke le servia, i disho: echad agora a esta afuera de mi, i serra la puerta detras de eya. ¹⁸I eya tenia sovre si una tonga de kolores; porke las ijas eskosas del rey se vestian de tales mantos. I su syervo la sako, i serro la puerta detras de eya. ¹⁹I Tamar tomo seniza, i la esparzyo sovre su kavesa, i razgo la tonga de kolores ke tenia sovre si; i puzo su mano sovre su kavesa, i se iva andando i esklamando. ²⁰I le disho Avshalom su ermano: ¿estuvo kontigo Amnon tu ermano? ma agora kayate, mi ermana; tu ermano es; no pongas tu korason a esta koza. I Tamar se kedo deskonsolada en kaza de Avshalom su ermano. ²¹I el rey David oyendo todas estas kozas, fue muy ravyozo. ²²Ma Avshalom no avlo kon Amnon ni mal ni byen; porke Avshalom aborresia a Amnon, por lo ke avia afriido a Tamar su ermana.

²³I akontesyo despues de dos anyos de tyempo, ke Avshalom tenia traskiladores en Baal-Hatsor, ke esta djunto a Efrayim; i konbido Avshalom a todos los ijos del rey. ²⁴I vino Avshalom al rey, i disho: ek agora, tu syervo tyene traskiladores; te rogo ke venga el rey i sus syervos kon tu syervo. ²⁵I disho el rey a Avshalom: no, mi ijo; no vamos agora todos, no sea ke te agamos gaste. I porfio kon el, ma no kijo ir, i lo bendisho. ²⁶Entonses disho Avshalom: si no, te rogo ke vengan kon nozotros Amnon mi ermano. I el rey le disho: ¿para ke tyene ke ir kontigo? ²⁷I komo Avshalom porfio kon el desho ir kon el a Amnon, i a todos los ijos del rey. ²⁸I Avshalom avia enkomendado a sus mosos, dizyendo: vos rogo ke miresh kuando el korason de Amnon estara alegre del vino, i kuando yo vos dishere: erid a Amnon; entonses mataldo no temash; mirad ke yo vos enkomendi; esforsadvos, i sed ombres vayentes. ²⁹I los mosos de Avshalom izyeron a Amnon komo Avshalom avia enkomendado. I se levantaron todos los ijos del rey, i suvyeron kada uno sovre su mulo, i fuyeron. ³⁰I fue, ke myentras ke estavan en el kamino, vino la notisya a David, dizyendo: mato Avshalom a todos los ijos del rey, i no kedo de eyos ni uno. ³¹Entonses el rey se levanto, i razgo sus vestidos, i se echo a tyerra; i todos sus syervos estavan parados, razgados sus vestidos. ³²I respondyo Yonadav, ijo de Shima, ermano de David, i disho: no diga mi senyor ke mataron a todos los mansevos ijos del rey, porke solo Amnon es muerto; porke por boka de Avshalom fue determinado dezde el dia ke afrio a Tamar su ermana. ³³Por tanto agora no ponga mi senyor el rey en su korason tal koza, dizyendo: todos los ijos del rey son muertos. Porke solo Amnon es muerto. ³⁴I Avshalom fuyo. I el moso atalayador also sus ojos, i miro; i ek mucho puevlo venia por el kamino detras de el del lado del monte. ³⁵I disho Yonadav al rey: ek, los ijos del rey vyenen; segun la palavra de tu syervo, ansi es. ³⁶I fue, ke komo akavo de avlar, ek, los ijos del rey vinyeron, i alsaron su boz i yoraron. I tambyen el rey i todos sus syervos yoraron yoro muy grande. ³⁷Ma Avshalom fuyo, i se fue a Talmi ijo de Ami’hud. rey de Geshur. I David se alimunyo por su ijo todos los dias. ³⁸Ansi Avshalom fuyo, i se fue a Geshur, i estuvo ayi tres anyos. ³⁹I el alma de David el rey dezeo de salir a Avshalom; porke ya estava konortado por Amnon, ke era muerto.

14     ¹I konosyo Yoav, ijo de Tseruya, ke el korason del rey era kon Avshalom. ²I enbio Yoav a Tekoa, i tomo de ayi una mujer savya, i le disho: te rogo ke te enlutes, i ke te vistas de ropas de luto, i no te untes kon azeyte, i seas komo una mujer ke de muchos dias yeva luto por muerte. ³I entra al rey, i avlale de esta manera. I puzo Yoav las palavras en su boka. ⁴I avlo la mujer Tekoita kon el rey, i se echo sovre sus fases a tyerra, i se enkorvo, i disho: salva, ¡o rey! ⁵I el rey le disho: ¿ke tyenes? I eya disho: en verdad yo soy una mujer bivda, i mi marido es muerto. ⁶I tu syerva tenia dos ijos, i los dos barajaron en el kampo; i no uvo kyen los espartyera, i iryo el uno al otro, i lo mato. ⁷I ek, todo el linaje se levanto kontra tu syerva, i dizen: entrega al ke iryo a su ermano, para ke lo matemos por la vida de su ermano a kyen el mato, i destruiremos tambyen al eredador. Ansi amataran mi braza ke kedo, sin deshar a mi marido nombre ni remanesimyento sovre las fases de la tyerra. ⁸I el rey disho a la mujer: vate a tu kaza, i yo enkomendare por ti. ⁹I la mujer Tekoita disho al rey: mi senyor rey, sovre mi sea el delito, i sovre la kaza de mi padre, i el rey i su siya sea sin kulpa. ¹⁰I disho el rey: kyen te avlare koza, traelo a mi, i no te tokara mas. ¹¹I eya disho: te rogo ¡o rey| ke te akordes de A’ tu Dyo, ke el regmidor de la sangre no muchigue para danyar, i no destruygan a mi ijo. I el disho: bivo A’, no kaera ni un kaveyo de la kavesa de tu ijo a tyerra. ¹²I disho la mujer: te rogo ke avle tu syerva una palavra a mi senyor el rey. I el disho: avla. ¹³I disho la mujer: ¿por ke pues pensaste tal koza kontra el puevlo del Dyo? porke avlando el rey esta palavra es komo kulpozo, en no azyendo tornar el rey a su empushado. ¹⁴Porke murir muriremos, i somos komo aguas vertidas en tyerra, ke nunka mas son akojidas; ni el Dyo kita la vida, ma pensa pensamyentos para no empushar de si el empushado. ¹⁵I agora ke yo vine para avlar al rey mi senyor esta palavra, es por ke me espantaron el puevlo; i tu syerva disho en si: avlare agora al rey; kizas ara el rey la palavra de su syerva. ¹⁶Porke el rey oira para eskapar a su syerva de mano del varon ke me kyere destruir a mi i a mi ijo de la eredad del Dyo. ¹⁷I tu syerva disho: sea agora la palavra de mi senyor el rey por repozo; porke komo un andjel del Dyo, ansi es mi senyor el rey para oir lo bueno i lo malo; i A’ tu Dyo sea kontigo. ¹⁸I respondyo el rey i disho a la mujer: te rogo ke no me enkuvras la koza ke yo te preguntare. I disho la mujer: avle agora mi senyor el rey. ¹⁹I disho el rey: ¿no esta la mano de Yoav kontigo en todo esto? I respondyo la mujer i disho: biva tu alma, mi senyor rey, no ay kyen pueda ir a la derecha ni a la izkyerda de todo lo ke avlo mi senyor el rey; porke tu syervo Yoav, el me enkomendo, i el puzo en la boka de tu syerva todas estas palavras. ²⁰Para bolver la forma de la avla, izo tu syervo Yoav esta koza; i mi senyor es savyo segun la saviduria de un andjel del Dyo, para saver todo lo ke ay en la tyerra.

²¹I disho el rey a Yoav: ek agora, yo ize esta koza; va pues az tornar al moso Avshalom. ²²I Yoav se echo sovre sus fases a tyerra i se enkorvo, i bendisho al rey; i disho Yoav: oy entendyo tu syervo ke ayi grasya en tus ojos, mi senyor rey, por lo ke izo el rey la palavra de su syervo. ²³I Yoav se levanto, i se fue a Geshur, i trusho a Avshalom a Yerushalayim. ²⁴I disho el rey: tornese a su kaza, i no vea mi kara. I Avshalom se torno a su kaza, i no vido la kara del rey.

²⁵I en todo Yisrael no avia varon tan ermozo komo Avshalom de alavar mucho; dezde la planta de su pye asta su meoyera ni avia en el makula. ²⁶I kuando traskilava su kavesa (i era al kavo de kada anyo ke se traskilava, porke el kaveyo se apezgava sovre el, i lo traskilava.) Pezava el kaveyo de su kavesa dossyentos siklos de pezo real. ²⁷I nasyeron a Avshalom tres ijos, i una ija, ke se yemava Tamar. Eya era mujer ermoza de vista.

²⁸I estuvo Avshalom en Yerushalayim dos anyos de tyempo i no vido la kara del rey. ²⁹I enbio Avshalom por Yoav para enbiarlo al rey; ma no kijo venir a el. I enbio aun segunda vez; mo no kijo venir. ³⁰I disho a sus syervos: mirad el kampo de Yoav esta serka de mi lugar, i tyene ayi sevadas; andad i metelde fuego. I los syervos de Avshalom puzyeron fuego al kampo. ³¹I Yoav se levanto, i vino a Avshalom a su kaza, i le disho: ¿por ke puzyeron fuego tus syervos a mi kampo? ³²I disho Avshalom a Yoav: ek, yo enbii por ti, dizyendo: ven aki, para ke yo te enbie al rey a dizir: ¿para ke vine de Geshur? mejor me fuera estar dainda ayi. I agora vea yo la kara del rey; i si ay en mi delito, ke me mate. ³³I vino Yoav al rey, i se lo dyo a saver. I yamo a Avshalom, i el vino al rey, i se enkorvo a el sovre sus fases a tyerra delante del rey; i el rey bezo a Avshalom.

15     ¹I despues de esto akontesyo, ke Avshalom izo para si kuatriguas i kavayos, i sinkuenta varones ke korryeran delante de el. ²I madrugava Avshalom, i se parava al lado del kamino de la puerta, i era ke a kualkyer varon ke tenia baraja, i venia al rey a djuisyo, Avshalom lo yamava, i dizia: ¿de ke sivdad eres tu? I el dizia: tu syervo es de uno de los trivos de Yisrael. ³I Avshalom le dizia: mira, tus palavras son buenas i djustas; ma no ay kyen te oyga de parte del rey. ⁴I dizia Avshalom: ¡kyen me puzyera por djuez en la tyerra, para ke vinyera a mi todo varon ke tyene baraja i djuisyo, i yo le aria djustisya! ⁵I era, ke kuando alguno se ayegava para enkorvarse a el, el estendia su mano, i lo tomava, i lo bezava. ⁶I de esta manera azia Avshalom a todos los de Yisrael ke venian al rey a djuisyo; i ansi rovava Avshalom el korason de los varones de Yisrael.

⁷I akontesyo al kavo de kuarenta anyos, ke Avshalom disho al rey: te rogo ke me deshes ir en Hevron a pagar mi promesa ke prometi a A’. ⁸Porke tu syervo prometyo promesa, estando yo en Geshur en Aram, dizyendo: si tornar me tornare A’ a Yerushalayim, yo servire a A’. ⁹I el rey le disho: vate en paz. I el se levanto, i se fue a Hevron.

¹⁰I Avshalom enbio eskulkar por todos los trivos de Yisrael, dizyendo: luego ke oyeresh el son de la trompeta, diresh: Avshalom enreyna en Hevron. ¹¹I kon Avshalom anduvyeron dossyentos varones de Yerushalayim, konbidados de el, i ivan en su prenizmedad, i no savian nada. ¹²I enbio Avshalom por Ahitofel el Gilonita, konsejero de David, de su sivdad de Gilo, kuando el sakrifikava los sakrifisyos. I la traisyon era fuerte, i el puevlo se iva muchiguandose kon Avshalom.

¹³I vino un avizador a David, dizyendo: el korason de los varones de Yisrael se va detras de Avshalom. ¹⁴I disho David a todos sus syervos ke estavan kon el en Yerushalayim: levantadvos, i fuygamos, porke no podremos eskapar delante de Avshalom. Apresuradvos a andar, no sea ke el se apresure i nos alkanse, i empushe sovre nozotros mal, i erira la sivdad a tajo de espada. ¹⁵I los syervos del rey disheron al rey: ek, tus syervos estan prontos para todo lo ke mi senyor el rey eskojyere. ¹⁶I salyo el rey kon toda su kaza detras de el. I desho el rey dyez mujeres donzeyas para guardar la kaza. ¹⁷I salyo el rey, i todo el puevlo detras de el, i se pararon en un lugar leshos. ¹⁸I todos sus syervos pasavan a su lado, i todos los Keretios, i todos los Peletios; i todos lo Gitios, seshsyentos varones ke vinyeron detras de el dezde Gat, pasavan delante del rey. ¹⁹I disho el rey a Itay el Gitio: ¿por ke vyenes tu tambyen kon nozotros? tornate i kedate kon el rey; porke tu eres estranyo, i desterrado tambyen tu de tu lugar. ²⁰Ayer viniste, ¿i oy tengo ke azerte andar por aki i por ayi kon nozotros? Yo voy sovre lo ke yo voy; tornate tu, i az tornar a tus ermanos; kontigo sean mersed i verdad. ²¹I respondyo Itay al rey, i disho: bivo A’, i por la vida de mi senyor el rey, ke en el lugar onde mi senyor el rey estuvyere, sea para muerte o para vida, ayi estara tambyen tu syervo. ²²I disho David a Itay: ven, i pasa. I paso Itay el Gitio, i todos sus varones, i toda la famiya ke estava kon el. ²³I toda la djente de la tyerra yoravan kon boz alta, i todo el puevlo pasavan; i el rey pasava el arroyo de Kidron, i todo el puevlo pasavan por el kamino al dizyerto. ²⁴I ek, tambyen Tsadok, i kon el todos los Levitas, ke yevavan el arka del firmamyento del Dyo; i asentaron el arka del Dyo. I suvyo Evyatar asta ke todo el puevlo akavo de salir de la sivdad. ²⁵I disho el rey a Tsadok: torna el arka del Dyo a la sivdad; si yo ayare grasya en ojos de A’, el me tornara, i me ara ver a eya i a su morada. ²⁶Ma si ansi dishere: no envulinti en ti; ek aki estoy, aga a mi lo ke le parese byen. ²⁷I disho el rey a Tsadok el saserdote: ¿no eres tu el veedor? tornate a la sivdad en paz, i kon vozotros vuestros dos ijos, Ahimaats tu ijo, i Ye’honatan ijo de Evyatar. ²⁸Mirad, yo me detendre en las yanuras del dizyerto, asta ke venga respuesta de vozotros para darme avizo. ²⁹Entonses Tsadok i Evyatar tornaron el arka del Dyo a Yerushalayim, i se estuvyeron ayi. ³⁰I David suvia por la suvida de los olivaros, suvyendo i yorando, i tenia su kavesa kuvyerta, i andava deskalso; i todo el puevlo ke estava kon el kuvryeron kada uno su kavesa, i suvyeron suvyendo i yorando. ³¹I dyeron avizo a David, dizyendo: Ahitofel esta kon los ke azen traisyon kon Avshalom. I disho David: te rogo , ¡o A’! ke [1]baldes el konsejo de Ahitofel. ³²I fue, le komo David venia asta la punta del monte, onde se keria enkorvar al Dyo, ek, Hushay el Arkita vino a su enkuentro, razgada su tonga, i tyerra sovre su kavesa. ³³I le disho David: si pasares konmigo, me seras por karga. ³⁴Ma si tornares a la sivdad, i disheres a Avshalom: ¡o rey! yo sere tu syervo; asta agora yo fue syervo de tu padre, i agora sere tu syervo; baldaras por mi el konsejo de Ahitofel. ³⁵I de syerto estan ayi kontigo Tsadok i Evyatar los saserdotes. I sera, ke kualkyer koza ke oyeres de la kaza del rey, lo aras saver a Tsadok i a Evyatar los saserdotes. ³⁶Ek, estan ayi kon eyos sus dos ijos, Ahimaats, el de Tsadok, i Ye’honatan, el de Evyatar; i por mano de eyos enbiaresh a mi avizo de toda koza ke oyeresh. ³⁷Ansi vino Hushay, amigo de David, a la sivdad i Avshalom vino a Yerushalayim.

[1] Ebreo: enlokese

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.